Zer 30
30
Lawa n lɛ koe a zaman la
1Dɛnaa Lawa boo da Zeremii ni á pɛ nɛ: 2«Masɛ Dɛnaa Lawa, Izirayeli a Lawa a da ǹ boo á ke. Ma bɛ́ boon mɛnɛn diɛ n nɛ, ǹ tumaa kiɛ̃ sɛ́wɔ nɛ. 3Taãn nɛ, man kɛ pii n ni: Ǹ kɔn pinaa, man die wusii ma da maa zaman Izirayeli laanka Zudaa a wo bɛ̀rɛbaa ǹ bǎã-n wolen kɛn nɛ. Man die wusii ma da ǹ nɛ gána kɛ nɛ má kɔ ǹ digolon la, ǹ wusoo ǹ si, ǹ baa ǹ wɔ lɛa. Ma din Dɛnaa Lawa a da ǹ boo ne.» 4Dɛnaa Lawa boon mɛnɛn da Izirayeli laanka Zudaa a paǹ li, bɛn nə́ ke:
5«Dɛnaa Lawa n kɛ pii:
Wɔ́ nyɛ́ɛ baa ǹ lɛ-dɛ ma,
nyɛ́ɛ gole ne, bǐɛ̃ bie wa.
6Ka nɔ̀n da minin la,
ka ga a ganaa:
Giĩ á boe la a nɛ yɛ?
A da yaa,
ma yii n giĩn tumaa ganaa,
ǹ gɔnɔn nə́ ǹ kii la
ka lɔ bɛ́ lɔn a nɛ yɛ waáraa,
ǹ yɔrɔ n ziziɛ̃ nɛ.
7Koe n ka kɛ nɛ!
Lɛawaa baraa nɛ!
A kɔnbɔ ka lɛawaa kɔn nɛ wa!
Zakɔba tɔrɔn foo ziziɛ̃ lɛawaa nɛ,
sɛnɛ, ǹ tá re kanbiɛ.»
8Dɛnaa Lawa Pàãyiidɛnaa a da ǹ boo á ke: «Ǹ kɔn pinaa, ma á re ǹ sii ma ǹ bɔ pàã kɛ gɔn, ke ǹ wìi li ka zǔu bɛ́ lɔn. Ma á re ǹ zɔrɔkan kɛn niɛ̃ ma bɔ ǹ ganaa. Bɛa waáraa kəni, ǹ ba re bɛ̀rɛn biɛ tiin gɔn wa. 9Sɛnɛ, maǹ die dí nyɛɛ masɛ din Dɛnaa Lawa, ǹ Lawa nɛ. Ǹ tá re dí nyɛɛ ǹ kii Davida a kion min kɛ nɛ, ma á re koɛ ǹ mìi la.»
10 #
Zer 46.27-28
Dɛnaa Lawa a da ǹ boo á ke:
Nsɛ Zakɔba, maa dí-nyali,
nyɛ́ɛ nyan nə n kũ wa,
N gɔ̀nɔn nyan bìn da wa nsɛ Izirayeli.
Taãn nɛ, ma á re n kirisibiɛ,
ma n bɔ ma n bɔ gána sɔsɔɔn kɛn nɛ,
ma n nɛnyaanan kɛn waa bɛ̀rɛbaa ǹ bǎã nɛ,
ma da ǹ nɛ.
Zakɔba, n tá re n bɔyɛɛ n daa,
n giã kiĩ ni, yii-nyɛɛ gɔ́ɔ̃ nɛ.
Min kɔn ba re nyɛ́ɛ diɛ n ganaa doo wa.
11Masɛ Dɛnaa Lawa a da ǹ boo á ke:
Ma tá kunun n ni,
ma á n kirisibiɛ.
Ma wo n ne tɔrɔn mɛnɛn bii,
Ma á re bɛn tumaa bɔ̀nbiɛ.
Sɛnɛ, ma a re nsɛ bɔ̀nbiɛ wa.
Taãn nɛ,
ma a re n toɛ walan dɔlɔ baã wa.
Ma á re n doree ka peperebaa nɛ.
