Suu 24
24
Doɛ̃ wolen boo kɔsɔn
1N nyan toa n foo wuu pɛ
min baraan li wa.
N nyan koa kunun ǹ ni wa.
2Ǹ taasiɛ n doa nɛ basaã ganaa.
Ǹ bɛ́ re sii baraa mɛn zɛnɛɛ,
ǹ lɛ n bɛ dinsɔɔ̃ boo diɛ.
3Dí doɛ̃ n toɛ min kion dɔ,
sɛnɛ, yiridɛnaabaa n toɛ
a goã gengeren.
4Sii-doɛ̃ dɔ n toɛ kion pã
ka màn sonbore giɔ̀mɔ kakaan nɛ.
5Pàã n sii-dɔ̃li lon.
Bɛ̀ doɛ̃ wole ne,
màn nə wusii miɛ̃ a pàã li.
6Bɛ̀ n tá woe zia la,
n taasɛ taãn-taãnɛ.
Doroo wole gigiã n gɔ̀lɔ̀baa koe.
7Yiriwɛɛnaa a boe la
a sii-dɔ̃li baa wa.
Bɛ lɛ nɛ, bɛ̀ ǹ tá kiwi a sii
yɔrɔ boe, a n lɛ tã.
8Min mɛn bɛ́ sii baraa
taasɛ a yiri ni,
bɛ lɛ n min baraa lɛa.
9Yiriwɛɛnaa a taasiɛ tumaa n
doa nɛ sii baraa ganaa.
Min mɛn bɛ́ yaa we
sii tumaa ganaa,
a tìĩ boemaa-n min tumaa nɛ.
10Bɛ̀ n yalaa foo ziziɛ̃ gole pinaa,
ń pàã na a tɛ wa.
11Ǹ bɛ́ woe min mɛnɛn dii koe la,
ń doa n nə ǹ kirisibaa.
Ǹ si n nə ǹ kaa,
ǹsɛn mɛnɛn bɛ́ tatalɛɛ woe
n bɔlɔ kuru ǹ bǎã nɛ.
12Kɔntan n tá re pii mà n ba
sii kɔn siére-a wa.
Sɛnɛ, min mɛn bɛ́ sii tumaa doɛ̃,
bɛ á doɛ̃.
A n giɛ n ganaa,
á re didie sarɛɛ a kɔnpɛ
ka a zɛnaa ǹ siin ni.
13Maa nɛ, zoo nyɔɔ bii, a n kɔɔ̃nɛ,
á re goɛ̃ nɔɔnɔɔ n lɛ-n.
14A din yii goon ne ka sii-doɛ̃ nɛ,
n doamaa nɛ n dɔ̃.
Bɛ̀ n bɛ yɛ, n biɛ̃ ǹ tá re bǐɛ̃ koe,
n foo sii a re ziziɛ̃ wa.
15Min baraa,
n nyan nə n gɔn da
sii sonbore zɛnaa wole a kion ganaa wa.
N nyan nə n zɔɔ̃ a giã ǹ bǎã
kokoo li wa,
16a giala min mɛn bɛ́
sii sonbore zɛnɛɛ,
ta a na á mɛnaa gunyin sɔbaa,
a n wusii a yoo.
Sɛnɛ, min mɛn bɛ́ sii baraa zɛnɛɛ,
koe n die boe bɛ ganaa.
17Bɛ̀ n zɔ́ɔ bɔ á mɛnaa,
n nyan nə n nyɛnyɛɛ wa.
Bɛ̀ á n gòã na,
n nyan bɛ̀ baa ka foo kɔɔ̃n nɛ wa.
18Bɛ bie wa,
bɛ̀ Dɛnaa Lawa bɛ yɛ,
a kɔɔ̃n koe a ganaa wa.
A bɛ́ re dɔlɔ mɛn boe
n zɔ́ɔ lɛ ganaa,
a n bɛ lɛ diɛ.
19N nyan toa n foo yoo
sii baraa zɛnaa wole li wa.
N foo nyan wuu pɛ
min bɔnɛɛ li wa.
20Min mɛnɛn bɛ́ sii baraa zɛnɛɛ,
ǹ biɛ̃ n banban.
Min bɔnɛɛn yiikoonaabaa n ka
bolon tɛ bɛ́ lɔn nimi.
21Maa nɛ,
Dɛnaa Lawa laanka kii guguru kɔ.
Min mɛnɛn bɛ́ zoɛ̃ mà ǹ sii
tumaa bɔyaa,
n nyan koa kunun ǹ ni wa.
22A giala,
koe á boe la a bɔ ǹ ganaa
bǎã goon ne.
Dɛnaa Lawa laanka kii bɛ́ re
koe mɛn boe ǹ gogoonmaa ganaa,
ǹ ba bɛ doɛ̃ wa.
Sii-dɔ̃lin doroo kɔsɔn
23Sii-dɔ̃lin nə boo mɛn da doo,
bɛ á ke:
Bɛ̀ ń tá kiri we,
a siĩni n bɔnbii-a wɔ
minin bii wa.
24Bɛ̀ kiri-kuruli pɛ zɛ̀rɛdɛnaa nɛ:
«Zɛ̀rɛ ba n ganaa wa,»
bɛa kiri-kuruli lɛ tìĩ
á re boe zaman tumaa nɛ.
25Kiri-kurulin mɛnɛn bɛ́ re
bɛa kiri kɔkɔrɔ lɛ we,
là nyantoro laanka
gugurubaa n bɛn wɔ lɛa.
26Boo lɛ si ka gɔ́ɔ̃ fubaa n
giaárabaa taãn giala pii.
27N dí gɔn nyɔmɔɔ kanaa,
n wuru yɔrɔ bɔ,
bɛ kio, ń tá boe la n nə n kion dɔ.
28N nyan nə n miã zɛ̀rɛ baa
mìi na a ba la wa.
Soɛ bɔ sii ni n ganaa?
29N nyan pɛ:
«A zɛnaa ma-n lɔn ke,
ma dɔ n die zɛnɛɛ-n miɛ̃.
A sii mɛn zɛnaa ma nɛ,
man die bɛ lɛ miã sarɛɛ la.»
Yoonaa a giã ǹ gɔn
30Má bɔ kunun yoonaa a wuru li,
má bɔ kunu baãnaa a rezɛ̃ wuru li.
31Á ke, nyan da n pɛnɛɛ nɛ
a tumaa ganaa.
A kungɔn mɛn dɔ ka kɔlɔ nɛ,
bɛ́ kaa.
32Bɛa siin lɛn má ǹ yɛ,
má taasiɛ wɔ ǹ ganaa,
má doroo goon gũ ma yiri ni:
33 #
Suu 6.10-11
Nyuù boɛɛn wɔ,
n nə n yii kɔ kɔnlɛ boɛɛnɛ,
n nə n bɔ kɔn tán boɛɛnɛ,
n nə n gɔnɔn kaa n kolo-n.
34Bɛa biikoo li,
doobaabaa n die n tɔwɛɛ
ka wurumu bɛ́ lɔn,
nɔmaa n die n koe n lɛ
ka zia-baali bɛ́ lɔn.
Currently Selected:
Suu 24: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
