Suu 3

Sii-doɛ̃ n yii lɔn?

1Maa nɛ, n yiri nyan bɔ ka maa daraan lɛn nɛ wa. Maa dí-pɛn lɛn tamaa n foo ne. 2Ka bɛ nɛ, n yii á re goɛ̃ koo, n tá re nyin sasa yii, ka là nyantoro ne. 3Toa n min sonborebaa, n bɔlɔgoondɛnaa baa baraabaraa. N paraa bɛa sɔ̀nɔn lɛn ganaa, n nə ǹ tamaa n foo ne. 4#Luk 2.52 N sii á re kɔɔ̃n koe Lawa ganaa, ka minbuiinin ni. N sii á re bǐɛ̃ koe. 5N nyan nə n foo doa n din yiri ganaa wa. N foo doa Dɛnaa Lawa ganaa parsiini. 6N sii zɛnaan tumaa gɔ́ɔ̃ nɛ, toa n na a din dɔ̃, á re n nyɛɛnaan boe. 7#Rɔm 12.16 N nyan taasɛ mà nsɛ n yiridɛnaa lɛa wa. Sɛnɛ, nyɛ́ɛ baa Dɛnaa Lawa yii ni, n nə n wɔlɔ lui sii baraa ganaa. 8Bɛ á re kakabaa koe n la, a pàã kɔ n la. 9Dɛnaa Lawa tɔ bɔ ka n gɔn mànan nɛ, n nə n kaa-piɛ màn bibinaa kɔ la. 10Bɛa biikoo li kəni, n dɔǹɔn tá re piɛ̃, n duvɛ̃ tamaa ǹ bǎã á re nyaabiɛ. 11#Zɔb 5.17#Ebr 12.5-6 Maa nɛ, n nyan nə n piã ka Dɛnaa Lawa a gɔn waa ǹ boon ne wa. N nyan nə n la bɔ ǹ ganaa wa. 12#SNS 3.19 Sonbore, Dɛnaa Lawa bɛ́ min mɛn narɛ, a n bɛa dɛnaa doree ka díi bɛ́ a foo nɛ doree lɔn.

Sii-doɛ̃ n foo kɔɔ̃n koe

13Bɛ̀ min mɛn sii-doɛ̃ yɛ, ka yiridɛnaabaa nɛ, a na á foo kɔɔ̃nbaa yɛ. 14Sii-doɛ̃ á soɛ wɔrɔdɛnaabaa nɛ. A là á liɛ nɛ sana wɔ nɛ. 15Sii-doɛ̃ giɔ̀mɔ á kaka á la nyaǹ màn tumaa nɛ. Á soɛ màn kɛ tumaa nɛ wɔ n giɛ li. 16A n nyin sasa koe minbuiinin la, naforo ne ka tɔ golebaa nɛ. 17A nə ǹ kiɛ zii sonbore la, ǹ nə́ tɔ we la ka yii-nyɛɛ nɛ. 18Sii-doɛ̃ lɛ n ka yiikoonaabaa ǹ da bɛ́ lɔn. A bɛ́ min mɛnɛn gɔn, ǹ yii n nyɛɛ nɛ. 19Dɛnaa Lawa na á lon zɛnaa ka a Sii-doɛ̃ nɛ, á lon koa ka a yiridɛnaabaa nɛ. 20A sii-doɛ̃ taman yii, tán giulun mu n piã woɛ̃, là baran nə́ toɛ là n kiɛ.

Dɛnaa Lawa n sii-dɔ̃li tamɛɛ

21Maa nɛ, n gɔn paraa yiridɛnaabaa laanka sii bɔkɔnlɛ ganaa. N nyan nə n na ǹ ganaa duduu wa. 22Ǹ tá re yii-nyɛɛ koe n la. 23Ka bɛ-n kəni, n tá re tɔ we n foo n doa nɛ, n gòã ná a talɛɛ wa. 24Bɛ̀ n waa, n gɔ̀nɔn ba re bìn diɛ nyɛ́ɛ gunun wa. N tá re nyuù kɔɔ̃n we n waa ǹ piì la. 25Nyɛ́ɛ a re kirii n la tán bǎã goon ne wa. Min baraan ba re yui n gialaa wa. 26A giala, Dɛnaa Lawa á re n tamɛɛ, á re n kanbiɛ kan ganaa.

Giã ǹ gɔn sonbore

27Min mɛn laadoo bɛ́ dɔmalɛ ganaa, bɛ̀ n tá boe la, n dɔ lɛ, n nyan nə n piã wa. 28N nyan pɛ n miã nɛ: «Woo! Biɛ̃ n wusoo n daa ma kɔ n la.» A da yaa dɔn màn tá n gɔn n nə boe la n kɔ la. 29N giaára mɛn bɛ́ n li a foo n doa nɛ n ganaa, n nyan sii bɔbɔnɛɛ kɔn taasɛ n doa a ganaa wa. 30N nyan toa n zia da ka min ni kooro, bɛ̀ a ná a baraa zɛnaa n nɛ wa. 31N nyan toa n foo wuu pɛ min kakaarɛ li wa. N nyan a giã ǹ gɔn lɛn zɔɔ̃ wa. 32Min kɔkɔrɔn tìĩ n boe ne Dɛnaa Lawa nyin ni, sɛnɛ, min peperen giaára nɛ. 33Dɛnaa Lawa nə n liɛ min baraan kion li, sɛnɛ a n barka diɛ min sonboren kion ganaa. 34#Zaaki 4.6; Piɛ1 5.5 Dɛnaa Lawa nə n foo nyɛɛ din koa wolen mala, sɛnɛ a na a sonborebaa nyɛɛ din gisiĩ wolen manɛ. 35Gugurubaa n die goɛ̃ sii-dɔ̃li-n wɔ lɛa, sɛnɛ, baãnaan wɔ n ka sìi ni.

Currently Selected:

Suu 3: SBPE2011

Highlight

Copy

Compare