12Dɛnaa Lawa a da ǹ boo á ke:
N busulɛ lɛ á baraa,
n bayɛrɛ kɛ a nyɛɛ wa.
13Min kɔn ba n zia gii diɛ wa.
Busu n nyɛɛ lɛlɛ ǹ dun,
sɛnɛ, nsɛ wɔ kɛa dagòã banban.
14N sanan tumaa yiri bɔ n nɛ.
Ǹ laadoo ba n ganaa doo wa.
Zeruzalɛmu, má n dɛ ka zɔ́ɔ bɛ́ lɔn,
má dɔlɔ baraa bɔ n ganaa,
n sã gole kɛ laanka
n sii baraa damata kɛa lɛa.
15A n siɛ lɔn kəni n tá wuu pii
n busu kɛ
laanka n la paparɛɛ kɛ taman yii?
Min kɔn ba boe la a na a kaka kɔ wa.
N sã gole kɛ laanka
n sii baraa damata kɛa lɛa nɛ
má fuun kɛn da n mìi ni.
16Sɛnɛ, min mɛn tumaa basaã kɔ n nɛ,
ma á re basaã koe ǹ dɔn manɛ.
Ń zɔ́ɔn tumaa á re woe bɛ̀rɛbaa
ǹ bǎã nɛ.
Min mɛnɛn bɛ́ koɛɛn we n ne,
ǹ tá re koɛɛɛn we ǹ dɔn manɛ.
Min mɛnɛn bɛ́ mɛnɛɛ n la,
ǹ tá re mɛnɛɛ ǹ dɔn la.
17Nsɛ mɛn bɛ́ ǹ nə́ goã n bíi
"màn kooro"
*"Siɔn mɛn bɛ́ laadoo ba a ganaa wa",
ma á re n busulɛn nyɛɛ ma n kaka kɔ.
Masɛ Dɛnaa Lawa a da ǹ boo ne.
18Dɛnaa Lawa n kɛ pii:
Ma á re Izirayeli minin
lɛlɛ ǹ giã ǹ gɔn koe ǹ la.
Ma á re makara boe ǹ kion
minin ganaa.
Ǹ nə ǹ kiwin mɛnɛn yu,
ǹ tá re wusii ǹ bɛn dɔ ǹ bǎã nɛ,
ǹ kion sonboren kɛn nə ǹ lɛlɛ
bǎãn saa.
19Loe laanka foo kɔɔ̃nbaa ǹ lɛ-dɛ
á re boe walan.
Ma á re barka diɛ ǹ ganaa, ǹ mɔnaa.
Ma á re yii gugurubaa koe ǹ la.
Ǹ ba re ǹ puusə koe doo wa.
20Zakɔba tɔrɔn kɛn,
ǹ tá re n biɛ ka lɛlɛ bɛ́ lɔn.
A zaman lɛ gòã á re we tán
ma yɔrɔ-a.
Min woo min yoo ǹ ganaa,
ma á re yui bɛa dɛnaa gialaa.
21Dɛnaa Lawa a da ǹ boo á ke:
Ǹ dinin min goon nə die ǹ kiã biɛ.
Min mɛn bɛ́ re ǹ nyɛɛnaan boe,
ǹ dɛnaa n die yii ǹ dinin bii.
Ma á re toɛ a n mɔrɔ ma ganaa.
Die yii n we dinin
a n mɔrɔ masɛ gana a din li?
22Ka á re maa zaman biɛ,
ma dɔ á re kaa Lawa biɛ.
23Dɛnaa Lawa a piɛ̃ gole n die,
a foo yoo baraa puru.
Piɛ̃ gole n boe, kurunkurun gole ne,
a n kuĩ zɛ̀rɛdɛnan mìi ni.
24Dɛnaa Lawa a golee
ka a foo-yoo baraa kɛ-n wa,
yǎa bɛ̀ a din dùũ sii kɛ
nə́ n zɛnaa á nya ǹ mɛn waáraa.
Ǹ kɔn pinaa, ka á re a giala miɛ.
Currently Selected:
Zer 30: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
