Suu 11
11
1Kiri kɔkɔrɔ tìĩ n boe-n
Dɛnaa Lawa nɛ.
Sɛnɛ, a foo sii n ka kiri pepere ne.
2Din gole kɔ n die
ka din tìĩ bɔ nɛ.
Sɛnɛ, din gisiĩ n die ka sii-doɛ̃ nɛ.
3Peperebaa n tɛ fúlu lɛa
min sonbore a zii la.
Sɛnɛ bɔnɛɛbaa n min baraa dii.
4Gɛ̀ pinaa, naforo là banban.
Sɛnɛ, giã ǹ gɔn sonbore n
min sii gɛ̀ la.
5Giã ǹ gɔn sonbore n min diɛ
zii pepere la.
Sɛnɛ, baraabaa n min baraa daɛ.
6Giã ǹ gɔn sonbore n toɛ
min goã a din gɔn wìi a lɛa.
Sɛnɛ min baraan foo sii n
kan lɛa ǹ dinin ganaa.
7Min baraan man giɛ̃
ka ǹ gɔ́ɔ̃gɔ́ɔ̃ ǹ taasiɛ nɛ.
Ǹ foo bɛ́ doa-n
mànan mɛnɛn ganaa,
bɛn dɔn man bɔ̀n biɛ.
8Min sonbore n kanbiɛ fuu ganaa.
Sɛnɛ, min baraa n fuu yii a dòo.
9Min baraa nə ǹ miã ziziɛ̃
ka a lɛ nɛ.
Sɛnɛ, min sonboren sii-doɛ̃ nə
ǹ sii sii la.
10Min sonboren là nyantoro n
nyɛnyɛɛ lɛa kiwi ganaa.
Sɛnɛ, min baraan gɛ̀ n foo
kɔɔ̃n lɛa ǹ ganaa.
11Màn nə miɛ kiwi li
min peperen bǐɛ̃ taman yii.
Sɛnɛ, sii baraa-zɛnaalin man
kiwi yui ka ǹ boon ne.
12Min mɛnɛn bɛ́ ǹ miãn pɔpɔsɛ,
yiriwɛɛ nə ǹ ganaa.
Yiridɛnaa nə n lɛ tiɛ̃.
13Min mɛn bɛ́ soɛ diɛ ǹ miãn la,
a n sii durii dɔ pii.
Sɛnɛ, min mɛn bɛ́ yiridɛnaa lɛa,
a ba boo diɛ wa.
14Bɛ̀ taasiɛ sonboren ba
gána nyɛɛnaadɛnan yiri-n wa,
gána lɛ a woe nyɛɛnɛ wa.
Sɛnɛ, bɛ̀ a yiri-kɔlin tá mɔnaa nɛ,
a n gɔ̀lɔ̀baa yii.
15Bɛ̀ n yɔrɔ dɔn bii min la
n nə n ba ǹ dɛnaa doɛ̃ wa,
n wɔ n ka yirilɔlɔ kɔn nɛ.
Min mɛn bɛ́ a ba n sii we bɛ miã-n wa,
á re goɛ̃ yii-nyɛɛ la.
16Lɔ siĩn nə yii gugurubaa yii.
Min kaka n naforo yii.
17Min mɛn bɛ́ bǐɛ̃ zɛnɛɛ,
a n zɛnɛɛ a din ni.
Sɛnɛ, min baraa n koe boe
a din ganaa.
18Min mɛnɛn bɛ́ sii baraa zɛnɛɛ,
maǹ dí kooro nyɛɛ.
Sàabaa ba la wa,
bǐɛ̃-zɛnaalin man saraa
sonbore yii.
19Bɛ̀ min mɛn gole bǐɛ̃ zɛnaa li,
a yii á re goɛ̃ koo.
Min mɛn bɛ́ baa sii sii baraa kio,
bɛ n die giɛ̃.
20Min mɛnɛn gɔ́ɔ̃ bɛ́ tì,
ǹ tìĩ n boe-n Dɛnaa Lawa nɛ.
Sɛnɛ, a n min peperen narɛ.
21Sàabaa ba la wa,
sii baraa zɛnaa wole wɔ n ka
dɔlɔ nɛ.
Sɛnɛ, min mɛnɛn bɛ́
sii sonbore zɛnɛɛ,
bɛn tá re kirisibiɛ.
22Lɔ mɛn bɛ́ siĩni
sɛnɛ yiriwɛɛnaa lɛa,
bɛ na á kɔnbɔ ka birii ni
ǹ nə́ sana kaaran da a nyin ni.
23Min peperen taasiɛ n ka
sii sonbore zɛnaa nɛ.
Sɛnɛ, min baraan wɔ n ka
foo yoo ne.
24Bɛ̀ min gɔn tá siɛ parsiini,
màn nə miɛ a naforo li.
Min mɛnɛn gɔn bɛ́ kaka,
màn nə miɛ ǹ dɔn doobaabaa li.
25Min mɛn bɛ́ bǐɛ̃ biɛ,
á re bǐɛ̃ gigiã yii.
Min mɛn bɛ́ mu boro
nyɛɛ a bɔ min ganaa,
ǹ tá re a dɔ a mu boro nyɛɛ.
26Min mɛn bɛ́ a *belee toɛ koa nɛ,
zaman tá re n liɛ li.
Sɛnɛ ǹ mɛn bɛ́ soe ne á n siɛ̃,
zaman tá re Lawa bǐɛ̃ bíi li.
27Sii bǐɛ̃-zɛnaali n kɔɔ̃n
Lawa ganaa.
Sii baraa-zɛnaali tá re koe yii.
28Min mɛnɛn foo bɛ́ doa nɛ
naforo ganaa,
ǹ tá re mɛnɛɛ.
Sɛnɛ, min mɛnɛn bɛ́
sii sonbore zɛnɛɛ,
bɛn tá re gole koe ka da bɛ́ lɔn.
29Min mɛn bɛ́ a din a kion lɔlɛkɔn,
yiriwɛɛnaa nɛ.
Gàãnaa á re sii-dɔ̃li a bɛ̀rɛ biɛ.
30Min pepere a nya ǹ dín man ka
yiikoonaabaa ǹ da bɛ́ lɔn,
Sii-dɔ̃li n yiikoonaabaa koe.
31 #
Piɛ1 4.18
Min mɛnɛn bɛ́ sii sonbore zɛnɛɛ,
maǹ a saraa yii.
Min bɔnɛɛn laanka sii baraa-zɛnaalin
dɔn nə kɔn bɔ ka màn mɛn nɛ,
ǹ tá re bɛ yii.
Currently Selected:
Suu 11: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
