Zer 43
43
Maǹ woe Zeremii ni Ezipti
1Dɛnaa Lawa, ǹ Lawa boon mɛnɛn pɛ Zeremii ni Zaman lɛ wɔ lɛa, Zeremii bɛ́ á bɛn pɛ á nya lɔn, 2Osayia a nɛgiĩ Azaria nɛ, Kareya a nɛgiĩ Zoanan nɛ ka din koa wolen tɛnɛn nɛ, ǹ nə́ pɛ Zeremii-n kɛnɛn: «Soɛ nɛ n tá boe. Dɛnaa Lawa, wɔa Lawa nə n dia mà n da pɛ wɔ nɛ mà wɔ nyan wo gùli kɔ Ezipti gána-n wa. 3Sɛnɛ, Neriya a nɛgiĩ Baruku nə n sɔsɔmɛ n diɛ wɔ ganaa. A n li a wɔ wɔ *Baabilonii minin gɔn, ǹ wɔ dɛ hinlaa ǹ wɔ goa ǹ wo wɔ nɛ Baabilonii gána nɛ.»
4Kareya a nɛgiĩ Zoanan nɛ, sɔraasin goledɛnan nɛ ka zaman gialakun lɛ nɛ, ǹ kɔn din ba n too koe Dɛnaa Lawa a da ǹ boo li wa, ǹ ba li ǹ giã Zudaa gána-n wa. 5#Kiin2 25.26 Zudaa gána a min mɛnɛn yii goã koo, Zoanan laanka zaman nyɛɛnaandɛnan lɛn nə́ ǹ kũ, ǹ nə́ woo ǹ ne Ezipti gána nɛ. Bɛa minin lɛn man nə́ goã pɛsiɛ̃-n bǎã yii ni ǹ lɛkoro lɛ-a gánan nɛ, ǹ nə́ wusoo doo ǹ nə́ daa giã Zudaa gána nɛ. 6Giĩn nə́ goã ǹ tan, lɔn nɛ, nɛnyaanan nɛ, kii a nɛlɔn nɛ, ka min mɛnɛn bɛ́ bǎã-lɛduə̃lin goledɛnaa Nebuzaradan nə́ ǹ koa Ayikaamu a nɛgiĩ Gedalia li, Safan a nɔ̀ɔn lɛa. Ǹ nə́ Lawa a boo gii-dali Zeremii dɔ kũ ka Neriya a nɛgiĩ Baruku ni. 7Ǹ nə́ n piã ka Dɛnaa Lawa bɔlɔ sii ni, ǹ nə́ woo Ezipti gána nɛ, ǹ nə́ dɔ yǎa Tapanɛsi.
Nebukadenezɔɔrɔ a da kɔ Ezipti gána lɛ
8Dɛnaa Lawa boo da Zeremii ni Tapanɛsi, á pɛ nɛ: 9– Kɔlɔ dadaran goa, n nə ǹ duru banbaran kɛa tii li *Faarahɔn a kii kion kɛa kiɛnlɛ-a Tapanɛsi. A zɛnaa miɛ̃ Zudaa minin lɛn yɔrɔ-a. 10Bɛ kio, n tɔn pɛ ǹ nɛ: «Dɛnaa Lawa Pàãyiidɛnaa, Izirayeli a Lawa n kɛ pii: Á ke, man die lɛ diɛ maa dí-nyali Baabiloniin kii Nebukadenezɔɔrɔ la. N kɔlɔn mɛnɛn lɛn wɔ tán, man die a kii dankan koɛ bɛn lɛn la. A n die a kiibaa ǹ zìã doe walan. 11Bɛ̀ á daa, á re yui Ezipti gána gialaa. Min mɛnɛn doamaa bɛ́ nɛ ǹ gã, bɛn tá re giɛ̃, ǹ mɛnɛn doamaa bɛ́ ka goa nɛ, ǹ tá bɛn goɛ, ǹ mɛnɛn doamaa bɛ́ ka gɔya sa gɛ̀ nɛ, gɔya sa á re bɛn dii. 12Ma á re tɛ diɛ Ezipti a dì kionən ganaa. Nebukadenezɔɔrɔ á re ǹ tiɛ̃, a ǹ goa a wo ǹ ne Baabilonii. Á re Ezipti gɔn màn tumaa goɛ lenlen ka tɔɔn-lɛduə̃li bɛ́ kɔrɔnkiɛ̃n wɛɛ a mɔnaa-n lɔn. Bɛ kio, á re n bɔyɛɛ a wo piɛ là nyantoro gɔ́ɔ̃ nɛ. 13Á re dì nyínin yɔyɔrɛ Bɛti-Semɛsi#43.13 Bɛti-Semɛsi giala mà "wasa a kion". Maǹ taasɛ mà Eliopolisi kiwi kɛ nɛ kunu Ezipti a kiwi gole kɛ ganaa a tɔ n Kairɛ. kiwi, a tɛ da Ezipti a dì kionən ganaa.»
Currently Selected:
Zer 43: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
