Zer 31
31
1Dɛnaa Lawa a da ǹ boo á ke: «Biikoo á re doe, ma á re Izirayeli minin sumu lɛn tumaa a Lawa biɛ, ǹ dɔn tá re maa zaman biɛ.»
Izirayeli minin wusoo a da ǹ gána nɛ
2Dɛnaa Lawa n kɛ pii:
Zaman mɛn nə kanbaa gɛ̀ ganaa,
má maa bǐɛ̃baa nyaa bɛn manɛ
diə gole ne.
Izirayeli á re susui yii.
3Zaman lɛ na á goã pii:
«Dɛnaa Lawa nə́ n din nyaa wɔ nɛ
tiã lɛ-a.»
Ǹ lɛ si kɛnɛn:
Man ka narɛ ka kɔn-narɛɛ nɛ,
kɔn-narɛɛ mɛn nə́ ke a nyɛɛ
duduu wa.
Bɛ lɛ nɛ, ma á n gɔn parɛɛ ka ganaa.
4Izirayeli zaman,
ma á re n siɛ ma n da lon,
ǹ wusoo ǹ nə n dɔ.
N tá re wusii,
n maà sonboren goa,
n wo bɛ̀ baa kun ka zɔ́n zɛnaa
wolen ne.
5N tá re wusii doo,
n *rezɛ̃ dan zumu Samarii kelen la,
a zumii wolen tá re a nɛ niɛ.
6Ǹ kɔn pinaa, wɔlɔ-lɛduə̃lin tá re
n lɛ dii Efrayimu kele la ǹ pɛ:
Ka yoo wɔ n ta *Siɔn,
Dɛnaa Lawa wɔa Lawa li!
7Dɛnaa Lawa n kɛ pii:
Ka n nyanyaa,
ka foo kɔɔ̃nbaa ǹ lɛ dɛ Zakɔba ganaa.
Min mɛn bɛ́ tɔrɔn tumaa mìi la,
ka n da bɛ lɛ,
ka n nyanyaa ka pɛ:
Dɛnaa Lawa na a zaman kirisibiɛ,
Izirayeli minin mɛnɛn yii bɛ́
á goã koo.
8A giala,
man die boe ǹ ne gɔsɛ a lɛ̀gɔn la,
ka gána sɔsɔɔn nɛ, ma ǹ sɔkɔn.
Yii tere-an ne, bɔlɔkan nɛ,
haalɛ lɔ nɔnɔan dinin laanka
lɔn mɛnɛn nə nɛ yɛ sisia.
Kɛ n zaman gole lɛa wusii die kànaa.
9Maǹ wusii die bɛ̀ ǹ tá wuu pii,
ǹ nə́ gòã kũ diɛ ma ganaa.
Man miɛ ǹ nyɛɛnɛ ma á woe ǹ ne
tà lɛ-a,
piɛ̃-n ka mu ni.
Zii mɛn bɛ́ foo n doa nɛ a ganaa,
ma á re toɛ ǹ kɔ bɛ lɛ,
màn mɛn bɛ́ toɛ,
ǹ nyan bɔ ǹ mɛnaa wa.
A giala, man Izirayeli a díi lɛa,
Efrayimu n maa nɛgiĩ bibinaa lɛa.
10Kasɛn, tɔrɔ kɔsɔn lɛn,
ka n too kɔ Dɛnaa Lawa a boo li.
Ka a boo da bǎã sɔsɔɔ dɛnan
kɛn manɛ,
ka pɛ:
Dɛnaa Lawa din na á Izirayeli
minin pɛsɛ̃ bǎã tumaa nɛ.
Sisia, a nə ǹ soekɔn, á ǹ tamɛɛ,
ká tɔɔn-lɛduə̃li á ke a tɔɔn lɛduĩ lɔn.
11Dɛnaa Lawa Zakɔba
a minin kirisibaa.
Zɔ́ɔ mɛn pàã bɛ́ á la ǹ nɛ,
á ǹ si bɛ la, á ǹ kaa.
12Maǹ die, ǹ foo n kɔɔ̃nɛ,
loe loe Siɔn kele la.
Dɛnaa Lawa a bǐɛ̃baa ǹ mànan
kɛn taman yii,
ǹ yɔrɔ n tɛ pii, ǹ foo n kɔɔ̃nɛ:
*Belee ne, duvɛ̃ nɛ, nyɔɔ buə̃ ne,
sèren ne, bòen ne, diin ni.
Maǹ die goɛ̃ ka dù gɔrɔ mɛn bɛ́
mu n boe sɔnbɔraa nɛ.
Màn kɔn ba re nyaabiɛ ǹ ganaa wa.
13Ǹ nɛlɔn tá re bɛ̀ biɛ ka foo kɔɔ̃n nɛ,
nɛ tenən laanka min zizin tá re
n nyɛnyɛɛ kun.
Ma á re ǹ gɛ̀ koan bɔyɛɛ ma baa
zɔ́n lɛa.
