Suu 14
14
1Lɔ sii-dɔ̃li na a kion koɛ.
Lɔ yiriwɛɛnaa na a kion yui.
2Min mɛn a
yiikoonaabaa bɛ́ pepere,
bɛ n nyɛ́ɛbiɛ Dɛnaa Lawa yii ni.
Sɛnɛ, min mɛn a giã ǹ gɔn
bɛ́ kɔkɔrɔ,
bɛ n pɔpɔsɛ.
3Din gole kɔ n buũ koe
baãnaa lɛ-n.
Sɛnɛ, sii-dɔ̃li
lɛ gɔ́ɔ̃ ǹ boo n tamɛɛ.
4Buu kɔsɔ ǹ diin bɛ́ ǹ ba
min mɛn lɔn wa,
kaa-piɛ waáraa,
a màn kɔn yii wa.
Sɛnɛ, tɔɔ sonboren bɛ́
min mɛn lon,
a n màn gigiã yii.
5Siére sonbore-pɛli a min siɛ̃ wa.
Sɛnɛ, siére baraa-pɛli
n soɛ dinsɔɔ̃ boe.
6Min mɛn bɛ́ yaa woe
ǹ miãn ganaa,
tà a n giɛ sii-doɛ̃ li, a yii wa.
Sɛnɛ, yiridɛnaa n sii-dɔ̃li gole biɛ.
7N wɔlɔ lui baãnaa ganaa.
A giala,
n ba re sii-doɛ̃ boo kɔn
miɛ̃ a lɛ-n wa.
8Min mɛn bɛ́ boe a din la,
a nə n yiri koɛ a din a
zɛnaa ǹ sii li,
sii-dɔ̃li ni.
Min mɛn yiri bɛ́ á nyaabaa,
a nə́ ǹ miãn siɛ̃.
Baãnaa nɛ.
9Yiriwɛɛnaan man taasɛ
mà gòã kuĩ là banban.
Sɛnɛ min peperen man kɔn miɛ
ǹ dinin bii.
10Bɛ̀ min foo ziziɛ̃,
a dinsɔɔ̃ na a foo busii doɛ̃.
Bɛ̀ a foo á kɔɔ̃nɛ,
min kɔn ba bɛa foo kɔɔ̃n
lɛ gii kɔn nɛ wa.
11Maǹ min bɔnɛɛ a kion yui.
Sɛnɛ, màn nə miɛ
min peperen wɔ li.
12 #
Suu 16.25
Min tá boe la a taasɛ
mà asɛ a giã ǹ gɔn tá siĩni
a da yaa dɔn,
a woe-n geren piɛ.
13Ń tá boe la n yaa wɔ
n foo n busi dɔn.
Foo kɔɔ̃nbaa dɔ á boe la
a n giala nyɔmɔɔ ka foo ziziɛ̃ nɛ.
14Min mɛn bɛ́ a yiikoonaabaa zɛnɛɛ
a din mìi gialaa,
a bɛ́ kɔnboe ka màn mɛn nɛ,
á re bɛ yii.
Min mɛn a giã ǹ gɔn bɛ́ siĩni,
bɛa sii á re bǐɛ̃ koe.
15Ń bɛ́ boo mɛn tumaa diɛ
yiriwɛɛnaa nɛ,
a n gole li.
Sɛnɛ, min mɛn bɛ́ boe a din la
bɛ nə n taasɛ bɔrɔ.
16Sii-dɔ̃li n nyɛ́ɛ biɛ sii baraa nɛ
a nə́ n nyɛnɛɛ nɛ.
Sɛnɛ, baãnaa n woe nyɛɛnɛ,
a n waa nɛ a din la.
17Min mɛn foo bɛ́ yui fufuu,
a n sii kooron zɛnɛɛ.
Min mɛn bɛ́ n din biɛ
yiridɛnaa lɛa,
a nə n din tìĩ boe.
18Gàãn nə yiriwɛɛnaan wɔ gii lɛa.
Sɛnɛ, min mɛnɛn bɛ́ taasiɛ we,
bɛn tá re yiridɛnan biɛ.
19Min baraan tá re n
dinin boɛɛn koe
min sonboren yɔrɔ-a.
Min baraan tá re n naɛ
min sonboren kiɛnlɛ-a.
20Doobaa tìĩ n boe ne,
haalɛ a din miãn li.
Pàãma a giaára n mɔnaa nɛ.
21Min mɛn bɛ́ ǹ miãn pɔpɔsɛ,
a n sii baraa zɛnɛɛ.
Min mɛn bɛ́ din boɛɛn kɔ
wolen tá kɔɔ̃n a ganaa,
bɛ n min foo kɔɔ̃naa lɛa.
22Min mɛnɛn bɛ́
taasiɛ bɔnɛɛ nə́ ǹ yiri ni,
ǹ nə́ sã ǹ zii ganaa.
Min mɛnɛn bɛ́
taasiɛ sonbore we,
ǹ saraa n sonborebaa
laanka bɔlɔgoondɛnaabaa nɛ.
23Min mɛn bɛ́ dí nyɛɛ parsiini,
a na a là yii.
Sɛnɛ, min mɛn bɛ́ ń parɛɛ
boo kooro diɛ ganaa,
a n die goɛ̃ doobaa lɛa duduu.
24Pàãmabaa n sii-dɔ̃lin saraa lɛa.
Baãnaa wɔ n ka gàãn nɛ.
25Siére-pɛli mɛn bɛ́ sonbore pii,
a n minin kirisibiɛ.
Sɛnɛ soɛ-bɔli nə ǹ miãn siɛ̃.
26Min mɛn bɛ́
Dɛnaa Lawa guguru koe,
a yiri n bǎã goon ne.
A giala,
Dɛnaa Lawa
na a nɛnyaanan tamɛɛ.
27Dɛnaa Lawa guguru kɔ n
yiikoonaabaa ǹ mu yala lɛa.
A nə n kanbiɛ
gɛ̀ dɛ ǹ kanan ganaa.
28Kii a zaman a gigiãbaa
na a tɔ boe.
Sɛnɛ, gána a zaman a kiɛɛrɛ kɔ
na a mɛnaa giala pii.
29Min mɛn bɛ́ boe a din foo la,
bɛ n yiridɛnaa lɛa taãn-taãnɛ.
Sɛnɛ min mɛn foo bɛ́ a gole
yoo-n wa,
a siɛ̃ yii n fuu.
30Yiri mɛn bɛ́ waa nɛ,
bɛ n là nyantoro koe.
Sɛnɛ foo wuu pɛ n tɛ lɛa min kuĩ.
31Min mɛn bɛ́ mɛnɛɛ doobaa la,
a n sɔ koe a zɛnaali ganaa.
Sɛnɛ, doobaa makara bɛ́ boe
min mɛn ganaa,
bɛ n gugurubaa koe la.
32Min baraa a baraabaa
nə n bɔyɛɛ a kirəə a din la.
Sɛnɛ, ta gɛ̀ biikoo ne,
min pepere foo n doa nɛ.
33Min mɛn bɛ́ taasiɛ sonbore we,
sii-dɔ̃li ni.
Sɛnɛ, baãnaan tá bɛ doɛ̃?
34Peperebaa n gána a zaman
mìi siɛ lon.
Sɛnɛ, sii baraa n tɔrɔn tumaa a
sìi lɛa.
35Dí-nyali yiridɛnaa n kɔɔ̃n
kii ganaa.
Sɛnɛ min mɛn bɛ́ sìi diɛ a ganaa,
a foo n yui bɛ li.
Currently Selected:
Suu 14: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
