BLS 1
1
Sii dii kɔn ba kanaa wa
1Sii-dɔ̃li ke Davida a nɛgiĩ lɛa, kii lɛa Zeruzalɛmu kiwi, bɛa da ǹ boon man ka kɛn nɛ. 2A na á pɛ kɛnɛn:
A giala din na a banban.
Sii woo sii,
a giala din na a banban.
3Minbuiin nɛ bɛ́ dí kaka mɛn tumaa nyɛɛ kanaa kɛ nɛ,
a n wàa là yii a nɛ?
4Minin manə n boe ǹ wasa nɛ,
kɔsɔn nə daa.
Sɛnɛ, tán na a din lɛa miɛ̃, duduu.
5Wasa n boe,
wasa nə n yii siɛ̃.
A nə n nanaɛ bɛ̀ a wo a bɔ ǹ bǎã-n doo.
6Piɛ̃ n boe a wo gusin a lɛ̀gɔn li,
a n pɛnɛ a wo gɔsɛ a lɛ̀gɔn li,
a n pɛnɛ, a n pɛnɛ miɛ̃,
a wusoo doo a kɔ a din basa goon lɛ lɛ.
7Tàn mu tumaa n baa sii woe kiɛ yìsi mu li.
Sɛnɛ yìsi mu lɛ a piɛ̃ wa.
Tàn mu bɛ́ baa sii woe bǎã mɛn li,
maǹ baa la miɛ̃ woe walan li.
8Màn din tumaa n dí nyɛɛ,
minbuiin nɛ ba boe a pɛ la wa.
Ga ba yii nàn boe wa.
Too bɛ́ màn mɛn miɛ̃,
bɛa piɛ̃ wa.
9Màn mɛn nə goã a tan,
bɛ lɛ n die goɛ̃.
Sii mɛn nə goã á n zɛnaa,
bɛ lɛ n die n zɛnɛɛ.
Sii dii kɔn ba kanaa kɛ-n wa.
10Ta màn tan,
min nə́ boe la a boo da a wɔ paǹ li,
mà ǹ ga kɛ ganaa,
mà màn dii ni,
bɛa màn kɛ lɛ goã a tan haalɛ bibi,
bɛ̀ wɔ tɔn yɛ wa.
11Siin mɛnɛn nə kiɛ̃,
yiri ba goɛ̃ ǹ nɛ wa.
A din yɔrɔ goon lɛ la,
siin mɛnɛn bɛ́ re n zɛnɛɛ,
min mɛnɛn bɛ́ kio die,
bɛn dɔn yiri ba re goɛ̃ ǹ nɛ wa.
Minbuiin nɛ a sii-doɛ̃ ba foo nyɛɛ wa
12Masɛ din sii-dɔ̃li, má kii baa Izirayeli gána mìi la, Zeruzalɛmu kiwi.
13Sii mɛn tumaa bɛ́ n zɛnɛɛ kanaa kɛ nɛ,
má da ma foo ne,
má bɛ yii gɔsɛ ka sii-doɛ̃ nɛ,
máa ma a giala ma:
dí kaka n ka kɛ nɛ,
Lawa da minbuiin nɛ mìi ni.
14Dí mɛn tumaa bɛ́ n nyɛɛ kanaa,
má a yii yɛ.
Sɛnɛ, á ke bɛ kɔn giala banban,
a n ka min nə piɛ̃ lui.
15Màn mɛn bɛ́ pusii ni,
bɛ ba boe la a n tele wa.
Màn mɛn bɛ́ a banban,
bɛ ba boe la a n nimi wa.
16 # Kiin1 4.29-31 Má pɛ ma din gɔ́ɔ̃-n máa:
á ke, má màn gole baa,
min mɛnɛn tumaa Zeruzalɛmu a kii baa ma nyɛɛnɛ,
maa sii-doɛ̃ la bɛn wɔ nɛ.
Má sii-doɛ̃ gole yɛ, ka doɛ̃ nɛ.
17Má da ma foo ne,
máa ma yii dɔ sii-doɛ̃ laanka doɛ̃ gɔ́ɔ̃ nɛ,
baãnaabaa laanka gàãnaabaa nɛ.
Sɛnɛ má yɛ,
bɛ dɔ n piɛ̃ loo lɛa.
18A giala,
bɛ̀ sii-doɛ̃ gole tá n lon,
n taasiɛ dɔ n mɔnɛɛ.
Bɛ̀ ń màn da n doɛ̃ li,
màn nə miɛ̃ n nɔmaa dɔ li.
Currently Selected:
BLS 1: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
