Suu 1
1
1 # Kiin1 4.32 Izirayelin kii Davida a nɛgiĩ Salomɔn a suusun nə́ ke.
Sɛ́wɔ lɛ mìi
2Suusun kɛn mìi n ka minin daraa sii-doɛ̃ ganaa nɛ, ka giã ǹ gɔn sonbore ne. A n doroo sonbore koe, a n toɛ n boo sonboren giala ma. 3A n toɛ wɔ yiridɛnan giã ǹ gɔn wɔ, wɔ goã pepere, wɔ dí-pɛn guguru kɔ, wɔ sonborebaa zɛnaa. 4Min mɛnɛn yiri bɛ́ kiɛɛrɛ, a n toɛ ǹ yiri goã ǹ dinin li. A n yiri koe nɛ tenən la, a toa ǹ sìi bɔkɔnlɛ dɔ̃. 5Sii-dɔ̃lin nə n too kɔ, ǹ tá re màn diɛ ǹ doɛ̃ li. Yiridɛnaan nə n too kɔ, ǹ tá re doroo sonbore yii. 6Ǹ tá re suusun tɛnɛn boo duriin giala miɛ, ka boo kakan kɛn nɛ sii-dɔ̃lin daraan gɔ́ɔ̃ nɛ. 7#Zɔb 28.28; Loe 111.10; Suu 9.10 Nyɛ́ɛbaa Dɛnaa Lawa yii ni n sii-doɛ̃ a giala kɔ ǹ bǎã lɛa. Min mɛnɛn laadoo bɛ́ a bie ka bɛa daraan laanka bɛa doroon kɛn nɛ wa, baãnaan manɛ.
Nɛ tenən doroo
8Maa nɛ, n too kɔ n di a gɔn waa ǹ boon kɛn li. N nyan nə n piã ka a doroon ne wa. 9Maǹ ka kii bafolo siĩn bɛ́ lɔn n mìi ganaa, ka bɔlɔ-a ǹ gii bɛ́ lɔn n bɔlɔ-a. 10Maa nɛ, bɛ n miã baraan tá zoɛ̃ li ǹ nə n da sii baraa nɛ, n piã. 11Ǹ tá boe la ǹ pɛ n nɛ: «Da kun ka wɔ nɛ, wɔ n die n duri wɔ minin dɛ. Wɔ n die yii tì-an tɔwɛ, wɔ dinin foo sii lɛa. 12Wɔ n die ǹ kuĩ ǹ yii n koo, wɔ ǹ dɛ. Wɔ n die ǹ zuĩ yala-n, turuu ni. 13Wɔ á re màn giɔ̀mɔ kakaa tɔrɔ tumaa yii. Wɔ á re wɔa kion piɛ̃ ka bɛa mànan kɛn lɛn nɛ. 14Daa, n tá re n wɔ gii yii. Wɔ n die lɛ kaa kun goo koɛ.» 15Maa nɛ, n nyan wo kunun ǹ ni wa. N wɔlɔ lui ǹ zii ganaa. 16Maǹ baa sii sii baraa zɛnɛɛ, manə n nanɛɛ gɛ̀ dɛ li. 17Bɛ̀ bàan yii dɔ-dɔli yɛ, a kan kɔ nɛ là banban doo wa. 18Sɛnɛ, bɛa minin kɛn lɛn man kan koe ǹ dininmaan manɛ, maǹ kan koe ǹ dinin nyin ni. 19Taãn nɛ, á ke, min mɛnɛn bɛ́ mɛnɛɛ minin la, sii mɛn bɛ́ re ǹ yii, gɛ̀ nɛ.
Sii-doɛ̃ n lɛ diɛ kɔsɛkɔsɛ
20 #
Suu 8.1-3
Sii-dɔ̃li nə n lɛ dii zii la. Bǎã dadaran nɛ, a n boo diɛ ka lɛn gole ne. 21Zaman bɛ́ mɔnaa-n bǎã mɛn nɛ, a n lɛ diɛ walan. A n lɛ diɛ kiwi kiɛnlɛ-a. 22Baãnaan lɛn, ka n die kaa baãnaabaa lɛ narɛ yǎa biĩ kəni? Yaa wɔ minin ganaa wolen lɛn, ka n die yaa woe minin ganaa yǎa biĩ kəni? Yiriwɛɛnaan lɛn, ka n die n piɛ̃ ka sii doɛ̃-n yǎa biĩ? 23Ka n too kɔ maa doroon li. Man die ma yiri gisĩ ka la kəni, ma toa ka maa da ǹ boon dɔ̃. 24Man ka bíi we, ka lɛ n boe haayii diɛ. Ma nə n gɔn diɛ ka la, min kɔn ba diɛ sii li wa. 25Ka nə n piɛ̃ ka maa doroon ne, ka a n too koe maa gɔn waa ǹ boon li wa. 26Bɛ lɛ nɛ, kaa koe pinaa, ma á re yaa we ka ganaa. Bɛ̀ ka gɔ̀nɔn tá bìn diɛ nyɛ́ɛ gunun, ma á re ka foo siɛ. 27Hiĩ, ǹ kɔn pinaa, nyɛ́ɛ á re n doe ka bii ka piɛ̃ gole wɔ bɛ́ lɔn. Koe á re ka siɛ ka la tì gole wɔ bɛ́ lɔn. Foo biɛ na laanka foo ziziɛ̃ á re ka yii. 28Ka á re ma bíi, sɛnɛ, ma a re ka lɛ sii wa. Ka á re giɛ ma li, sɛnɛ ka a re ma yii wa. 29Bɛ n die n zɛnɛɛ a giala ka n piã ka doɛ̃ nɛ, ka n piã ka nyɛ́ɛbaa Dɛnaa Lawa yii n ni. 30Ka lɛ kɔ maa doroon ganaa wa. Ka maa gɔn waa ǹ boon kɛn kɔn da sii li wa. 31Kaa giã ǹ gɔn lɛ a siin man die kuĩ ka dinin mìi ni. Kaa sii yɔrɔ bɔn kɛn, ǹ tìĩ á re boe ka nyin ni kusikusi. 32Piã ka sii-doɛ̃ nɛ n bɔ̀n diɛ baãnaan ganaa.
Foo doa din ganaa dɔ n
gəngəə̃n wɔ ziziɛ̃.
33Sɛnɛ, bɛ̀ min mɛn nə n
too kɔ ma lon,
bɛa dɛnaa á re goɛ̃
yii-nyɛɛ gɔ́ɔ̃ nɛ,
kiĩn ni a ná a ba nyɛ́ɛ biɛ
koe-n wa.
Currently Selected:
Suu 1: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
