SYB 3
3
1Izirayeli minin mɛnɛn tumaa bɛ́ ǹ Kanaan gána a zian kɛn kɔn yɛ wa, Dɛnaa Lawa na á bɛa tɔrɔ lɛn toa walan, a tá ǹ diɛ ǹ gɔ́ɔ̃ li ni. 2A na á goã giɛ kɛ dinsɔɔ̃ li: Zia bɛ́ màn mɛn lɛa, Izirayeli tɔrɔn lɛn nɛnyaanan nə n daraa a ganaa ǹ dɔ̃, sanparɛ ǹ mɛnɛn lɛn dinin bɛ́ ǹ màn kɔn dɔ̃ zia a sii gɔ́ɔ̃-n lɛlɛ wa. 3Bɛa tɔrɔn lɛn nə́ ke: Filisitin kii sooro kɛa gána minin manɛ, Kanaan gána minin tumaa nɛ, Sidɔn kiwi minin ni, ka Ivii tɔrɔn mɛnɛn bɛ́ ǹ nə́ goã giã-n Liban kelen kɛn la, a saa Baali-Ɛrmɔn kele ganaa a wo yǎa Lebo-Amaati kiwi a wɔ ǹ bǎã nɛ. 4Dɛnaa Lawa na á bɛa tɔrɔn lɛn toa walan a tá n diɛ Izirayeli minin lɛn gɔ́ɔ̃ li ni, màn mɛn bɛ́ toɛ a dɔ̃, bɛ̀ ǹ tá re asɛ a gɔn waa ǹ boon kɛn tamaɛ, asɛ nə ǹ mɛnɛn lɛn kɔ Muizu la mà a ǹ kɔ ǹ digolon la. 5Izirayeli minin lɛn nə́ giã kun ka Kanaan minin lɛn nɛ, Ɛti tɔrɔn nɛ, Amɔɔrɔ wɔn nɛ, Perɛzi wɔn nɛ, Ivii laanka Zebuzu tɔrɔn nɛ. 6Ǹ nə́ bɛa tɔrɔn lɛn nɛlɔn goa lɔn lɛa, ǹ dɔn nə́ ǹ nɛlɔn kɔ bɛn nɛgiĩn la. Ǹ nə́ dí nya ǹ lawan manɛ.
Sii yɔrɔ-bɔlen
Ɔtniyeli
7Sii mɛn bɛ́ baraa Dɛnaa Lawa yii li, Izirayeli minin lɛn nə́ bɛ zɛnaa. Dɛnaa Lawa lɛ, ǹ Lawa lɛa, ǹ yiri bɔ ka bɛ nɛ, ǹ nə́ dí nya *Baalin manɛ, ka Aseeraan#3.7 Kanaan minin gɛrɛsiɛ yɛ ǹ dìn manɛ. nɛ.
8Bɛ lɛ nɛ, Dɛnaa Lawa foo yoo Izirayeli minin lɛn li, á ǹ kɔ Mezopotamiin kii Kusan-Risitayimu la. Izirayeli minin lɛn nə́ goã Kusan-Risitayimu a pàã giulun, lɛ̀ kiwisi gɔ́ɔ̃ nɛ. 9Bɛ kio, ǹ nə́ n lɛ dɛ Dɛnaa Lawa ganaa. Dɛnaa Lawa dɔ́ kirisibaali bɔ á kɔ ǹ la, á ǹ kirisibaa. Bɛ n ka Kalɛbu ǹ diɛ̃ Kenaazi a nɛgiĩ Ɔtniyeli ni. 10Dɛnaa Lawa yiri goã la, á goã Izirayeli minin lɛn sii yɔrɔ boe. Á woo zia baa, Dɛnaa Lawa Aramun kii Kusan-Risitayimu wɔ a gɔn, á boo Kusan-Risitayimu la. 11Gána lɛ tɔ́n goã susui la lɛ̀ pusi gɔ́ɔ̃ nɛ. Bɛ kio, Kenaazi a nɛgiĩ Ɔtniyeli gã.
Ewuudu
12Sii mɛn bɛ́ baraa Dɛnaa Lawa yii li, Izirayeli minin lɛn nə́ wusoo ǹ ná a giala kɔ, ǹ nə́ bɛ zɛnaa. Bɛ lɛ nɛ, Dɛnaa Lawa Moabun kii Egulɔn foo taã á da Izirayeli minin lɛn ganaa. A giala, ǹ goã sii mɛn zɛnɛɛ, bɛ na á goã baraa Dɛnaa Lawa yii li. 13Egulɔn Amɔn tɔrɔ laanka Amalɛki tɔrɔn kaa kun ka a din ni, á woo zia baa Izirayeli minin lɛn ganaa. Ǹ nə́ Izirayeli minin lɛn dɛ, ǹ nə́ sèwo dan kiwi kɛ si. 14Izirayeli minin lɛn nə́ bɛ̀rɛbaa ǹ dí nya Egulɔn nɛ lɛ̀ fulukiwisi gɔ́ɔ̃ nɛ. 15Bɛ kio, Izirayeli minin lɛn nə́ n lɛ dɛ Dɛnaa Lawa ganaa. Dɛnaa Lawa dɔ́ kirisibaali bɔ á kɔ ǹ la. Bɛ n ka Geraa a nɛgiĩ Ewuudu ni. Bɛnzamɛn tɔrɔ nɛ, a na á goã gɔsɛ-a lɛa. Izirayeli minin lɛn ná asɛ dia ka bǐɛ̃baa ǹ mànan nɛ, mà a wo ǹ kɔ Moabun kii Egulɔn la.
