Iza 51
51
Kirisibaa mɛn bɛ́ lɛ dan ba la wa
1Dɛnaa Lawa n kɛ pii:
Ka n too kɔ ma lon,
kasɛn mɛnɛn bɛ́ giɛ peperebaa li,
ka n li mà ka Dɛnaa Lawa dɔ̃.
Ka ga gɛ̀fu kɛ ganaa ǹ nə́ ka
sɛlɛ a nɛ,
ká yala kɛ nɛ ǹ nə́ ka bɔ a nɛ.
2Ka ga ka di Abrahamu ganaa,
ka Saaraa kɛ nɛ á ka yɛ.
Ma bɛ́ bíi, bɛ̀ a nɛ banban.
Sɛnɛ, má barka da a ganaa,
má baa zaman gigiã digolo lɛa.
3Dɛnaa Lawa n *Siɔn foo doɛ,
a na a kɛbɔlɔn foo doa.
A n die bɛa kɛbɔlɔn lɛn bɔyɛɛ
a baa dù gɔrɔ lɛa,
a tán gere kɛ baa Edɛn
dù gɔrɔ lɛa.
Foo kɔɔ̃n laanka nyɛnyɛɛ n
die goɛ̃ a nɛ,
tɔ bɔ ǹ loen ne, ka sàn kɔ
ǹ mànan wuun ni.
4Kasɛn maa zaman,
ka n too kɔ ma lon!
Kasɛn maa tɔrɔn lɛn, ka n too da!
Ma din nə die dí-pɛn koe,
ma bɛ́ re kiri mɛn kuri ka la,
á re tɛ fúlu koe tɔrɔn la.
5Peperebaa mɛn bɛ́ ma á die ne,
á diri.
Kirisibaa biikoo dɔ.
Man die kiri we tɔrɔn ganaa
ka pàã gole ne.
Tɔrɔn mɛnɛn bɛ́ mu nə́
ǹ gánan da bii,
bɛn tá re n foo doɛ ma ganaa.
Ǹ tá re n foo doɛ ma pàã ganaa.
6Ka n yii saa lon, ka ga.
Ka n yii kɔ, ka ga tán.
Lon tá re papaɛ̃ ka tɛmaa bɛ́ lɔn.
Tán tá re pɔpɔsɛ ka mɔnaa bɛ́ lɔn.
Min mɛnɛn dɔn bɛ́ giã-n la,
ǹ tá re giɛ̃ ka nyuunun bɛ́ lɔn.
Sɛnɛ, kirisibaa lɛ n goɛ̃ duduu.
Ma bɛ die ka peperebaa mɛn nɛ,
a re nyɛɛ duduu wa.
7Kasɛn mɛnɛn bɛ́ peperebaa doɛ̃,
ká n maa dí-pɛ tamɛɛ ka foo ne,
ka n too kɔ ma lon.
Ka nyan nyɛ́ɛ baa minbuiinin
sɔ kɔ-n wa.
Ka yiri nyan nə n lɔlɔkɔn
ǹ yaa wɔ ma-a kɛ taman yii wa.
8A giala nimii á re ǹ kuĩ
ka mɔnaa bɛ́ lɔn.
Màn baaran tá re ǹ soɛ̃,
ká mɔnaa nɔnɔɔ bɛ́ lɔn.
Sɛnɛ, ma bɛ́ die ka
peperebaa mɛn nɛ,
a re nyɛɛ duduu wa.
Kirisibaa lɛ n die goɛ̃ biɛ̃
ǹ tɔrɔn tumaa wɔ lɛa.
Dɛnaa Lawa, n pàã nyaa
9N yii kaa Dɛnaa Lawa, n yii kaa!
N pàã gole nyaa.
N yii kaa ka lɛlɛ lɛlɛ bɛ́ lɔn.
N din bie ń goã ń màn
baraa Rahabu dɛ,
ń yìsi mu li ǹ tɔɔ babaraa
piɛ̃ wole kɛ fɔ̃ wa?
10N din bie ń goã ń yìsi mu
gole kɛa mu piɛ̃ wa?
N din nə n zii bɔ yìsi mu giala-n,
màn mɛn bɛ́ toɛ,
n min mɛnɛn si n nə́ ǹ kaa,
bɛn nə boo la ǹ kiɛ̃.
11A din yii goon ne:
Dɛnaa Lawa min mɛnɛn si
á ǹ kaa,
ǹ tá re n bɔyɛɛ ǹ daa,
ǹ wo Siɔn ka foo kɔɔ̃n lɛ-dɛ nɛ.
