Suu 21
21
1Kii foo n mu zii lɛa
Dɛnaa Lawa gɔn.
Bǎã mɛn bɛ́ kɔɔ̃n a ganaa,
a na a yɔrɔ diɛ walan.
2Minbuiin nɛ a sii zɛnaan
tumaa n pepere a din yii li.
Sɛnɛ, Dɛnaa Lawa dinsɔɔ̃ n gɔ́ɔ̃ doɛ̃.
3Giã ǹ gɔn sonbore,
a n pepere,
á kiɛ Dɛnaa Lawa foo la
á la *wúlu màn nɛ.
4Ga ka yɔrɔ baraa nɛ,
ka din gole kɔ nɛ,
bɛ n min baraan sii baraa
giala pii.
5Min mɛn bɛ́ taasiɛ we
sii ganaa bɛ̀ a tɔn zɛnaa,
bɛ n pàãma biɛ.
6Min mɛn bɛ́ sii zɛnɛɛ fufuu
a foo na á kuĩ wa,
bɛ lɛ n die doobaa biɛ.
7Min baraan
kakaarɛbaa nə ǹ papaɛ̃,
a giala maǹ nə n piɛ̃
ka peperebaa nɛ.
8Gɛ̀-dɛli a giã ǹ gɔn nə kɔkɔrɔ.
Sɛnɛ, min pepere a sii
zɛnaa n pepere.
9Giã kanaa á soɛ giã kion goon ne
kun ka lɔ zia-dali ni.
10Min baraa a sii tumaa n
doa nɛ baraa zɛnaa ganaa.
Haalɛ a giaára din
makara a boe a ganaa wa.
11Bɛ̀ n dɔlɔ bɔ yaa wɔ minin ganaa wole ganaa,
bɛ n yiri koe baãnaa la.
Bɛ̀ n sii-dɔ̃li daraa,
bɛ n yiri koe la.
12Lawa sonbore lɛ yii n doa-n
min baraan kion la,
a nə́ ǹ noɛ̃ ǹ kiɛ koe ne.
13Min mɛn bɛ́ n too tiɛ̃
pàãwɛɛnaa a lɛ dɛ ganaa,
a dɔ á re gu diɛ,
min ná a ba n nyiĩ la wa.
14Bǐɛ̃baa min ni ka durii ni,
bɛ n foo wɛɛ.
A da a zéwo-n ka durii-n
na a kakaarɛbaa tɛ nimi.
15Kɔ dí-pɛn lɛ n foo kɔɔ̃n lɛa
sii bǐɛ̃-zɛnaalin gɔn,
sɛnɛ, a n sii baraa-zɛnaali nyín soe.
16Min mɛn bɛ́ á koe
zii pepere lɛ wa,
bɛ á re woe n susui fufuu
kun ka geren ne.
17Foo sii bɛ́ kɔɔ̃n min mɛn ganaa,
á re goɛ̃ doobaa lɛa duduu.
Min mɛn bɛ́ mi ǹ màn narɛ
ka màn-bii kɔɔ̃n nɛ,
bɛa naforo yii wa.
18Min baraan man die giɔ̀mɔ
saraa ǹ màn biɛ min sonboren lɛa,
soɛ-bɔlen man die
min peperen wɔ biɛ.
19Bɛ̀ n giã diə gole ne, á soɛ
n giã kion kun ka
lɔ baraa zia dali ni.
20Sii-dɔ̃li a kion,
gɔn màn sonbore ka
nyɔɔ gigiã tan,
sɛnɛ baãnaa sɛ ná a wɔ yii ziziɛ̃.
21Min mɛn bɛ́ giɛ peperebaa li
ka sonborebaa nɛ,
bɛ á re nyin sasa yii,
peperebaa ka gugurubaa nɛ.
22Zia-baali kakan bɛ́
kiwi mɛn lɛduĩ,
sii-dɔ̃li n bɛ sii.
Kungɔnɔn mɛnɛn bɛ́
ǹ foo n doa nɛ ǹ ganaa,
a n bɛn noɛ̃ a ǹ kaa.
23Bɛ̀ min mɛn boo
a lɛ laanka a lɛwɔn la,
a nə n din tamɛɛ koe ganaa.
24Min mɛn bɛ́ n din koɛ
a n gasɛ we ǹ miãn-a,
a n yaa wɔ minin ganaa wole lɛa.
A din gole kɔ la yii ni
a sii zɛnaan tumaa gɔ́ɔ̃ nɛ.
25Yoonaa foo sii n woe-n
gɛ̀ ganaa,
a giala a nə n piɛ̃ ka dí ni.
26Baraabaraa, a foo n wuu pii,
sɛnɛ, min sonbore n bǐɛ̃ biɛ
a ná a nɔmɛɛ wa.
27Min baraan wúlu màn nə
màn bɔnɛɛ lɛa,
sanparɛ bɛ́ ǹ nə́ zɛnaa
ka gɔ́ɔ̃ tìbaa nɛ.
28Siére baraa-pɛli á re giɛ̃.
Sɛnɛ, min mɛn bɛ́ n too koe doɛ̃,
bɛ n boo giala yii biikoo yii li.
29Min baraa nə n din biɛ
sii doɛ̃ wole lɛa.
Min pepere a sii zɛnaan
gòãn we tán.
30Minbuiin nɛ a sii-doɛ̃,
a yiridɛnaabaa,
ka a taasiɛn ba màn kɔn lɛa
Dɛnaa Lawa yɔrɔ-a wa.
31Maǹ sùin yɔrɔ boe
ziabaa pinaa a lɛa.
Sɛnɛ, Dɛnaa Lawa din nə
gɔ̀lɔ̀baa koe.
Currently Selected:
Suu 21: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
