Zer 12
12
1Nsɛ Dɛnaa Lawa, n tá pepere.
Sɛnɛ, man die kiri we kɔn ka n nɛ,
man li ma boo da n nɛ
peperebaa a paǹ li:
A n siɛ lɔn min baraan sii á bǐɛ̃
koe kanaa,
bɔlɔgoonbǎãdɛnan tá yii-nyɛɛ la?
Bɛ n siɛ lɔn?
2Ń nə́ ǹ zumu, ǹ gòonən nə́ wɔ tán,
ǹ nə́ gole kɔ ǹ nə́ nɛ kɔ.
Ń tɔ nə ǹ lɛ-n biikoo yii li,
sɛnɛ, ǹ foo wɔlɔ n sɔsɔɔ n ganaa.
3Sɛnɛ, Dɛnaa Lawa, ń tá ma doɛ̃,
ń yii tá ma-a.
Ń tá doɛ̃ ma man kunun n ni
ka ma foo din tumaa nɛ.
Min baraan kɛn kaa para-a ka
sèren bɛ́ lɔn,
ǹ nə́ woe ǹ bɔlɔ kuri.
Ǹ kaa ǹ gɔrɔn dɔlɔ pinaa kɛ
taman yii!
4Gána lɛn die goɛ̃ koe ne yǎa biĩ kəni? Wurun man die goɛ̃ tán gere lɛa yǎa biĩ? Tɔɔn laanka bàanan man bɔ̀n biɛ minbuiin nɛn baraabaa taman yii. Maǹ pii: «Sii mɛn bɛ́ re wɔ yii, Dɛnaa Lawa yii ba re bɛ yii wa.»
5Dɛnaa Lawa pɛ ma nɛ:
Min mɛnɛn bɛ́ baa sii ǹ gòã nɛ,
bɛ̀ n boo la ń kɔ bɛn kio lɛ wa,
ma n die siɛ lɔn n dɔ sùin ganaa?
Gána mɛn bɛ́ là nyantoro ná a nɛ,
bɛ̀ n tá yii-nyɛɛ la bɛ dinsɔɔ̃ gɔ́ɔ̃ nɛ,
ma n die n biɛ lɔn Zurdɛ̃ tà
lɛ-a tewonən kɛn nɛ?
6Sonbore, n tanlɛ minin laanka n sumu lɛ minin dinin manə n yiri siɛ̃. Maǹ nə n lɛ dii n ganaa. Ta maǹ boo diɛ n nɛ sɔnbɔraanɛ, n nyan nə n foo doa ǹ ganaa wa.
Dɛnaa Lawa nə n la boe a kíɛ̃ ganaa
7Má n la bɔ maa kion ganaa,
màn mɛn bɛ́ maa wɔ lɛa,
má bɛ toa walan.
Zaman ke má n narɛ taãn-taãnɛ,
ma nə ǹ we ǹ zɔ́ɔn gɔn.
8Maa wɔ bɛ́ ka min mɛnɛn nɛ,
bɛn giã ǹ gɔn na á goã ka yàran
bɛ́ lɔn daã nɛ.
Ǹ nə́ lɛ baa ma ganaa,
bɛ lɛ nɛ, ǹ tìĩ bɔ ma nyin ni.
9Maa wɔ bɛ́ ka min mɛnɛn nɛ,
bɛn man nə́ n baa ka bàan sisia
bɛ́ lɔn,
zèwon nə́ piɛ̃ nɛ a ganaa?
Ka gòon màn tumaa sɔkɔn,
ǹ da màn bii!
10Tɔɔ-lɛduə̃li gigiã maa rezɛ̃
wuru ziziɛ̃.
Ǹ nə́ maa wuru tɔtɔrɔ.
Maa bǎã kɔɔ̃n ke,
ǹ nə́ bɛ bɔyaa ǹ nə́ baa diə gole lɛa.
11Sonbore, maǹ nə́ bɔyaa ǹ nə́
baa gána ziziɛ̃ lɛa,
piɛ̃-n ka gɛ̀ koa nɛ.
Ma yɔrɔ-a, bǎã tumaa n diə gole lɛa.
Gána lɛ tumaa ziziɛ̃.
A min kɔn din yii li ǹ sii lɛa wa.
12Diə gole a kele mìi kooro-an
kɛn tumaa la,
basaã-kɔlen man die.
Dɛnaa Lawa màn tumaa ziziɛ̃
a kũ gána paǹ goon kɛ ganaa
a wo a paǹ kɔsɔ kɛ yaa.
Yii-nyɛɛ banban min kɔn wɔ lɛa wa.
13Ká *belee da,
sɛnɛ, ka n nyan kuri.
Ká nɔmaa wɔ,
sɛnɛ a là goon din ba ka ganaa wa.
Kaa kaa-piɛ mànan kɛn man sìi lɛa,
Dɛnaa Lawa a foo yoo baraa
kɛ taman yii.
Izirayeli miãkɛn baraan
14Dɛnaa Lawa boo mɛn da Izirayeli miãkɛn baraan kɛn wɔ paǹ li, ǹsɛn mɛnɛn nə n gɔn da gána kɛ ganaa má kɔ Izirayeli la kíɛ̃ lɛa, á ke: «Man die ǹ woɛ̃ ma ǹ bɔ ǹ tán la. Man die Zudaa zaman woɛ̃ ma bɔ ǹ bii. 15Bɛ kio, ǹ makara á re wusii a ma kũ doo. Ma á re woe didie tumaa nɛ a tán la, a gána nɛ. 16Maa zaman lɛ miãkɛnɛn nə́ maa zaman lɛ daraa lɛ kɔ wɔ ganaa ka *Baali tɔ nɛ. Sɛnɛ, maa zaman kɔnbɔ ka giã ǹ gɔn mɛn nɛ, bɛ̀ ǹ nə́ n daraa bɛ ganaa, bɛ̀ ǹ nə́ n liɛ ka masɛ Dɛnaa Lawa Yiikoonaa tɔ nɛ, ka bɛ-n kəni, ǹ tá re giã ǹ bǎã yii maa zaman lɛ bii. 17Sɛnɛ, bɛ̀ bɛa tɔrɔn lɛn mɛn nə n too kɔ ma lon wa, man die siɛ ma bɔ a tán la, ma wɔ gɛ̀ gɔn duduu.» Dɛnaa Lawa a da ǹ boo ne.
Currently Selected:
Zer 12: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
