BPS 4
4
Ǹ nə́ Zeruzalɛmu yu
1Wui! Sana lɛ a tɛ pii doo wa.
Sana sonbore lɛ tɛ pɛ lɛ da.
Lawa a kion a kɔlɔn kɛn,
a n siɛ lɔn bɛn tá pɛsiɛ̃-n
bǎã tumaa nɛ zii gialaa.
2A n siɛ lɔn, *Siɔn minin kɛn,
yii n boe ǹ li ka sana yoreen bɛ́ lɔn,
ǹ nə́ ǹ biɛ ka donkolon kooro bɛ́ lɔn
fuũn nə́ bɔ.
3Ka ga, tolokan dinin tá
nyɔ koe ǹ nɛnyaanan la.
Sɛnɛ, maa zaman lɛ n ka
nɛ ǹ dan baraa bɛ́ lɔn,
ka diə gɔ́ɔ̃ nɛ ǹ bɛnda#4.3 Diə nɛ ǹ bàan gole ne, a ba wɛɛ a gìi la wa. bɛ́ lɔn.
4Nɛnyaan tiɛɛ̃n lɛwɔn nə́ damɛ a lɛ-n
mu boro gɔn.
Nɛnyaan bɔnboɛɛnən man
màn-bii liɛ,
sɛnɛ min kɔn ba màn koe ǹ la wa.
5Min mɛnɛn nə goã màn kɔɔ̃n bii,
bɛn man giɛ̃ tán zii mìi ni.
Min mɛnɛn nə too naforo gɔ́ɔ̃ nɛ,
bɛn man yisi gugusi ka ǹ gɔn nɛ.
6 #
SGK 19.24
Maa zaman lɛ a sii baraa gole kɔ
á la Sodɔmu kiwi kɛ wɔ nɛ.
A na á n yu bǎã goon,
min kɔn boo la á sii kɔn zɛnaa wa.
7Gána lɛ a nyɛɛnaandɛnan
nə́ goã kakabaa la.
Ǹ gɔ̀nɔn nə siĩni, a n tɛ pii.
Ǹ kakabaa lɛ piɛ̃maa nɛ#4.7 Ebrəə bɔlɔ nɛ, sii a kɔnboe gigiã tá sɛ́wɔ lɛ nɛ. Maǹ nə́ pɛ mà ǹ gɔ̀nɔn nə fu piepie, tɛ pii ka nyaǹ màn bɛ́ lɔn. Bɛ n nyɛɛ mà Zeruzalɛmu a kii nɛn lɛn tá kakabaa la..
8Sisia kəni, ǹ nə́ tì kɔ
ka dɔn tirikə bɛ́ lɔn.
Min ba ǹ doɛ̃ zii gialaa doo wa.
Ǹ ki dinsɔɔ̃ nə n we ganaa,
á laa ka gɔn gere bɛ́ lɔn.
9Bɛ̀ gɔya sa nə n mɛn dɛ,
á soɛ bòo a dɛ nɛ.
Gã ka piũn tá soɛ
nɔmaa bòo gɔn nɛ.
10 #
TDP 28.57; Eze 5.10 Maa zaman lɛ a koe biikoo li,
náa sonboren dinin nə́
ǹ nɛnyaanan kɔrɛ,
ǹ nə́ sɔ̃ màn-bii lɛa.
11Dɛnaa Lawa foo yoo á la yii ni,
ǹ miã din da yɛ.
A na á n yii taã Siɔn kiwi li.
Á tɛ da a ganaa, á kiwi lɛ kũ,
yǎa a gòã daa ganaa.
12Tán a kiin laanka kanaa
min kɔn ba boe la a golee li,
mà zɔ́ɔ a re we
Zeruzalɛmu a kiɛnlɛ-n wa.
13Bɛ na á giala yɛ miɛ̃,
Lawa a boo gii-dalin laanka
Lawa a wúlu-bɔlen
sii baraan taman yii.
A giala, ǹ dinin maǹ nə́ toa
Lawa bɔlɔ-sili sonboren
mà kaa kiwi lɛ nɛ.
14Kanna kəni, maǹ nə n binbirin boe
ka yii tere-a bɛ́ lɔn ziin la.
Ǹ mɔnaan man mà lɛa,
min kɔn doamaa bie
a n gɔn da ǹ ganaa wa.
15Bɛ̀ ǹ tá die, maǹ parɛɛ ǹ li:
«Ka n tá ka n bɔ kànaa,
*gɔ̀ tá ka ganaa!
Ka n tá ka n bɔ kànaa!
Ka nyan nə n gɔn da wɔ ganaa wa!»
Maǹ baa sii, woo ǹ bǎã ná
a ba ǹ la wa.
Sɛnɛ, tɔrɔ kɔsɔn man pii:
«Ǹ ba boe la ǹ giã wɔsɛn li wa.»
16Dɛnaa Lawa ba li a ǹ yɛ doo wa.
A dinmaa na á ǹ loo paǹ tumaa li.
Min kɔn Lawa a wúlu-bɔlen
guguru kɔ doo wa.
Ǹ ba min zizin diɛ sii li doo wa.
17Haalɛ bibi,
wɔ yii laa zii á gama-a gunun.
Wɔ n yii da dɔmalɛ la wɔ fɔ̃.
Wɔ n toa wɔa wɔlɔ lɛduə̃ ǹ bǎã nɛ,
wɔ n yii da tɔrɔ kɔsɔ a daa la,
wáa a wɔ kirisibaa.
Sɛnɛ, màn kɔn!
18Maǹ gɔn diɛ wɔ ganaa,
wɔ a boe la wɔ á n gòan
boe kɔn doɛ̃ wa.
Wɔa gɔn nyɔmɔɔ dɔ.
Wɔa lɛawaa dɔ, wɔa wɔ nya.
19Min mɛnɛn bɛ́ wɔ kio lui,
ǹ yii á fuu á la don a sian manɛ.
Maǹ wɔ lui kelen la,
maǹ kan koe wɔ nɛ diə ne.
20Dɛnaa Lawa kii mɛn bɔ á kɔ wɔ la,
a din kɛ lɛ n wɔ nyin lɛa,
a din lɛ nɛ ǹ kan kũ.
A da yaa wɔ goã taasɛ,
wáa bɛ̀ a tá wɔ mìi la,
wɔ á re bǎã yii tɔrɔ kɔsɔn bii.
21Ka á boe la ka n nyɛnyaa
ka bɛ̀ baa,
Edɔmu a zaman,
nsɛ mɛn bɛ́ giã nɛ Usu gána nɛ.
Sɛnɛ n dɔ á re Dɛnaa Lawa
a foo yoo ǹ paan mu kɛ mii,
a n yii kũ, n nə n tontoro da.
22Siɔn kiwi, n dɔlɔ lɛ nya kəni.
Lawa a re woe n ne
bɛ̀rɛbaa ǹ bǎã-n doo wa.
Sɛnɛ, nsɛ Edɔmu,
Dɛnaa Lawa á re n sii baraan
dɔlɔ boe n ganaa.
Á re n sii baraan lɛn nyɛɛ bii-a panparaan nɛ.
Currently Selected:
BPS 4: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