Ǹ foo ziziɛ̃ gɔ́ɔ̃ nɛ ma á re ǹ foo wɛɛ,
ma á re ǹ kiɛ̃ ka foo kɔɔ̃nbaa nɛ.
14Ma á re siĩ nyɔɔnaa gigiã koe
Lawa a wúlu-bɔlen la,
ma màn sonbore gigiã kɔ maa
zaman la.
Dɛnaa Lawa a da ǹ boo ne.
15 #
SGK 35.16-19; Mat 2.18 Dɛnaa Lawa n kɛ pii:
Ginii lɛ n boe Ramaa kiwi,
lɛ-dɛ kɔsɛkɔsɛ nɛ.
Raseli n wuu pii a nɛnyaanan la.
A ba lɛ koe foo wɔraa ganaa wa,
a giala, ǹ kɔn ba a yɔrɔ-a doo wa.
16Sɛnɛ, Dɛnaa Lawa n kɛ pii:
N nyan wuu pɛ doo wa, n lɛ tã!
N tá re n nɔmaa a saraa yii.
N nɛnyaanan tá re boe n zɔ́ɔn
gána nɛ ǹ daa.
Dɛnaa Lawa a da ǹ boo ne.
17Foo doa tá n biɛ̃ ǹ ganaa.
N nɛnyaanan tá re wusii ǹ da
ǹ gána nɛ.
Dɛnaa Lawa a da ǹ boo ne.
18Má Efrayimu minin lɛ-dɛ
ma taãn-taãnɛ,
Maǹ pii:
«Dɛnaa Lawa, ń wɔ doroo
ka kakaarɛbaa nɛ,
ka ǹ bɛ́ dii ten darɛɛ lɔn.
Sɛnɛ, toa wɔ da n li,
wɔ wusoo wɔ da n li taãn-taãnɛ.
A giala, Dɛnaa Lawa n din ni
wɔa Lawa lɛa.
19Taãn nɛ, wɔ́ n wɔlɔ lui n ganaa.
Sɛnɛ sisia, bɛ n busi wɔ ganaa.
Wɔ́ wɔa sãn dɔ̃, wɔ́ na ǹ nɛ kanna.
Wɔa yii gugurubaa nya, sìi nə n
kɔ wɔ lɛ.
Sonbore, wɔ́ sii baraa zɛnaa
wɔa tenmaa waáraa.
Bɛa nɔmaa n ke wɔ gialaa.»
20Efrayimu n maa nɛgiĩ lɛa,
ma n narɛ taãn-taãnɛ.
Ma á narɛ á la yii ni.
Bɛ lɛ nɛ, biikoo tumaa li,
bɛ̀ máa boo diɛ a ganaa,
maa taasiɛ n doa nɛ a ganaa.
A sii n ma foo-n parsiini.
Sonbore a makara n ma
ganaa taãn-taãnɛ.
Dɛnaa Lawa a da ǹ boo ne.
21Mànan wɔ tán n zii lɛkoro-a,
mànan mɛnɛn bɛ́ a lɛ dan
nyɛɛ foaãnɛ.
N zii mɛn saa, yiri bɔ li,
zii ke n ta la, yiri bɔ li.
Izirayeli a zaman, ka n bɔyaa ka daa.
Ka n bɔyaa ka da kaa kiwin ni.
22Nɛlɔ piã-wole,
ma n woe n mìi giala yǎa biĩ?
Hiĩ, Dɛnaa Lawa sii soree lɛ bɔ tán la:
Lɔ n die baa sii ǹ zuũ kio kanna.
Lɛ-kɔ dii Zudaa laanka Izirayeli wɔ lɛa
23Dɛnaa Lawa Pàãyiidɛnaa, Izirayeli a Lawa n kɛ pii: – Bɛ̀ má wusoo má Zudaa gána laanka a kiwin giã ǹ gɔn zizi kɛ kɔ ǹ la ǹ mɛn waáraa, minin tá re kɛa boon kɛn pii doo:
«Peperebaa bɛ́ bǎã mɛn nɛ,
kele sonbore,
Dɛnaa Lawa barka da n ganaa.»
24Bɛa biikoo li kəni, Zudaa kiwi minin laanka a kiwi dadara minin ni, a buu-kɔsɔlin laanka a tɔɔ-lɛduə̃lin ni, ǹ tumaa á re giɛ̃ gána lɛ-n kun. 25Taãn nɛ, min mɛnɛn nə nɔmaa, ma á re mu koe bɛn la ǹ mi. Pàãwɛɛnaan kɛn, ǹ laadoo bɛ́ màn mɛn tumaa ganaa
ma á re bɛ koe ǹ la.
26Bɛ kio, ma yii kaa, má yɛ máa maa nyuù sii bǐɛ̃ zɛnaa ma nɛ.
