Suu 31
31
Kii a doroon
1Boon kɛn man Masan kii Lemuweli a da ǹ boon lɛa ǹ dan n daraa a ganaa. 2N too kɔ maa nɛ,
nsɛ mɛn bɛ́ má n yɛ má n da kanaa,
nsɛ mɛn bɛ́ ma goã n yii diɛ n la.
3Maa nɛ,
n nyan toa lɔn nə n pàã nya wa.
Lɔn mɛnɛn bɛ́ kiin papaɛ̃,
n nyan toa bɛn nə n yiri si wa.
4Duvɛ̃ ba siĩn kii wɔ lɛa wa.
Yɔ kaka a siĩn kiãn wɔ lɛa wa.
5Bɛ̀ ǹ nə́ mi,
ǹ yiri n boe ka dí-pɛn nɛ,
ǹ ba kiri pepere we
doobaan nɛ wa.
6Min mɛn bɛ́ re giɛ̃,
ka yɔ kaka kɔ bɛ la,
hinlaa min mɛn yɔrɔ bɛ́ kɔsiɛ nɛ,
ka duvɛ̃ kɔ bɛ la.
7Bɛ̀ á mi, a yiri á re boe
ka a doobaabaa nɛ,
a yiri a re gisiĩ a koe kɛ-n doo wa.
8Min mɛnɛn doamaa bɛ́ a bie
ka boo diɛ-n wa,
n lɛ bũ n boo da bɛn lɛa.
Ǹ nə n la bɔ min mɛn
tumaa ganaa,
bɛn boo gii da.
9N lɛ bũ n kiri kuru ka
peperebaa nɛ.
Boo da nɔmaa-wɔlen
laanka doobaan lɛa.
Lɔ foo taãnaa a giã ǹ gɔn
10Lɔ mɛn foo bɛ́ tã,
die n die bɛ yii?
A barka la nyaǹ mànan manɛ.
11Ǹ zuũ foo n doa nɛ
a ganaa taãn-taãnɛ.
Ǹ zuũ á re doobaa biɛ duduu wa.
12A n sii bǐɛ̃ zɛnɛɛ nɛ
a yiikoonaabaa gɔ́ɔ̃ nɛ baraabaraa.
A baraa zɛnɛɛ-n duduu wa.
13A n giɛ sère ka li
ka gɛ̀sɛ sonbore ne,
a n dí nyɛɛ ka a gɔn nɛ parsiini.
14Ká pii kɔ ǹ mu la ǹ goo bɛ́ lɔn,
a n boe ka a màn-bii-n wɔlɔ
sɔsɔɔ nɛ a n die ne.
15A n yui bɛ̀ wɔlɔ á tɔn tì,
a màn-bii zɛnaa a kion
minin wɔ lɛa,
a dí kɔ a dí-nyalin la.
16A n taasiɛ we, a wuru pii.
A bɛ́ wɔrɔ mɛn yii,
a n da wuru boe ne.
17A n dí nyɛɛ ka foo tãbaa nɛ.
A giɛ̃ tán kooro mà a na a dí nyɛɛ wa.
18A yii na a siin tumaa ganaa yɔrɔ yii.
A bolon nə kuĩ a làan kɔ.
19A n koára miɛ̃ taãn-taãnɛ,
a gɔnɔn man mɔnaa tiɛ̃.
20A nə n doe nɔmaa-wɔlen lɛ,
a n doobaan goe.
21A nyɛ́ɛ biɛ nyan nɛ
a sumu minin lɛa wa.
A giala mɔnaa sonboren tá
ǹ tumaa lon.
22A n kɔmalɛn tiɛ̃,
a dɔnkɛn man gɛsɛ bisin
tã sonbore lɛa.
23Ǹ zuũ n kiã lɛa, a yii n guguru.
A n woe kiwi lɛa
min golen lɛsɔkɔn bǎã nɛ.
24A n mɔnaa nimi, a tá siɛ̃.
A n maabɛlɛn zɛnɛɛ,
a nə́ ǹ siɛ̃ pii-kɔlen la.
25Pàã laanka tɔ bɔ n nyaǹ
màn lɛa a ganaa.
A n giɛ biɛ̃ ǹ ganaa,
a foo n doa nɛ.
26A n boo diɛ ka sii-doɛ̃ nɛ,
a n doroo koe ka foo basiɛ̃ nɛ.
27Sii mɛn tumaa
bɛ́ n zɛnɛɛ a kion,
a n giɛ bɛ walan.
A nə n piɛ̃ ka gɔnɔn kaa
ma kolo-n ne.
28A nɛnyaanan man a
laakalɛɛ min tumaa yɔrɔ-a,
ǹ zuũ dɔ na a tɔ boe:
29«Lɔ gigiã foo á tã,
sɛnɛ nsɛ la ǹ tumaa nɛ.»
30Siĩnbaa n min siɛ̃,
a beleboe wa.
Lɔ mɛn bɛ́ Dɛnaa Lawa guguru koe,
bɛ dinsɔɔ̃ na á kɔnbɔ ka tɔ bɔ nɛ.
31A bɛ́ sii mɛn zɛnɛɛ,
ka saraa bɛa lɛa.
Kiwi tumaa doamaa nɛ ǹ na
a tɔ bɔ a dí nyɛɛ kɛ a lɛa.
Currently Selected:
Suu 31: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
