Zer 21
21
Zeremii n boo binyəə koe Sedekiasi la
1Dɛnaa Lawa boon mɛnɛn da Zeremii ni kii Sedekiasi a paǹ li, ǹ nə́ ke. Kii lɛ na á goã á Malkia a nɛgiĩ Pasewuru laanka Maseya a nɛgiĩ Lawa a wúlu-bɔle Sefania dia Zeremii li mà ǹ wo pɛ-n kɛnɛn: 2#Kiin2 25.1-11; KZS2 36.17-21 «Bǐɛ̃ kɔ n nɔ̀n da Dɛnaa Lawa la wɔa lɛa. A giala, *Baabiloniin kii Nebukadenezɔɔrɔ yoo ka zia-n wɔ gialaa. Kɔntan, Dɛnaa Lawa á re kaãbaa sii zɛnɛɛ a na a wɔlɔ lui wɔ ganaa.» 3Zeremii nə́ ǹ lɛ si kɛnɛn: – Ka wo pɛ Sedekiasi ni: 4Dɛnaa Lawa, Izirayeli a Lawa n pii kɛnɛn: «Á ke, ziabaa ǹ mànan mɛnɛn bɛ́ ka gɔn ka n zia biɛ ǹ nɛ kaa zɔ́ɔ Baabiloniin kii laanka a sɔraasin ganaa, man die boe ǹ ne ziabaa ǹ kungɔn lɛ kio, ma da ǹ nɛ kiwi lɛ gɔ́ɔ̃ nɛ. 5Ma dinmaa n die zia biɛ ka ganaa ka maa foo-yoo baraa kɛ nɛ. Ma á re ma pàã laanka maa boo sii la nyɛɛ ka nɛ. 6Màn yiikoonaa mɛn tumaa bɛ́ kiwi lɛ nɛ, ma á re ǹ tumaa dii: Minbuiinin laanka tɔɔn. Piɛ̃ busu baraa á re ǹ tumaa dii. 7Bɛ kio, ma á re Zudaan kii Sedekiasi we Baabiloniin kii gɔn, ka a gána nyɛɛnaandɛnan nɛ. Kiwi lɛ a minin mɛnɛn yii goã koo piɛ̃ busu laanka zia ka bòo kɛ kio, ma á re bɛn dɔn we a gɔn. Ma á re ǹ kiɛ ǹ zɔ́ɔn pàã giulun, ǹ mɛnɛn lɛn bɛ́ zoɛ̃ ǹ gɛ̀ li. Nebukadenezɔɔrɔ á re ǹ dii ǹ gã. A re ǹ makara doɛ̃ wa, a re sabara biɛ wa, a re min kɔn toɛ a yii n koo wa.» Dɛnaa Lawa a da ǹ boo ne. 8Ǹ tá re pii zaman lɛ-n kɛnɛn: – Dɛnaa Lawa n kɛ pii: «Á ke, man yiikoonaabaa laanka gɛ̀ diɛ ka nyɛɛnɛ. 9Min mɛn tumaa bɛ́ re goɛ̃ Zeruzalɛmu, zia laanka bòo ka piɛ̃ busu n die bɛn dii. Sɛnɛ, min mɛnɛn bɛ́ re n dinin we *Baabilonii minin kɛn gɔn, kɛn zia diɛ ka-a, bɛn yii á re goɛ̃ koo. Ǹ tá re yiikoonaabaa sɛ kɔn yii. 10Dɛnaa Lawa a da ǹ boo á ke: Hiĩ, man die yui Zeruzalɛmu gialaa, ma baraa zɛnaa nɛ, bǐɛ̃ boo bie wa. Man die we Baabiloniin kii gɔn, a tɛ da a ganaa.»
Zudaan kii a boo gii
11Zudaan kii a sumu,
n too kɔ Dɛnaa Lawa a da ǹ boo li.
12Davida a sumu minin lɛn,
Dɛnaa Lawa a boo á ke:
Baayɛlɛ woo baayɛlɛ,
ka kiri pepere wɔ.
Ǹ bɛ́ mɛnɛɛ min mɛnɛn la,
ka ǹ gɔsɛ ka ǹ bɔ mɛnaa ma la wolen gɔn.
Bɛ bie wa, maa foo-yoo baraa
kɛ n die yui ka gialaa ka tɛ bɛ́ lɔn.
A n die màn tumaa kuĩ,
min kɔn ba re boe la a nimi wa
kaa zɛnaa ǹ sii baraan kɛn lɛa.
13Kasɛn mɛnɛn bɛ́ giã-n
nyankɔrɔ basa nɛ
ka gɛ̀fu la ǹ dɛnan nɛ,
Dɛnaa Lawa a da ǹ boo ne,
man die ka gialaa.
A giala, ka ǹ pii:
«Min kɔn ba boe la a dii a da
wɔ gialaa
hinlaa a wɔ wɔa kion wa.»
14Man die yui ka gialaa
a kɔnpɛ ka kaa zɛnaa ǹ siin ni,
Dɛnaa Lawa a da ǹ boo ne.
Ma á re tɛ diɛ kaa *Sɛdrə daã#21.14 Kànaa, sɛdrə daã lɛ n kii a kion giala pii Zeruzalɛmu, ǹ nə ǹ mɛn lɛ dɔ ka sɛdrə gɔn gigiã nɛ.
kɛ ganaa,
màn mɛn tumaa bɛ́ a lɛnpɛnɛ,
a na a tumaa kũ lenlen.
Currently Selected:
Zer 21: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
