SYB 2

Izirayeli minin Lawa bɔlɔ tii

1Dɛnaa Lawa a lon a dia dí-a wole nə́ n toa Gilgaali, á woo Bokimu á pɛ: – Ma din ni má ka waa Ezipti má soo ka nɛ. Man má woo ka kaa gána kɛ nɛ, ǹ mɛn lɛ bɛ́ má n lɛ kɔ ka digolon la ka a sii ni. Má n liɛ má pɛ: «Ma lɛ kɔ kɔn la mɛn wɔ ka ka nɛ, ma a re bɛ toɛ̃ duduu wa.» 2#BBN 34.12-13; TDP 7.2-5 Kasɛn dɔn, ka nyan toa ka lɛ kɔ kɔn la wɔ ka gána kɛa minin ni wa. Wúlu bɔ ǹ bǎãn kɛn, ka bɛn yu. Sɛnɛ, ka n too kɔ masɛ lon wa. Wàa mɛn sii n ka kɛ nɛ ka zɛnaa? 3Bɛ lɛ n ke má pɛ máa ma a re ǹ lui ma ǹ bɔ ka nyɛɛn doo wa. Ǹ dinin lɛn man die fuu nyɛɛ ka nɛ, ǹ dìn kɛn tá re ka kũ ǹ kan biɛ. 4Dɛnaa Lawa a lon a dia dí-a wole lɛ bɛ́ á bɛa boon lɛn da Izirayeli minin lɛn tumaa nɛ á nya, zaman lɛ kaa wuu-n kɔsɛkɔsɛ. 5Ǹ nə́ bɛa bǎã lɛ bíi mà Bokimu#2.5 Bokimu: Bɛ giala, mà min mɛnɛn bɛ́ wuu pii., ǹ nə́ wúlu mànan kɔ Dɛnaa Lawa la walan.

Zozoe a gɛ̀

6Zozoe nə́ n gɔn bɔ zaman lɛ ganaa. Bǎã mɛn dɔ Izirayeli minin lɛn gogoonmaa ganaa, didie woo giã a wɔ nɛ, gána lɛ nɛ. 7Zozoe yii goã koo biikoo mɛn tumaa li, min golen mɛnɛn dɔn yii goã koo Zozoe kio ǹ nə́ Dɛnaa Lawa a nya ǹ dí gole kɛ yɛ Izirayeli minin lɛn wɔ paǹ li, zaman lɛ dí nya Dɛnaa Lawa nɛ, bɛn biikoo lɛ tumaa gɔ́ɔ̃ nɛ. 8#Zoz 19.49-50 Dɛnaa Lawa a dí-nyali Nunu a nɛgiĩ Zozoe lɛ bɛ́ giɛ̃, bɛ̀ a lɛ̀ paabiɛ ka fù (110) ni. 9Bǎã mɛn dɔ a ganaa kíɛ̃ lɛa Timinaati-Seraa kiwi, ǹ ná a gere bĩ walan, Efrayimu tɔrɔn kele yii kɛ nɛ, Gaasi kele a gɔsɛ a lɛ̀gɔn la. 10Bɛa biikoo kɛ lɛ a minin tumaa daa ǹ nə́ gã. Ǹsɛn kio, min kɔsɔn nə́ yoo. Sɛnɛ, bɛn nə goã Dɛnaa Lawa doɛ̃ wa, a dí mɛn tumaa nya Izirayeli minin wɔ paǹ li, ǹ goã bɛ dɔ doɛ̃ wa.

