रोमि 1
1
पावल्ओ अ़सेवा
1अ़ङ्का पावल, येसु ख्रिस्तओ अ़चुहारुक, अ़क्छा छाम्माय़ङ लिसि ऩबुत्ताङ ओ, खोन्कि निनाम्हाङ्ओ अ़चुनुय़ङ्खान खालुसि ऩछेन्ताङ्ओ। 2ओ नुय़ङ्खान निनाम्हाङ्आ निनाम्हाङ्य़ङ खाकालुचिलाम्पा सेङ्याङ्ओ साम्कालिन्दा बुयाङा म़हिप्तायुङ्सा।
3ओ नुय़ङ्खान निनाम्हाङ्ओ अ़चुछा आन्हाङ्पा येसु ख्रिस्तओ अ़तुक्वादाओ। खोक्को म़ना म़लिसाकि दाउद हाङ्ओ अ़भुङ्दाङ्का म़पुक्तान्चिन। 4खोन्कि सेङ्लावाआ खोक्को निनाम्हाङ्ओ अ़चुछा झारा सावापोरिओ निकिना खाङ्म़मेत्तुचि, देकिनालो आन्हाङ्पा येसु ख्रिस्त म़सुवादाओदाङ्का म़खोन्तालोन्ता। 5आन्हाङ्पा येसु ख्रिस्तलाम्पा निनाम्हाङ्आ आन्कान सोमाम़तुक्ताकि छाम्माय़ङ लिमाओ अ़वाखाम म़पुवायुङ्सा, खोन्ओसा झारा रावाओ म़नाचि साकोङ्छ़ङ्दा खोन्कि लोमाय़ङ्दा तित्मा ऱम्च़म्कि निनाम्हाङ्ओ अ़चुऩङ अ़लोङ्ने। 6खानानिन्छाङ म़नाचिओ अ़चुरादाङ्का येसु ख्रिस्तओ लिसि ऩबुत्तिन्युङ्सिन।
7रोम्दा कायुङ खानानिन झारा अ़ङ्का छाप्नाङ्नानिन, निनाम्हाङ्आ सोमाऩतुक्तिन्येन्ओचि, खानानिन निनाम्हाङ्ओ अ़चुम़नाचि लिसि ऩबुत्तिन्युङ्सिन:
आन्पापा निनाम्हाङ खोन्कि हाङ्पा येसु ख्रिस्तएदाङ्का खानानिन्आ सोम्तुक्मा खोन्कि सेवाङ्नि त़तोक्तुम्ने।
आलाङ्मिओ यामात्मा
8झारादाङ्का बुया, अ़ङ्का अ़ङ्निनाम्हाङ येसु ख्रिस्तलाम्पा खानानिन झारासोओ निम्पाङ आलाङ प़ङ। देकिनालो आम्नुओ साकोङ्छ़ङ्ओ अ़तुक्वादा झारा हेन्खामादा खालुसायुङ्सा। 9अ़ङ्का झारा अ़ङ्साकोङ्वाआ खोक्कोसोओ अ़चुछाओ अ़चुनुय़ङ्खान खालुमादा खोक्को ब़रुङ, खोन्कि अ़धुन अ़ङ्यामात्मादा अ़ङ्का खानानिन मित्नानिन्ओ य़ङ निनाम्हाङ अ़ङ्सालुम्स़ङ म़युङ्याङ। 10खोन्कि अ़ङ्का ओ दोरुङ, देत्निनुछाङ, निनाम्हाङ्ओ अ़चुमिन्मालाम्पा, आदेङ अ़ङ्का खानानिन तुप्सि बान्मा ऱङाने।
