BPS 2
2
Dɛnaa Lawa na á n baa ka zɔ́ɔ bɛ́ lɔn Zeruzalɛmu ganaa.
1Ebe! Dɛnaa Lawa a
foo-busii kɛ taman yii,
á *Siɔn da wɔlɔ tì li.
A foo bɛ́ á yoo Siɔn li,
á n toa lon sɔsɔɔ,
á Izirayeli a gugurubaa kɛ zũ tán.
A foo-yoo taman yii,
a yiri bɔ a kion kɛ din ni,
a doamaa bɛ nɛ a giã ǹ mɛn lɛ nɛ.
2Dɛnaa Lawa ná a din a
zaman a kionən tumaa yu.
Makara doɛ̃ din yɛ a-n wa.
Zudaa a kiwin mɛnɛn bɛ́
tamaa-n sɔnbɔraanɛ,
á bɛn yu a foo-yoo baraa kɛ gɔ́ɔ̃ nɛ.
Á gána lɛ laanka a kiin tumaa nɔɔ,
á ǹ kaa, á sìi da ǹ ganaa.
3A foo-yoo baraa lɛ gɔ́ɔ̃ nɛ,
á Izirayeli pàã tumaa ziziɛ̃.
Á n piã ka a dɔmalɛ nɛ
bɛ̀ a zɔ́ɔ lɛ bɛ́ á daa á dɔ.
Sɛnɛ, á tɛ da, á kũ,
a ná a zaman lɛnpɛnɛ.
4A ná a sa dii ka zɔ́ɔ bɛ́ lɔn,
a gusin nə kiɛ la,
zoɛ̃ mà a n gɔn bɔ a ganaa.
Minin mɛnɛn tumaa bɛ́
kɔɔ̃n wɔ ganaa,
á bɛn tumaa dɛ.
A ná a foo-yoo kɛ zuzuu
ka tɛ bɛ́ lɔn Lawa a kion kɛ la.
5Dɛnaa Lawa na á n baa
ka zɔ́ɔ bɛ́ lɔn.
Á Izirayeli yu,
a ná a kion sonboren tumaa yu.
Kungɔnɔn mɛnɛn bɛ́ tamɛɛ,
á bɛn dɔn tumaa wuru.
Á Zudaa gána tumaa pã ginii ni,
ka foo ziziɛ̃ nɛ.
6A ná a zìã lɛ yiɛ ka dù gɔrɔ bɛ́ lɔn.
Dakɔnlɛ ǹ bǎã ke a din wɔ lɛa,
á bɛ yu.
Dɛnaa Lawa toa Siɔn kiwi yiri bɔ
zɔ́n pinaa nɛ, ka *susu ǹ pii ni.
A foo yoo baraa lɛ gɔ́ɔ̃ nɛ,
á kiin laanka Lawa a wúlu-bɔlen
yii puusə kɔ.
7Dɛnaa Lawa nə n piã
ka a *wúlu bɔ ǹ bǎã nɛ.
Á n la bɔ a bǎã sonbore kɛ ganaa.
Á ǹ kion sonboren wɔ ǹ zɔ́ɔn gɔn,
Ǹ zɔ́ɔn lɛn manə n lɛ dii
Lawa a kion,
ka zɔ́n pinaa bɛ́ lɔn.
8Dɛnaa Lawa golee li,
mà a n die Siɔn a kungɔn wurii.
Á biɛ nàn nyoã,
a n die zɛnɛ kɔnlɛ.
Á yuyu miɛ̃,
yǎa a tumaa wuru.
Kiwi lɛnpɛnɛ ǹ kungɔn bibinaa
laanka a paabaa ǹ wɔ lɛ yu.
Bɛ foo-ziziɛ̃ baa.
9Kiwi lɛa kiɛnlɛn nə́ kaa,
ǹ nə́ wɔ tán tii li.
Dɛnaa Lawa nə́ ǹ kii la ǹ bàlà yiyiɛ.
A kii laanka a nyɛɛnaandɛnan
man gùlin lɛa tɔrɔ kɔsɔn bii.
Dí-pɛ banban doo wa,
a boo gii-dalin ba Dɛnaa Lawa a sii-nyaa yii doo wa.
10Siɔn a min golen nə́ giã tán furu-n,
ǹ ba boo kɔn diɛ wa.
Maǹ tii folo kiɛ ǹ dinin mìi ni,
ǹ nə́ gɛ̀ koa ǹ mɔnaan wɔ.
Zeruzalɛmu a nɛlɔn nə́
n mìi kuməə tán.
11Ma yii nànan nə́ tãtaã wuu gɔn.
Ma yiri nə́ n lɔlɔkɔn.
Koe mɛn maa zaman yɛ,
ma a boe la ma á sii ma
ganaa doɛ̃ wa.
