Zoz 14

Bǎã mɛn nə n gii Zurdɛ̃ tà kio lɛ̀nyɛɛnɛ

1Izirayeli minin lɛn nə bǎãn mɛnɛn yɛ ǹ kíɛ̃ lɛa Kanaan gána nɛ, bɛn man ka kɛn nɛ. Lawa a wúlu-bɔle Eleyazaara nɛ, Nunu a nɛgiĩ Zozoe laanka Izirayeli tɔrɔn lɛn kɛdɛnan man nə́ bɛa bǎãn lɛn gii Izirayeli minin lɛn bii, ǹ kíɛ̃ lɛa. 2#MNS 26.52; 34.13Maǹ nə́ n pã, ǹ nə́ tɔ́n bǎãn lɛn gii tɔrɔ manangɔrɔ ka talɛɛ lɛ bii ǹ kíɛ̃ lɛa, ka Dɛnaa Lawa goã á pɛ Muizu-n lɔn. 3#MNS 32.33; 34.14-15; TDP 3.12-17 A giala, Muizu goã á bǎã kɔ tɔrɔ paa ka talɛɛ kɛ la ǹ kíɛ̃ lɛa Zurdɛ̃ tà kio lɛ̀giala-n. Sɛnɛ, *Levii tɔrɔn kɛn, a goã á bǎã kɔ bɛn la ǹ bii ǹ kíɛ̃ lɛa wa. 4Sonbore, Zozɛfu a nɛgiĩn lɛn man nə́ tɔrɔ màn paa baa: Manaasee laanka Efrayimu ni. Levii tɔrɔn lɛn sɛn, ǹ bǎã kɔ bɛn la gána lɛ-n wa. Bɛ̀ á n bɔ giã ǹ kiwin laanka lɛkoro lɛ-a bǎãn nɛ, ǹ tɔɔn laanka ǹ gɔn màn gialakunun wɔ lɛa. 5Dɛnaa Lawa goã á pɛ Muizu-n lɔn, Izirayeli minin lɛn nə́ zɛnaa miɛ̃, ǹ nə́ gána lɛ gii.

Ǹ bǎã mɛn kɔ Kalɛbu la

6 # MNS 14.30 Bɛa biikoo li, Zudaa tɔrɔ minin kɔnɔn nə́ daa dɔ Zozoe li Gilgaali. Kenizi tɔrɔ Zefunee a nɛgiĩ Kalɛbu tɔ́n pɛ nɛ: Dɛnaa Lawa boo mɛn da a boo gii-dali Muizu ni masɛ laanka n din Zozoe wɔ paǹ li Kadɛsi-Barneya kiwi, táa n yiri tá a nɛ? 7#MNS 13.1-30Dɛnaa Lawa a dí-nyali Muizu bɛ́ n toɛ Kadɛsi-Barneya ma diɛ, mà ma wo ga gána lɛ ganaa ka durii ni, bɛ̀ ma lɛ̀ pusi ni. Má n bɔyaa má daa n gɔ́ɔ̃ pɛ nɛ. 8Ma dɔɔ̃nɔn mɛnɛn nə goã ǹ nə́ woo kun ka ma nɛ, bɛn nə́ zaman lɛ foo biɛ na. Sɛnɛ, Dɛnaa Lawa lɛ, maa Lawa lɛa, masɛ n má goã koe bɛ lɛ ka ma foo tumaa nɛ. 9#MNS 14.24Bɛa pinaa kɛ lɛ nɛ, Muizu nə́ n liɛ á pɛ kɛnɛn: «N gòã mɛ gána mɛn lɛ nɛ, bɛ á re n laanka n nɛnyaanan kíɛ̃ biɛ yǎa duduu, sàabaa ba bɛ la wa. A giala, Dɛnaa Lawa mɛn bɛ́ masɛ Muizu a Lawa lɛa, á kɔ bɛ lɛ ka a foo tumaa nɛ.» 10Dɛnaa Lawa pɛ lɔn, á ke á masɛ yii toa koo á daa dɔ pelo ganaa. Dɛnaa Lawa bɛ́ boo kɛ lɛ pii Muizu ni, bɛ̀ Izirayeli minin lɛn maǹ don bii wɔsɛ kiɛ̃. Bɛ lɛ̀ pusiwensooro n ke. Pelo, masɛ lɛ̀ pɔkiwisiwensooro dɔ nɛ. 11Sɛnɛ, ma goã kaka lɔn bɛ̀ Muizu bɛ́ ma diɛ giɛ gána lɛ ganaa, man tɔn kaka miɛ̃ haalɛ pelo. Pàã mɛn goã ma lon lɛlɛ má n zia biɛ nɛ, ma soo bɛ̀ ma woo bɛ̀ man bɔyaa, bɛa pàã lɛ miã á tɔn n ma lon pelo. 12Dɛnaa Lawa kele yii mɛn boo da bɛa pinaa kɛ lɛ nɛ, bɛ lɛ kɔ masɛ la kanna kəni. A giala, ń ma a din pinaa kɛ lɛ dɔ nɛ, mà Anaaki tɔrɔn tá walan, mà kiwin dadaran dɔn tá a nɛ, ǹ nə́ kungɔn dɔ, ǹ nə́ ǹ lɛnpɛnɛ nɛ. Kɔntan Dɛnaa Lawa á re n doe masɛ lɛ, ma á re ǹ lui ma ǹ bɔ gána lɛ nɛ, ka Dɛnaa Lawa din bɛ́ á pɛ lɔn. 13Zozoe barka da Zefunee a nɛgiĩ Kalɛbu ganaa, á Ebrɔn kiwi kɔ la a kíɛ̃ lɛa. 14Bɛ lɛ n ke, Ebrɔn kiwi tá tɔn Kenizi tɔrɔ Zefunee a nɛgiĩ Kalɛbu wɔ lɛa, yǎa a da kaa pelo lɛ. A giala, a na á goã á kɔ Dɛnaa Lawa, Izirayeli minin Lawa lɛ ka a foo tumaa nɛ. 15Lɛlɛ, maǹ nə́ goã Ebrɔn kiwi lɛ bíi mà Arabaa a kiwi. Arabaa na á goã Anaaki tɔrɔn lɛn *min gole goon lɛa. A kũ bɛa biikoo lɛ ganaa, gána lɛ goã là nyantoro la, zia ná a banban.

Currently Selected:

Zoz 14: SBPE2011

Highlight

Copy

Compare