Zer 42
42
Baa sii a wo Ezipti gána nɛ
1Sɔraasin nyɛɛnaandɛnan kɛn tumaa kɔnlɛ ka Kareya a nɛgiĩ Zoanan nɛ, Osayia a nɛgiĩ Yazania nɛ, ka min mɛnɛn nə goã ǹ tan, a kũ nɛnyaanan ganaa a wo min golen yaa, 2ǹ nə́ woo dɔ Lawa a boo gii-dali Zeremii li ǹ nə́ pɛ nɛ: «Baalaa wɔ n wɔa nyankɔ lɛ si! Dɛnaa Lawa, n Lawa nyankɔ wɔsɛn yiikoonaan kɛn lɛa. Wɔ́ kiɛɛrɛ kɔ á la yii ni ka n din yii bɛ́ a ganaa lɔn. 3Nɔ̀n da Dɛnaa Lawa, n Lawa la, wɔ doamaa bɛ́ nɛ wɔ wo maa a bɛ nyaa wɔ nɛ ka sii mɛn bɛ́ wɔ doamaa-n wɔ zɛnaa.»
4Lawa a boo gii-dali Zeremii nə́ ǹ lɛ si kɛnɛn: «Má ma! Ma á re Dɛnaa Lawa, kaa Lawa nyankoe ká ka pɛ lɔn. Bɛ kio, ma á re Dɛnaa Lawa a boo a binyəə koe ka la. Ma a re màn kɔn duri ka la wa.»
5Ǹ nə́ pɛ Zeremii ni: «Dɛnaa Lawa, n Lawa bɛ́ re boo mɛn diɛ n nɛ, wɔ á re koe bɛ lɛ ka te. Dɛnaa Lawa die a n baa wɔa lɛ-kɔ lɛ a siére lɛa, siére taãn lɛa. 6Wɔ n bɛa nɔ̀n da Dɛnaa Lawa la lɛ sii we n din gɔn. A bɛ re boo woo boo diɛ wɔ nɛ, wɔ á re koe lɛ, ta á kɔɔ̃n wɔ ganaa ta a kɔɔ̃n wɔ ganaa wa. Bɛa biikoo li kəni, wɔa sii tumaa á re bǐɛ̃ koe. A giala wɔ á re Dɛnaa Lawa wɔa Lawa bɔlɔ sii.» 7Lɛawaa fù bɛ kio, Dɛnaa Lawa boo da ka Zeremii ni. 8Zeremii tɔn lɛ dia Kareya a nɛgiĩ Zoanan la, sɔraasin nyɛɛnaandɛnan mɛnɛn bɛ́ kun ni bɛn nɛ ka min mɛnɛn nə goã ǹ tan, a kũ nɛnyaanan-a a wo min golen yaa. 9Á pɛ ǹ nɛ: – Ká n doa ma ganaa, mà ma kaa nyankɔ pɛ Dɛnaa Lawa, Izirayeli a Lawa nɛ. A da ǹ boo á ke:
10«Bɛ̀ ka lɛ kɔ ka giã gána lɛ nɛ,
ma á re kaa gána lɛ doe
ma a re ziziɛ̃ doo wa.
Ma á re ka zumi,
ma a re ka woɛ̃ doo wa,
Ma baraa mɛn zɛnaa ka nɛ,
ma á re n gɔ́ɔ̃ dɔn bii ka bɛ nɛ.
11Kanna,
ka nyan nyɛ́ɛ baa Baabiloniin
kii-n doo wa,
kɛ lɛ ka n nyɛ́ɛ biɛ nɛ.
Ma din Dɛnaa Lawa a da ǹ boo ne:
Ka nyan nyɛ́ɛ baa-n wa.
A giala, ma á kun ka nɛ,
ma ka kirisibaa,
ma ka kanbaa a pàã ganaa.
12Ma á re toɛ ka makara kũ,
á re makara boe ka ganaa,
a toa ka wusoo ka da kaa gána nɛ.»
