BPS 1
1
Zeruzalɛmu n ka lɔ giɔɔrɔ bɛ́ lɔn ǹ nə́ n la bɔ-a
1Ebe! Ǹ nə́ n la bɔ a ganaa kəni,
kiwi ke, piɛ̃ nɛ ka minbuiin ni lɛlɛ.
A n ka lɔ giɔɔrɔ bɛ́ lɔn,
asɛ mɛn goã a yii n guguru,
tɔrɔn bii lɛlɛ.
Asɛ mɛn goã gánan mìi la,
sisia, á ke bɛ̀rɛbaa ǹ dí nyɛɛ.
2Á wuu pɛ á lɛ̀ waa nɛ,
a yii mu gisĩ a pàãn ganaa.
Min mɛnɛn tumaa goã narɛ,
min banban a tá a foo wɛɛ wa.
A giaáran tumaa tii.
Maǹ a zɔ́ɔn lɛa kanna.
3Zudaa tɔrɔn lɛn nə́ ke
gele bɛ̀rɛbaa ǹ bǎã nɛ,
koe laanka bɛ̀rɛbaa kaka gɔ́ɔ̃ nɛ.
Maǹ giã-n tɔrɔn bii,
susui ná a ba ǹ la wa.
Min mɛnɛn bɛ́ ǹ kio lui,
ǹ nə́ dɔ ǹ ganaa.
Maǹ foo ziziɛ̃ gole gɔ́ɔ̃ nɛ.
4Zeruzalɛmu a ziin tumaa n gɛ̀ koɛ.
Min kɔn ba koe ǹ lɛ,
a da zɔ́n zɛnaa doo wa.
A bǎã dadaran tumaa kooromaa nɛ.
A Lawa a wúlu-bɔlen man gini.
A nɛlɔn foo ziziɛ̃maa nɛ.
Kɛ kɔsɛ *Siɔn kiwi ganaa!
5A zɔ́ɔn nə́ boo la.
A bɔ ma yii-n wolen foo nyɛɛ.
Dɛnaa Lawa fuu da a mìi ni
a sii baraa damatan kɛn lɛa.
Min mɛnɛn nə́ boo ǹ la,
ǹ nə́ ǹ nɛnyaanan kaa ǹ nyɛɛnɛ,
bɛ̀rɛn lɛa, ǹ nə́ woe ǹ ne.
6Zeruzalɛmu kiwi a gugurubaa
tumaa n soe n boe a nɛ.
A nyɛɛnaandɛnan man ka
don a luun mɛnɛn bɛ́
buu banban ǹ nə́ soɛ̃ wa.
Pàã wɛɛ nə ǹ ganaa,
ǹ nə́ baa sii ǹ kio-loolin lɛn nyɛɛnɛ.
7Kanna, sìi bɛ́ Zeruzalɛmu ganaa,
woo ǹ bǎã ná a ba la wa,
a yiri gisĩ a lɛlɛ ǹ màn giɔ̀mɔ
kakan kɛn tumaa nɛ.
A zɔ́ɔn gɔn bɛ́ á dɔ
a zaman ganaa ǹ mɛn waáraa,
min kɔn yɛ á daa a gu ganaa wa.
A zɔ́ɔn man giɛ a ganaa ǹ nə́ yaa we,
a giala, mà á ziziɛ̃.
8Á ke:
Zeruzalɛmu sii baraa gole zɛnaa,
á *gɔ̀ da a din ganaa.
Min mɛnɛn nə goã a guguru koe,
bɛn man pɔpɔsɛ.
A giala, ǹ yii na a tontoro ganaa.
Asɛ nə n bɔyɛɛ n dɔ̀ɔ̃ we,
a n gini.
9A gɔ̀ lɛ n yii a mɔnaa ganaa.
Sii mɛn bɛ́ kio, a n yiri kɔ bɛ li wa.
A mɛnaa n gɔn tɔwaa baa.
Min banban a tá a foo wɛɛ wa.
Á pɛ:
«Dɛnaa Lawa, ga maa nɔmaa ganaa.
Á ke, maa zɔ́ɔ na a din pàã laakalɛɛ.»
10Á ke, zɔ́ɔn nə́ n gɔn dia,
ǹ nə́ a naforo tumaa goa.
Min kooron dinin
nə́ wɔ a kion sonbore kɛ nɛ.
A da yaa, Dɛnaa Lawa nə ǹ kurəə
mà ǹ nyan wɔ kun ka a zaman kɛ-n wa.
11A zaman tumaa n gini.
Maǹ giɛ màn-bii li.
Maǹ nə ǹ gɔn màn
sonboren koe màn-bii ganaa,
ǹ yii boo la a goã koo.
Zeruzalɛmu pɛ:
«Dɛnaa Lawa, ga.
Ǹ bɛ́ ma pɔpɔsɛ ka yɔrɔ mɛn nɛ,
n bɛ yɛ.»