11अ़ङ्का अ़न्नुनु खानानिन तुप्मा स़ङाङा, देकिनालो अ़ङ्का खानानिन लावामि आसिखा प़माकि आम्नुओ साकोङ्छ़ङ छोयाङ्ओ लिनेनि मिन्ङाङा। 12अ़ङ्य़ङ्ओ अ़तुप्माय़ङ ओङा ओ, आम्नुओ खोन्कि अ़ङ्को, आन्साकोङ्छ़ङ्लाम्पा आन्कान अ़क्छा निएदा राक तोक्मा ऱम्ने। 13ब़ब़, नाना खोन्कि निछाचि ओ, अ़ङ्का खानानिन्आ सिन्तानुम्नि मिन्ङा, अ़ङ्का खानानिन्एदा ब़द्धेकादु बान्मानि मिनाङ, मेन आय़तारि अ़ङ्का दि-दिसाआ अ़छेक्ताङ्युङ्साङ। देत्नि अ़ङ्का नि म़नाचिओ अ़चुरादा सिवा कोउङ, मोवात्निङा आम्नुओ रादाछाङ कोप्मानि मिन्ङाङा। 14देकिनालो ग्रिक्वाकोचि काले खोन्कि मान्लेकादा, ताया कातोक खोन्कि ताया मान्तोक्कादाचि झारासोओ निम्पाङ अ़ङ्का काचि मुमाङादोत। 15खोन्ओसा खानानिन रोम्दा कायुङ्चिओ निम्पाङ्छाङ ओ नुय़ङ्खान खाएत्मा अ़ङ्का अ़न्नुनु राक मुङाङा।
नुय़ङ्खान्ओ अ़सावा
16नुय़ङ्खान खालुमा अ़ङ्लेजो अ़कात्निन, देकिनालो झारा साकोङ्छ़ङ कामु लेत्माओ निम्पाङ ओ निनाम्हाङ्ओ अ़चुसावा ओ: बुयाओदु यहुदिचि, खोन्कि ग्रिक्चिओ निम्पाङ्छाङ ओ। 17देकिनालो नुय़ङ्खान्आ म़नाचि निनाम्हाङ्ओ अ़चुबुदा देत्नि साम्योक्मि कान्नि खाङ्मुसु। मो साम्योक्मि आन्कान्एदा साकोङ्छ़ङ्लाम्पा झारा ता। साम्कालिन्दा ओवात्नि छाप्याङ, “साम्योक्मि साकोङ्छ़ङ्लाम्पा ह़ङ।”#हबकुक २:४
म़नाचिओ अ़चुदेङ्सालाप्पादा निनाम्हाङ्ओ अ़चुच़ऱपा
18निनाम्हाङ्ओ अ़चुच़ऱपा झारा म़नाचिओ अ़चुहेवा खोन्कि अ़चुओ अ़अ़त्पाओ अ़देङ्सालाप्पादा निनाम्मादुङ्का खाङ्मुसायुङ्सा। मो अ़चुओ अ़अ़त्पा काचिआ अ़छ़ङ तिमुयुङ्सु। 19मोचिआ निनाम्हाङ्ओ अ़छ़ङ्ओ अ़तुक्वादा अ़सिन्याङ, देकिनालो निनाम्हाङ्आ ओ य़ङ मोचि खाङ्म़मेत्तुप़युङ्सुचि। 20निनाम्हाङ्ओ अ़धुन्ओ अ़चुसावा खोन्कि अ़चुच़माथाङ्मा अ़खान्मिन। मेन खोक्कोसाआ निनाम्मा हेन्खामा मुन्मा पुङ्माय़ङ्दाङ्काङा खोक्कोसाआ अ़मुयाओ सामाचिलाम्पा निनाम्हाङ्आ खाङ्अ़मुसायुङ्सा। खोन्ओसा म़नाचिआ निनाम्हाङ ऩसिन्तुन्ओदा देम्खाछाङ ऩलेत्तुन्चिन।
21देकिनालो मोचिआ निनाम्हाङ अ़सिन्ताकिछाङ निनाम्हाङ्ओ अ़चुऩङ मान्लोङ्अ़दा, ना मोचिआ आलाङ्ङा अ़पुवा, मेन मोचिओ अ़चुमिन्मा सोज्जेओ लिसा, खोन्कि मोचिओ खामान्सिन अ़चुसाकोङ्वा कुइयामा लिसा। 22मोचि “खारु तोक्ङाङा”नि म़य़ङानुछाङ, मोचि खामान्सिन म़लिसा। 23मोचिआ स़दाओ म़ना, छोङ्वाचि, चारकालाङ्ओ साक्स़ङ्चि खोन्कि कासात्नान्चिन्चिएनान अ़लुक्निन्ओ निनाम्हाङ्ओ अ़चुऩङ्लोङ्मा अ़फान्ता।