Ǹ yɔrɔ n die goɛ̃ foo kɔɔ̃n lɛa
yǎa duduu.
Foo kɔɔ̃n laanka nyɛnyɛɛ n
die koe ǹ lɛ.
Nɔmaa laanka foo-ziziɛ̃ wɔlɔ
á re lui ǹ ganaa.
Dɛnaa Lawa n foo doɛ
12Ma din nə foo doa koe ka la.
Sonbore, ma din ni!
Maa zaman, a n siɛ lɔn
ka á nyɛ́ɛbiɛ
minbuiin nɛn manɛ?
Ǹ tumaa n giɛ̃,
maǹ nə n gɔn nyɔmiɛ ka buu bɛ́ lɔn!
13N yiri bɔ ka Dɛnaa Lawa nɛ,
a da yaa a din na á n da.
A din ni á lon lɛ bɔ, á tán zɛnaa.
Biikoo tumaa li,
n gɔ̀nɔn nə bìn diɛ nyɛ́ɛ gɔn
pàã-zɛnaali kɛa foo-yoo nyɛɛnɛ,
ka n pɛ mà a n die n nyin boe.
Sɛnɛ, bɛa pàã zɛnaali lɛ a foo-yoo
á maa kəni?
14Kànaa ka boɛɛn nɛ,
kòso nɛ mɛn bɛ́ bɔ ǹ lɛ ba la wa,
ǹ tá re bɛ boe ǹ da.
A re giɛ̃ kòso-n wa,
màn-bii á re nyaabiɛ a ganaa
doo wa.
15Sɛnɛ, masɛ nə n Lawa,
Dɛnaa Lawa lɛa.
Ma din nə bìn diɛ yìsi mu
gole ganaa,
ma mu yoo wole da ginii ganaa.
Ma tɔ n Dɛnaa Lawa Pàãyiidɛnaa.
16Hiĩ, má maa boo wɔ n lɛ-n
má n duru ma gɔn wúlu li,
masɛ mɛn lon lɛ bɔ,
má tán zɛnaa,
má pɛ Siɔn nɛ:
«Ma n maa zaman lɛa.»
Zeruzalɛmu doamaa nɛ a wusoo a n foo taã
17 #
SNS 14.10; 16.19 Zeruzalɛmu, n yii kaa!
N yii kaa, n yoo n golee lon!
Dɛnaa Lawa goã á n da foo-yoo ǹ paan
kɛa mu mii ganaa.
Ń mi lenlen, á n yii tii.
18N nɛnyaan mɛn tumaa yɛ,
ǹ kɔn bin nə n nyɛɛnaan bɔ wa,
n nə ǹ mɛnɛn tumaa too,
ǹ kɔn bin nə n kũ n gɔn
ganaa wa.
19Koe nə́ n yɛ kɔn kio màn papaa:
Kakaarɛbaa laanka basaã,
bòo laanka zia.
Sɛnɛ, die n die gú we n la kəni,
die n die n foo doɛ?
20N nɛnyaanan man tán-a
zii tumaa mìi ni,
pàã ba ǹ lon wa,
ka don a luu bɛ́ lɔn kan kũ,
Dɛnaa Lawa a foo yoo taman yii,
n Lawa a paraa-mali kɛ
taman yii.
21Bɛ lɛ nɛ, nsɛ koe-yɛli,
n too kɔ sɔnbɔraa nɛ.
Ma n ka min mɛn bɛ́ duvɛ̃
ná a yii kũ,
a da yaa n duvɛ̃ dɔ mi wa.
22N Lawa, n Dɛnaa Lawa n kɛ pii
asɛ mɛn bɛ́ a zaman a zia gii diɛ:
Hiĩ, maa foo-yoo ǹ paan ke
n ná a mu mi, á n yii tii,
ma á re bɛ sii ma bɔ n gɔn.
N ba re a mu mii doo duduu wa!
23Min mɛnɛn bɛ́ boe n yii ni,
man die paan lɛ we bɛn gɔn.
Maǹ nə́ goã pii n ganaa kɛnɛn:
«Waa tán, wɔ tɔ wɔ n la!»
N dɔ̀ɔ̃ na á goã kiɛ̃ ǹ bǎã lɛa,
zii lɛa ǹ nə́ tɔ we la.
Currently Selected:
Iza 51: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