27Kànaa ka boɛɛn, man die minbuiin nɛn laanka tɔɔn pɛsɛ̃ Izirayeli laanka Zudaa gána nɛ ká ǹ bɛ́ màn tɔrɔ pɛsɛ̃ wuru-n lɔn. Dɛnaa Lawa a da ǹ boo ne. 28Má goã má yoo ǹ gialaa, má ǹ woɛ̃, má ǹ ziziɛ̃, má ǹ wuru, má bɔ̀n da ǹ ganaa. Sɛnɛ sisia, man die sii tumaa zɛnɛɛ ǹ nɛ, màn mɛn bɛ́ toɛ ma wusoo ma ǹ dɔ, ma ǹ zumu. Ma din Dɛnaa Lawa a da ǹ boo ne. 29#Eze 18.2 Ka bɛ-n kəni, min kɔn ba re kɛa suusu kɛ diɛ doo wa:
«Díin man nə́ da nɛ burun sɔ̃,
sɛnɛ, ǹ nɛnyaanan sɔ piã.»
30A giala, bɛ̀ min da nɛ burun sɔ̃,
a dinmaa sɔ n piɛ̃.
Didie n giɛ̃ a sii baraan lɛa.
31 #
Mat 26.28; Mar 14.24; Luk 22.20; Kor1 11.25; Kor2 3.6 #
Ebr 8.8-12
«Ǹ kɔn pinaa, man die lɛ kɔ kɔn la dii we ka Izirayeli minin laanka Zudaa minin ni. Dɛnaa Lawa a da ǹ boo ne. 32Ma lɛ kɔ kɔn la mɛn wɔ ǹ digolon ne bɛ̀ ma bɛ́ má ǹ kũ ǹ gɔn ganaa Ezipti gána nɛ má soo ǹ ne, á re goɛ̃ totoro ka bɛ nɛ. Ǹ nə́ bɛa lɛ kɔ kɔn la lɛ ziziɛ̃. A da yǎa ma din nə ǹ Dɛnaa lɛa. Ma din Dɛnaa Lawa a da ǹ boo ne.» 33#Ebr 10.16 Dɛnaa Lawa n pii doo: – Ma bɛ́ re lɛ kɔ kɔn la mɛn we ka Izirayeli minin ni bɛa waáraa lɛ nɛ, á ke. Ma á re maa dí-pɛn kɛn we ǹ yiri ni, ma wɔ ǹ foo ne. Ma á re ǹ Lawa biɛ, ǹ dɔn tá re maa zaman biɛ. 34Min kɔn ba re ǹ miã hinlaa ǹ dɔɔ̃n darɛɛ a pɛ-n kɛnɛn wa: «Ka n daraa Dɛnaa Lawa doɛ̃ ganaa!» A giala, min tumaa á re ma doɛ̃. A kũ nɛnyaanan ganaa, a wo min zizin yaa. Ma á re ǹ sãn toɛ ǹ nɛ, ma yiri bɔ ka ǹ sii baraan nɛ. Dɛnaa Lawa a da ǹ boo ne.
Lɛ kɔ kɔn la mɛn bɛ́ a nyɛɛ duduu wa
35Die na á wasa da lon màn mɛn
bɛ́ toɛ a wɔlɔ fúlu?
Die n pii mui laanka leeren manɛ
mà ǹ folon kaa tèlò ne
Die n bìn diɛ yìsi mu gole ganaa,
bɛ̀ a wuu bɔ?
Dɛnaa Lawa Pàãyiidɛnaa nɛ.
A tɔ n miɛ̃.
Dɛnaa Lawa Pàãyiidɛnaa a da ǹ boo ne.
36«Bɛ̀ má lɛ kɔ bɛa siin kɛn
lɛn sàabaa ganaa ǹ mɛn pinaa,
a din pinaa lɛ nɛ Izirayeli tɔrɔn
ba re maa zaman biɛ doo duduu wa.»
Dɛnaa Lawa a da ǹ boo ne.
37Dɛnaa Lawa n kɛ pii:
«Bɛ̀ min boo la á lon a wo lon zɔɔ̃,
á tán a zuzulubaa zɔɔ̃,
ma dɔ á re Izirayeli minin tii,
ǹ sii baraan taman yii!»
Dɛnaa Lawa a da ǹ boo ne.
38Lɛawaa á re doe, Dɛnaa Lawa a da ǹ boo ne, Zeruzalɛmu kiwi lɛ á re wusii a n dɔ ma din wɔ lɛa, a kũ Hanaaneyeli a sanabolo kɛ ganaa, a wo gùrùn kiɛnlɛ kɛ yaa. 39Kiwi lɛ a gèlè dii n die siɛ lɛ̀nyɛɛn gɔn la a wo Garɛbu a kele li, a tɔ nə n pɛnɛ yǎa Goa. 40Geren nyankɔrɔ basa kɛ nɛ, tonən#31.40 Inɔn nyankɔrɔ basa nɛ. Ka ga 7.31 ganaa. wɔ nɛ, ka bǎã mɛn tumaa bɛ́ siɛ Sedrɔn ganaa a wo gùrù kɛ ganaa sùin kiɛnlɛ-a lɛ̀giala gɔn la, bɛn tumaa á re maa wɔ biɛ. Màn kɔn ba re n woɛ̃ walan, a ziziɛ̃ bɛa bǎã lɛ-n doo wa.
Currently Selected:
Zer 31: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