13Zeremii woo nyɛɛnɛ ka boo ne á pɛ: – Kɔntan, ka á re n piɛ̃ mà ka a n too koe Dɛnaa Lawa, kaa Lawa lon wa, ka pɛ kɛnɛn: «Haayii, wɔ a giɛ̃ kànaa wa. 14Á soɛ wɔ ganaa wɔ wo Ezipti gána nɛ. Walan, wɔ a re zia boo miɛ wa, wɔ a re bɛnɛn zia lɛ-dia wuu miɛ wa, bòo á re wɔ nɔmɛɛ doo wa. Wɔ n li wɔ giã walan lɛ nɛ.» 15Bɛ̀ á n baa miɛ̃, kasɛn Zudaa zaman gialakun, ka n too kɔ Dɛnaa Lawa a boo li. Dɛnaa Lawa Pàãyiidɛnaa, Izirayeli a Lawa n kɛ pii:
Bɛ̀ ka golee li sonbore
mà ka n woe Ezipti gána nɛ,
bɛ̀ ka woo n mìi duru
walan sonbore,
16ka bɛ́ nyɛ́ɛ biɛ zia mɛn lɛ nɛ,
bɛ á die ka kio lui yǎa walan.
Bòo mɛn lɛ á ke ka foo biɛ niɛ̃,
bɛ á re doe ka-a Ezipti gána nɛ.
Walan lɛ nɛ ka á re giɛ̃.
17Min mɛn tumaa golee li
mà ǹsɛn man woe gùli koe
Ezipti gána nɛ,
zia n die ǹ bii,
bòo ne ka piɛ̃ busu ni.
Min kɔn ba re liɛ koe kɛ la
ma á re diɛ ǹ la wa.
18Zeremii pɛ doo: – Dɛnaa Lawa Pàãyiidɛnaa, Izirayeli a Lawa n kɛ pii: «Má maa foo-yoo baraa kaa Zeruzalɛmu minin la. A din yɔrɔ goon la, bɛ̀ ka woo Ezipti gána nɛ, man maa foo-yoo baraa kɛ kiɛ ka dɔn la. Ka bɛ nɛ, ǹ tá re ka biɛ sii a kɔnboe lɛa, bɛ̀ ǹ tá re lɛn baraa bíi, ǹ sii bɔbɔnɛɛ boo da, ǹ nyɛ́ɛ da min ganaa ka sìi da ǹ sii ni. Ka a re kaa gána kɛ yii doo duduu wa.»
19«Kasɛn, Zudaa zaman gialakun ke, pelo, ma nə n gɔn wɛɛ ka-n ka ma parsiini. Dɛnaa Lawa n pii mà ka nyan wo Ezipti gána-n wa. Ka doamaa-n ka bɛ dɔ̃. 20Ka bɛ́ ká n doa ma ganaa mà ma Dɛnaa Lawa, kaa Lawa nyankɔ, ka n ka pɛ: Dɛnaa Lawa, wɔa Lawa nyankɔ wɔ a lɛa. A bɛ́ re boo mɛn diɛ wɔa paǹ li ka te, n bɛ pɛ wɔ nɛ. Wɔ á re bɛ zɛnɛɛ. Bɛa pinaa lɛ nɛ, ka n ka sã gole wɔ, màn mɛn bɛ́ nyin nyɛɛ. 21Sɛnɛ pelo, man Dɛnaa Lawa, wɔa Lawa a boo binyəə koe ka la. Sɛnɛ, a boo mɛn yii da ma nɛ, ka a n too koe ǹ kɔn li wa. 22Kanna kəni, ka dɔ̃ mà ka n die giɛ̃ zia gɔn, bòo ne ka piɛ̃ busu ni gána kɛ lɛ nɛ ka n woe gùli koe a nɛ.»
Currently Selected:
Zer 42: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