Piã ka Lawa nɛ laanka a dɔlɔ

11Sii mɛn bɛ́ baraa Dɛnaa Lawa yii li, Izirayeli minin lɛn man nə́ bɛ zɛnaa, ǹ nə́ dí nya *Baalin manɛ. 12Ǹ nə́ Dɛnaa Lawa toa walan, ǹ digolon Lawa lɛ, asɛ mɛn bɛ́ á ǹ waa Ezipti gána nɛ á soo ǹ ne. Ǹ nə́ dìn guguru kɔ, tɔrɔn kɛn lɛn wɔn bii, tɔrɔn mɛnɛn lɛn nə goã ǹ lɛnpɛnɛ. Ǹ nə́ kaa tán bɛn yɔrɔ-a ǹ nə́ ǹ guguru kɔ, ǹ nə́ wɔ Dɛnaa Lawa lon. 13Ǹ nə́ Dɛnaa Lawa toa walan, ǹ nə́ dí nya Baalin laanka *Asitarteen manɛ. 14Dɛnaa Lawa foo yoo Izirayeli minin lɛn li. Á ǹ wɔ basaã-kɔlen gɔn, ǹ nə́ basaã kɔ ǹ nɛ. Ǹ zɔ́ɔn mɛnɛn nə goã ǹ lɛnpɛnɛ, á ǹ kɔ bɛn la. Ǹ boo la ǹ nə́ golee ǹ zɔ́ɔn lɛn yɔrɔ-a doo wa. 15Ǹ soo a wo zia baa gogoonmaa yii, Dɛnaa Lawa gɔn na á goã ǹ gialaa, á ń baraa zɛnɛɛ ǹ nɛ, ka a din bɛ́ á goã á pɛ ǹ nɛ lɔn, á n liɛ ǹ nɛ. Á nɔmaa baa ǹ ganaa parsiini. 16Bɛ lɛ nɛ, Dɛnaa Lawa tɔ́n sii yɔrɔ-bɔlen bɔbɔ, bɛn nə́ goã ǹ sisii ǹ basaã kɔman wolen lɛn la. 17Sɛnɛ, ǹ goã n too koe ǹ sii yɔrɔ-bɔlen lɛn dɔn dinin lon wa. Maǹ nə́ goã dí nyɛɛ dìn manɛ, bɛ̀ ǹ kaa tán bɛn yɔrɔ-a, bɛ̀ ǹ nə ǹ guguru kɔ. Ǹ digolon mɛnɛn nə n too kɔ Dɛnaa Lawa a dí-pɛn kɛn li, bɛn nə zii mɛn saa, ǹsɛn nə́ kanaa fufuu ǹ nə́ n bɔ bɛ la. Ǹ zɛnaa ka ǹ digolon lɛn wɔ bɛ́ lɔn wa. 18Bɛ̀ Dɛnaa Lawa sii yɔrɔ-bɔle bɔ á kɔ ǹ la lɔn, Dɛnaa Lawa n goɛ̃ kun ka bɛa sii yɔrɔ-bɔle lɛ nɛ. A na á goã ǹ sii ǹ zɔ́ɔn la sii yɔrɔ-bɔle lɛ a yiikoonaabaa tumaa gɔ́ɔ̃ nɛ. A giala, min mɛnɛn nə goã fuu nyɛɛ ǹ nɛ, ǹ nə́ boe ǹ yii ni, ǹ goã ginii mɛn we bɛn yɔrɔ-a, bɛ lɛ na á toa ǹ makara Dɛnaa Lawa kũ. 19Sɛnɛ, bɛ̀ sii yɔrɔ-bɔle lɛ gã lɔn, maǹ wusii bɛ̀ ǹ gɔgɔrɛbaa ǹ sii zɛnaa a la ǹ digolon kɛn wɔ nɛ. Maǹ nə́ goã koe lawa kɔsɔn lɛ, ǹ nə́ dí nyɛɛ bɛn manɛ, bɛ̀ ǹ kaa tán ǹ yɔrɔ-a, bɛ̀ ǹ bɛn guguru kɔ. Ǹ goã ǹ zɛnaa ǹ sii babaraan kɛn laanka ǹ too kakabaa ǹ sii kɛ kɔn kiɛ wa.

Lawa a da Izirayeli minin gɔ́ɔ̃ li

20Dɛnaa Lawa foo yoo Izirayeli minin lɛn li, á tɔ́n pɛ: «Tɔrɔ kɛ lɛ a minin nə́ maa lɛ kɔ kɔn la ziziɛ̃, lɛ kɔ kɔn la kɛ lɛ má wɔ ka ǹ digolon ne. Ǹ nə n too kɔ maa boo-a wa. 21Bɛ lɛ nɛ, masɛ a die tɔrɔn kɛn lɛn kɔn lui ma bɔ ǹ nyɛɛn doo wa, Zozoe nə ǹ mɛnɛn lɛn toa ǹ bǎã nɛ á tɔ́n gã. 22Dɛnaa Lawa na á n da Izirayeli minin lɛn gɔ́ɔ̃ li ka bɛn lɛn sii ni. A na á goã giɛ li a dɔ̃, bɛ̀ ǹ tá re asɛ a zii kɛ tamaɛ, ǹ kɔ lɛ ka ǹ digolon bɛ́ ǹ nə́ zɛnaa lɔn hinlaa bɛ̀ ǹ ba re zɛnɛɛ miɛ̃ wa.» 23Bɛ lɛ nɛ, Dɛnaa Lawa toa bɛa tɔrɔn lɛn nə́ goã, a ǹ wɔ Zozoe gɔn wa, a ǹ loo fufuu dɔn wa.

Currently Selected:

SYB 2: SBPE2011

Highlight

Copy

Compare