24खोन्ओसा निनाम्हाङ्आ मोचिओ अ़चुसाकोङ्वादाओ हेवामि अ़चुमिन्माचिओ पोप्माय़ङ्दा मोचि म़लेरुखाइसुचि खोन्कि मोचिआ अ़क्छा निओ अ़चुपोक्दा सायापेप्माओ काचि म़मुवा। 25देकिनालो मोचिआ निनाम्हाङ्ओ अ़छ़ङ सोज्जेओएनान अ़फान्ता, खोन्कि कामुन्पा ब़क्मा अ़छिराकि नि मुन्माय़ङ सामाचि साया म़मेत्तुचि खोन्कि म़ब़रुचि। निनाम्हाङ ओन्ङा अ़धुन आलाङ प़मा खान्तुओ म़मुयाङ। मोवात्निङा लिने।
26ओवात्नि म़नाचिआ मो य़ङ्चि म़मुचिओसा, निनाम्हाङ्आ लेजो कात्ओ पोक मित्माचिदा मोचि म़छिरुदोचि। मोचिओ अ़चुरादा मेत्छामाचिआ दुवाछाएनान इम्मा अ़छिराकि मेत्छामाचिएनान इम्मा अ़पुङ्सा। 27खोन्कि मोवात्निङा दुवाछाचिआ मेत्छामाचिएनान इम्मा अ़छिराकि अ़क्छा निएदा पोक मित्माआ ह़त्तुङुचिओ ग़रि दुवाछा दुवाछाएनान लेजो काचिचि म़मुवा, खोन्कि मोचिओ अ़चुफिमा काचिओ दन्दा आप्पिओ अ़चुपोक्दा अ़तोक्ता।
28खोन्कि मोचिआ निनाम्हाङ लोक्मा अ़खान्तुन्लो अ़खाओसा निनाम्हाङ्आ मोचिओ अ़त्लो अ़चुमिन्मा खोन्कि खान्अ़त्लो च़माथाङ्मादा मोचि म़लेरुखाइसुचि। 29मोचि झाराकापाराओ मान्साम्योक्मि, अ़अ़त्पा, च़क्ख़य़, चिप्मा, भेप्तुयुङ्सुचि। मोचि ऩङ्च़, सेत्मा, खिमामुमा, च़न्मा, रुफोक्मा, दुम्लुमा, 30खोन्कि कासुङ, निनाम्हाङ ऩङाकाछित, ऱक्भाक, ऱफोक्वा खोन्कि तोक्पो कालि, अ़अ़त्पा काचि कामुचि, अ़चुपामाचिआ म़लोचिवा मान्च़कादा, 31मोचि खामान्सिन, साकोङ्छ़ङ काधान, सोमामान्तुक्कादा खोन्कि सोमाऩतुक्निन्ओ म़मु। 32ओवाको काचि कामुचि स़मा खान्तुचि निकिना निनाम्हाङ्ओ अ़चुसाम्योक्मि य़ङ्हुप मोचिआ अ़सिन्याङ। खोन्नुछाङ, मोचिआ ओ काचिचि मुमा ओन्ङा माआङ, मेन मोवाको काचिचि मुमा राक नि म़नाचिछाङ म़प़चि।
Currently Selected:
रोमि 1: bap
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.