Suu 15
15
1Lɛ si ka bɔlɔ kɔɔ̃n nɛ n foo wɛɛ.
Sɛnɛ, boo baraa n foo diɛ
yoo ganaa.
2Bɛ̀ sii-dɔ̃li á boo diɛ,
daraa sii nə n kuĩ.
Sɛnɛ, bɛ̀ yiriwɛɛnaa nə n lɛ bũ,
boo kooron manɛ á diɛ.
3Dɛnaa Lawa yii n bǎã tumaa nɛ,
a yii n min baraan ganaa
ka min sonboren ne.
4Foo taã ǹ boo n ka
yiikoonaabaa da bɛ́ lɔn.
Sɛnɛ, boo baraa n foo ziziɛ̃.
5Nɛnyaan yiriwɛɛnaa laadoo
bie ka ǹ di a doroo-n wa.
Sɛnɛ ǹ mɛn bɛ́ n too koe
a gɔn waa ǹ boo li,
bɛ n sii-dɔ̃li lɛa.
6Sii sonbore-zɛnaali a kion
nə piɛ̃ ka naforo ne,
sɛnɛ, min baraa a naforo n die
ka koe ne.
7Sii-dɔ̃li lɛ n doɛ̃ pɛsɛ̃
sɛnɛ, yiriwɛɛnaa foo n màn
tɔrɔ kɔsɔ lɛa.
8Min baraan *wúlu màn
ba kɔɔ̃n Dɛnaa Lawa ganaa wa.
Sɛnɛ, min peperen
Lawa nyankɔ n kiɛ foo la.
9Min baraan giã ǹ gɔn
ba Lawa foo sii wa,
sɛnɛ, min mɛn bɛ́ zoɛ̃ bǐɛ̃ zɛnaa li,
bɛ n kɔɔ̃n Dɛnaa Lawa ganaa.
10Min mɛn bɛ́ zii
sonbore toɛ walan,
bɛ wɔ n ka dɔlɔ baraa nɛ.
Min mɛn bɛ n piɛ̃
ka gɔn waa ma-n nɛ,
bɛ á re giɛ̃.
11Dɛnaa Lawa n
geren piɛ a zuzulubaa doɛ̃.
Á muibuiin nɛ foo doɛ̃ á la bɛ nɛ.
12Din koa wole a lɛ koe
gɔn waa ma-n ganaa wa.
A ba n mɔrɛ sii-dɔ̃li ganaa wa.
13Foo kɔɔ̃n nə yɔrɔ kiɛ,
sɛnɛ, foo ziziɛ̃ n yiri lɔlɛkɔn.
14Min mɛn bɛ́ taasiɛ we,
a n giɛ doɛ̃ li.
Sɛnɛ, baãnaa nə n din toe
ka sii kooron ne.
15Doobaa a lɛawaa
tumaa n baraa.
Sɛnɛ, Lawa barka da
min mɛn ganaa,
lɛawaa tumaa n zɔ́n lɛa bɛ gɔn.
16Màn boɛɛn yɛ n nə́
Lawa guguru kɔ gɔ́ɔ̃ nɛ,
bɛ á soɛ pàãmabaa nɛ
taasiɛ gɔ́ɔ̃ nɛ.
17Liɛ sɔ̃ kɔn-narɛɛ gɔ́ɔ̃ nɛ á soɛ
siĩ nyɔɔnaa soɛ̃ nɛ zɔ́ɔbaa gɔ́ɔ̃ nɛ.
18Foodɛnaa n zia yui.
Sɛnɛ, sabara-baali n zia nyɛɛ.
19Yoo-baali a zii n ka
nyan da tewon bɛ́ lɔn.
Min pepere a zii n pəmə.
20Nɛnyaan yiridɛnaa nə
ǹ di foo kɔɔ̃n koe.
Sɛnɛ, yiriwɛɛnaa nə
ǹ dan puusə koe.
21Baãnaa foo n kɔɔ̃nɛ
ka gaãnaabaa ǹ sii zɛnaa nɛ.
Sɛnɛ, min mɛn bɛ́ yiridɛnaa lɛa,
a n tɔ we zii pepere la.
22Min mɛn bɛ́ a nɔ̀n diɛ
ka doroo-n duduu wa,
a dín mɛnɛn lɛ bɔ,
bɛn man sàabiɛ.
Sɛnɛ, bɛ̀ a dorooli
wolen nə mɔnaa,
maǹ yɔrɔ yii.
23Lɛ si ǹ boo sonbore n
foo kɔɔ̃n koe.
Bɛ̀ boo nə n da á kɔnpɛ
a biikoo ne,
bɛ n sii bǐɛ̃ lɛa.
24Zii mɛn bɛ́ woe
yiikoonaabaa ganaa,
sii-dɔ̃li n koe bɛ lɛ.
Ǹ mɛn bɛ́ woe gɛ̀ ganaa,
a nə n nyɛnɛɛ bɛ nɛ.
25Dɛnaa Lawa n din
gole-kɔlen kion yui.
Sɛnɛ, a n lɔ giɔɔrɔ a wuru tamɛɛ.
26Taasiɛ baraa tìĩ n boe ne
Dɛnaa Lawa nɛ.
Sɛnɛ, boo sonboren man
kiɛ a foo la.
27Min mɛn bɛ́ baa sii wɔrɔ kio,
a n koe lɛa a kion ganaa.
Sɛnɛ, min mɛn bɛ́ a lɛ koe lɛ
pii ǹ màn ganaa wa,
á re nyin sasa yii.
28Min mɛn a zɛnaa ǹ sii bɛ́ siĩni,
a n taasiɛ we a tɔn boo da.
Sɛnɛ, min mɛn a zɛnaa ǹ sii
bɛ́ bɔnɛɛ,
a n boo basaã diɛ.
29Dɛnaa Lawa wɔlɔ n sɔsɔɔ
min baraan ganaa.
Sɛnɛ, a nə n too koe
sii sonbore-zɛnaalin nyankɔ li.
30Ga ǹ gɔn sonbore n foo
kɔɔ̃n koe.
Boo kɔɔ̃n nə kakabaa koe
gɔ̀nɔn la.
31Min mɛn bɛ́ n too koe
doroon li, n doe min lɛ,
bɛa dɛnaa á re goɛ̃ kun
sii-dɔ̃lin ni.
32Min mɛn bɛ́ n piɛ̃
ka gɔn waa ma-n nɛ,
a nə n din puusə koe.
Sɛnɛ, min mɛn bɛ́ lɛ koe
doroon ganaa,
bɛa dɛnaa n sii-dɔ̃li biɛ.
33Nyɛ́ɛbaa Dɛnaa Lawa yii ni n
min darɛɛ sii-doɛ̃ ganaa.
Bɛ̀ n tá zoɛ̃ yii gugurubaa li,
yǎa n nə n din boɛɛn koe.
Currently Selected:
Suu 15: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