A giala, mu boro n nɛnyaan
bɔnboɛɛnɛn gialaa
kiwi lɛ a bǎã dadaraan nɛ.
12Maǹ nɔ̀n diɛ ǹ daanan la
màn-bii laanka mu ni.
Maǹ boe mɛnɛɛ ka bɔlɔkan bɛ́ lɔn.
Kiwi lɛ a bǎã dadaraan nɛ,
maǹ gɛ̀ kaã boe ǹ daanan gòãn la.
13Man die pii n ni
máa lɔn Zeruzalɛmu?
Man die n zoɛ̃ kɔn ka die ne?
Siɔn kiwi doobaanɛ,
man die sii a kɔnboe yii maa
ma nyaa n nɛ n foo tɔn waa?
N koe lɛ a golebaa n ka
yìsi mu bɛ́ lɔn.
Die n boe la a n kaka kɔ?
14Lawa a boo gii-dalin nə sii-nyaa
mɛn tumaa yɛ
n wɔ lɛa,
sii-nyaa kooron manɛ.
Maǹ nə n sã pɛ n nɛ wa,
màn mɛn bɛ́ toɛ
n kanbaa bɛ̀rɛbaa ganaa.
Ǹ sii-nyaan mɛnɛn yɛ n wɔ lɛa,
soɛ laanka yiri sã ǹ boon manɛ!
15Zeruzalɛmu, min mɛn tumaa
bɛ́ kiɛ̃ kunu n li,
manə n gɔn dii a giala mà ń ziziɛ̃.
Maǹ lɛ pii pii ǹ nə́ yaa we n ganaa,
ǹ nə́ n mìi papasɛ bɛ̀ ǹ tá pii:
Kiwi kɛ lɛ nɛ ǹ nə́ goã bíi
"Siĩnbaa lɛpiɛ̃"
ka "tán tumaa a foo kɔɔ̃nɛ"?
16Á ke, n zɔ́ɔn tumaa
n boo diɛ n ganaa.
Maǹ nə n yiin wɛɛ n li,
ǹ nə́ yaa we n ganaa bɛ̀ ǹ tá pii:
«Wɔ gɔn dɔ a ganaa.
Wɔ bɛ́ n yii diɛ lɛawaa mɛn la, á ke.
A din nə ka kɛ nɛ wɔ yii ná a ganaa.»
17Dɛnaa Lawa golee sii mɛn li,
a na á bɛ zɛnaa.
A boo mɛn da
a biikoo ná a kànaa wa,
a na á toa bɛ yɔrɔ yɛ.
Á basaã kɔ, a makara bɔ wa.
Á n zɔ́ɔn foo kɔɔ̃n kɔ,
ka n bɔ̀n da ma-a kɛ nɛ.
Á màn da ǹ pàã li.
18Zeruzalɛmu a zaman nə
n lɛ dii Dɛnaa Lawa ganaa.
Nsɛ Siɔn, toa n yii mu gisĩ,
ka tà mu bɛ́ lɔn,
penleen laanka tèlò-n,
n nyan nə n susu wa,
n nyan nə n lɛ tã wa.
19Yoo, n nə n lɛ dɛ tèlò-n,
kɔn gɔn lɛsi ǹ biikoo tumaa li.
Ń gɔ́ɔ̃ toɛ̃ Dɛnaa Lawa yɔrɔ-a,
ka mu bɛ́ baa sii lɔn.
Ń nɛnyaanan kɛn giɛ̃ bòo gɔn
ziin bɔ kɔn-a ǹ bǎã nɛ,
n gɔnɔn dia lon Lawa la bɛn lɛa.
20E! Dɛnaa Lawa, n yii bũ n ga
minin kɛn ganaa
n nə́ ǹ kũ ka yɔrɔ kɛ nɛ!
Lɔn manə ǹ nɛnyaanan soɛ̃!
Maǹ Lawa a wúlu-bɔlen laanka
Lawa a boo gii-dalin dii
Lawa a kion!
21Nɛnyaanan laanka min zizin tá
nyɔmaa-n tán zii mìi ni.
Ǹ nə́ maa nɛ tenən laanka
maa nɛlɔn dɛ ka gɔya sa nɛ.
N foo yoo baraa kɛa pinaa,
ma n nə́ ǹ dɛ, n nə́ ǹ nyin bɔ,
ǹ makara ná a bɔ n ganaa wa.
22Ka zɔ́n pinaa bɛ́ lɔn,
ń ma miãkɛn babaraan kɛn bíi wɔ.
N foo-yoo baraa kɛa pinaa
Dɛnaa Lawa,
min kɔn nə n bɔ-a n wa.
Min kɔn yii goã koo wa.
Ma goã má min mɛnɛn too
má ǹ gɔ̀nɔn kũ,
maa zɔ́ɔ lɛ bɛn tumaa bɔ̀n baa.
Currently Selected:
BPS 2: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