12Ka ga!
Kasɛn mɛnɛn tumaa bɛ́ kiɛ̃ zii la,
ka koe ke yɛ wa?
Ka ga!
Koe tan á dɔ masɛ wɔ kɛ li
Dɛnaa Lawa da ma mìi ni
a foo-yoo baraa kɛa pinaa?
13Á n toa lon á tɛ dia,
á ma kũ yǎa ma wen ganaa.
Á kan kɔ ma gòãn li,
á ma làfu kɔ tán.
Á ma da ma gɔrɔn,
man busu koe lɛawaa yii li.
14A yii tá maa sii
baraan tumaa ganaa a yɔrɔ-a.
Á ǹ kaa kun á ǹ yii,
á ǹ kaa ma mìi ni.
Ǹ gugurubaa kaa ma la.
Dɛnaa Lawa ma pàã kiɛɛrɛ kɔ,
á ma wɔ minin gɔn,
ma bɛ́ ma a boe la ma yɔ bɔ kɔn
ka ǹ mɛnɛn nɛ wa.
15Dɛnaa Lawa maa
sɔraasi kakan tumaa dɛ.
Á zia-baali kurun sɔkɔn masɛ á lɛa,
ǹ nə́ daa maa sɔraasi tenən yɔyɔrɛ.
Á ma tɔtɔrɔ yala-n,
ka ǹ bɛ́ rezɛ̃ tɔtɔrɛ lɔn#1.15 Zuifun li, maǹ yala foɛ̃ para nɛ, ǹ nasaaran too da nɛ lɛ kaa walan. Maǹ we bɛa yala lɛ nɛ ǹ gòã kooromaa nɛ, ǹ da nɛ lɛ tɔtɔrɔ. Maǹ bɛa mu lɛ biɛ duvɛ̃ lɛa.,
ma din Zeruzalɛmu, Zudaa kiwi.
16Bɛ lɛ n ke ma á wuu pii,
ma yii mu gisĩ suù ni.
A giala,
min mɛn bɛ́ ma yii mu tuturi,
a n nyin dii koe ma la,
a wɔlɔ lui ma ganaa.
Ǹ nə́ maa nɛnyaanan tumaa bɔ̀n baa.
A giala, maa zɔ́ɔ lɛ pàã la ma nɛ.
17Siɔn nə n gɔnɔn diɛ
á n giɛ dɔmalɛ li.
Min banban a tá a foo wɛɛ wa.
Dɛnaa Lawa na á baa
ǹ miãkɛnɛn zɔ́ɔ lɛa.
Zeruzalɛmu gɔ̀ da a din-a ǹ bii.
18Dɛnaa Lawa n pepere,
a giala, ma din ni má n piã
ka a gɔn waa ma-n nɛ.
Tɔrɔn tumaa, ka bǐɛ̃ kɔ ka n too kɔ.
Ka ga maa là-paparɛɛ ganaa.
Ǹ nə́ maa nɛlɔn laanka
maa nɛgiĩn goa
ǹ nə́ woo ǹ ne bɛ̀rɛbaa ǹ bǎã nɛ.
19Min mɛnɛn nə goã ma narɛ,
má lɛ dia ǹ la,
sɛnɛ, ǹ nə́ ma tii.
Maa Lawa a wúlu-bɔlen laanka
maa min golen nə́ gã kiwi lɛ gɔ́ɔ̃ nɛ,
ǹ bɛ́ giɛ màn-bii li ǹ mɛn waáraa,
mà ǹ yii boo la a goã koo.
20Dɛnaa Lawa, ga maa koe kɛ ganaa.
Ma gɔ́ɔ̃ n kuĩ ka tɛ bɛ́ lɔn.
Ma gɔ̀nɔn yii nə n si ma la.
A giala,
má n gòãn dii n ganaa taãn-taãnɛ.
Zii gialaa, zia nɛ,
maa kion, gɛ̀ dinsɔɔ̃ nɛ.
21Maǹ ma lɛ miɛ gini,
min banban a tá ma foo wɛɛ wa.
Maa zɔ́ɔn tumaa maa koe kɛ boo ma.
N sii mɛn da ma mìi ni,
maǹ bɛa nyɛnyaa we.
N lɛawaa#1.21 Bɛ n Dɛnaa Lawa a lɛawaa kɛ lɛa a n die kiri we minbuin nɛ tumaa ganaa. mɛn bɔ n koa,
toa bɛ́ dɔ.
Toa ǹ dɔn nə n baa ka ma dɔ bɛ́ lɔn.
22Ga ǹ sii baraan kɛn ganaa taãn nɛ.
N masɛ yii wɔ̃ lɔn, maa piãn kɛn lɛa,
ǹ dɔn yii wɔ̃ miɛ̃.
Maa wɔ n ka ginii-n biikoo tumaa li!
A n busu lɛa ma ganaa.
Currently Selected:
BPS 1: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