16Ewuudu gɔya sa kɔn zɛnaa, a lɛn paanan nə́ lɛ boe, a sasabaa n mɛtərə talɛɛ. Á bɛ lɛ da a mɔnaa giulun, a gusin a gisi ganaa. 17Ewuudu dɔ, á bǐɛ̃baa ǹ mànan lɛn kɔ Moabun kii Egulɔn la. Egulɔn na á goã min kasiɛ̃ lɛa taãn-taãnɛ. 18Ewuudu bɛ́ á bǐɛ̃baa ǹ mànan lɛn kɔ á nya lɔn, min mɛnɛn nə ǹ gũ ǹ nə́ daa ǹ nɛ, á woo bɛn da zii. 19Sɛnɛ, a bɛ́ á dɔ dìn bǎã kɛ nɛ, kunu Gilgaali li, á n bɔyaa á woo pɛ kii-n kɛnɛn: «Kii ganaa, boo durii kɔn tá masɛ li ma pɛ n nɛ.» Kii tɔ́n pɛ a dí-nyalin manɛ mà ǹ soo ǹ nə ǹsɛn dininsɔɔ̃nɔn toa walan. Min mɛn tumaa goã kii li, bɛn nə́ soo kanaa. 20Ewuudu nə́ n zɔ̃ á dɔ Egulɔn li, bɛ̀ a n giã-n tán sanabolo nyantoto kɛ nɛ, ǹ mɛn lɛ bɛ́ a dinsɔɔ̃ a giã ǹ bǎã lɛa. Ewuudu tɔ́n pɛ nɛ: «Lawa a boo tá masɛ lɛ-n ma pɛ n nɛ.» Kii lɛ yoo á n bɔ a kii dankan la. 21Ewuudu nə́ n gɔsɛ lɛ dia, á gɔya sa lɛ woɛ̃ a gusin a gisi ganaa, á dere kii nɔ̀ nɛ. 22Gɔya lɛ a nàn nɛ, ka a yii ni, a tumaa wɔ, nyɔɔ yoo á n pɛnɛ gɔya nàn lɛ ganaa. A giala, Ewuudu gɔya sa lɛ woɛ̃ á bɔ kii nɔ̀-n wa. A na á fɔ̃ á soo a gòãn biin ni. 23Bɛ kio, á sanabolo lɛ a kiɛnlɛ kũ á tã lɛ á sɔɔ, a din soo ka kikio ne. 24Ewuudu bɛ́ á soo, kii a dí-nyalin nə́ daa ga. Ǹ nə́ sanabolo lɛ a kiɛnlɛn yɛ soɛ nɛ, ǹ nə́ tɔ́n pɛ mà ǹsɛn nə́ waa la, mà a na a gòɛrɛ koe kion nyantoto kɛ nɛ. 25Ǹ nə́ n yii da ǹ nə́ fɔ̃, a tɔn sanabolo lɛ a kiɛnlɛn buĩ wa. Ǹ dinin nə́ tɔ́n goo nɛ saa, ǹ nə́ kiɛnlɛ bũ, ǹ nə́ woo ǹ dɛnaagiĩ lɛ yaa, bɛ̀ á ke á gã, á n lɛ bɔ tán. 26Ǹ bɛ́ golee n yii diɛ foɛ̃ biikoo mɛn li, bɛ̀ Ewuudu dinmaa kɛ baa si, á dìn bǎã kɛ na, á n woe Seyira kiwi ganaa.
27A din dɔ walan lɔn, a na á bɛn pɛ Efrayimu a kele yii kɛ nɛ. Izirayeli minin lɛn nə́ gisĩ kun ni ǹ nə́ n bɔ kele lɛ la, a din nə́ ǹ nyɛɛnɛ. 28Á pɛ ǹ nɛ: Ka kɔ ma kio lɛ, a giala, Dɛnaa Lawa kaa zɔ́ɔ Moabu minin lɛn wɔ ka gɔn. Ǹ nə́ gisĩ, ǹ nə́ kɔ lɛ. Ǹ nə́ zii tã Moabu minin ganaa Zurdɛ̃ tà gòã nɛ, ǹ toa min kɔn kiɛ̃ wa. 29Bɛa biikoo li, ǹ nə́ Moabu minin lɛn dɛ, giĩ duu fù kɛ miã, ǹ tumaa min gegere, ǹ foo dɔ n tã. Ǹ kɔn nə n si á la wa. 30Bɛa pinaa kɛ lɛ nɛ, Izirayeli minin nə́ sìi da Moabu minin ganaa, gána lɛ tɔ́n goã susui la lɛ̀ pɔkiwisi gɔ́ɔ̃ nɛ.
Sangaara
31Ewuudu kio na á n baa Anaati a nɛgiĩ Sangaara lɛa. Asɛ na á Filisiti minin lɛn giĩ biɛsɔrɔ dɛ ka diin lɛduə ǹ bàlà nɛ. A dɔ́ Izirayeli minin lɛn kirisibaa.
Currently Selected:
SYB 3: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
