Iza 49
49
Izirayeli n tɔrɔ kɔsɔn tɛ fúlu lɛa
1 #
Zer 1.5
Kasɛn, gánan kɛn mu ka da bii,
ka n too kɔ ma lon.
Tɔrɔn mɛnɛn bɛ́ tìãlɛa,
ka n yiri kɔ.
Dɛnaa Lawa ma bíi,
bɛ̀ ma tɔn yɛ wa.
Ma bɛ́ tɔn ma dan gɔ́ɔ̃ nɛ,
á ma bii ka ma tɔ nɛ.
2 #
Ebr 4.12; SNS 1.16 Á maa boo baa gɔya sa
lɛ-bɔle lɛa,
Á ma duru a gɔn wúlu li.
Á ma baa kiɛ lɛ pɛpɛnɛ lɛa,
á ma duru a kòã nɛ.
3Á pɛ ma-n kɛnɛn:
«Maa dí-nyali n ka
n din ni Izirayeli.
Man die maa tɔ golebaa nyɛɛ
ka n din ni.»
4Má tɔ́n pɛ ma din gɔ́ɔ̃ nɛ:
Man má mɛnaa ma din la,
man din nɔmaa kooro,
a là dɔ ná a banban.
A da yaa,
Dɛnaa Lawa n die
peperebaa zɛnɛɛ ma nɛ,
maa saraa n boe maa Lawa li.
5Kanna kəni, Dɛnaa Lawa pɛ,
mà asɛ din na á ma zɛnaa
ma dan gɔ́ɔ̃ nɛ,
mà ma asɛ a dí-nyali baa,
màn mɛn bɛ́ toɛ ma da ka
Zakɔba tɔrɔn nɛ asɛ li,
ma Izirayeli tɔrɔn sɔkɔn
bǎã goon ne, asɛ wɔ lɛa.
Ma á re gugurubaa yii
Dɛnaa Lawa yɔrɔ-a.
Maa Lawa n ma pàã lɛa.
6 #
Iza 42.6; Luk 2.32; NDS 13.47; 26.23 Á pɛ ma nɛ:
N bie re maa dí-nyali dinsɔɔ̃ biɛ,
n Zakɔba tɔrɔn goa n nə
ǹ kaa lon,
Izirayeli min mɛnɛn yii goa koo,
n da ka bɛn nɛ wa.
Man die n biɛ tɔrɔn tɛ fúlu lɛa,
màn mɛn bɛ́ toɛ maa kirisibaa
dɔ kanaa lɛ dan ganaa.
Izirayeli a wo bɛ̀rɛbaa ǹ bǎã-n wolen bɔyaa
7Dɛnaa Lawa pɛ,
asɛ mɛn bɛ́ Izirayeli si sii la
wole lɛa,
a n Izirayeli a Lawa sonbore lɛa.
A n kɛ pii n ni,
nsɛ mɛn bɛ́ ǹ nə́ n pɔpɔsɛ,
n tìĩ n boe-n zaman nɛ,
nsɛ mɛn bɛ́ kii kakaarɛn bɛ̀rɛ lɛa:
«Bɛ̀ kiin nə́ n yɛ,
ǹ tá re yui lon n nyɛɛnɛ.
Bɛ̀ kiãn yii mɛ n ganaa,
ǹ tá re kiɛ tán
ǹ lɛ la n yɔrɔ-a.»
Bɛ n die n zɛnɛɛ
Dɛnaa Lawa a
bɔlɔgoondɛnaabaa taman yii,
Izirayeli a Lawa sonbore
kɛ taman yii,
a din mɛn lɛ nə n bɔ á n koa.
8 #
Kor2 6.2
Dɛnaa Lawa n pii kɛnɛn:
Má n lɛ si biikoo sonbore li.
Kirisibaa pinaa,
má daa n gú ganaa.
Ma á die n tamɛɛ, man koa
máa n maa lɛ kɔ kɔn la
kɛ yɔrɔ bɔ ka tɔrɔn nɛ,
n Izirayeli gána saa n da lon,
màn mɛn bɛ́ toɛ didie na a wɔ
gii yɛ tán kɛ nɛ á ziziɛ̃;
9n pɛ kòso nɛn manɛ,
ka min mɛnɛn bɛ́ wɔlɔ tì li:
«Ka soo ka da wɔlɔ fúlu li.»
Ǹ tá re màn-bii yii zii gialaa,
ǹ màn bii tentenen tumaa mìi ni.
10 #
SNS 7.16-17
Bòo á re ǹ kuĩ doo wa,
mu boro á re ǹ kuĩ doo wa.
Wasa laanka diə a piɛ̃ fuu
kɛ a re ǹ nɔmɛɛ doo wa.
Taãn nɛ, ma á ǹ narɛ,
ma á re ǹ nyɛɛnaan boe,
ma wo ǹ ne mu yala
nyantoto lɛ-a.
11Ma á re kele mìin bɔyɛɛ
ma ǹ baa kiɛ̃ ǹ zii sonboren lɛa.
Ma á re tii kiɛ nyankɔrɔn
nɛ ǹ yoo lon.
12Ǹ nə́ ke yii!
Maǹ boe sɔsɔɔ die.
Ǹ tɛnɛn man boe gɔsɛ a lɛ̀gɔn la,
gialakunun man boe lɛ̀nyɛɛnɛ,
kɔsɔn man boe Ezipti gána nɛ,
gusin a lɛ̀gɔn la.
13Lon, n gɔn dɛ!
Tán, nsɛ nə n nyɛnyɛɛ!
Kelen lɛn, ka foo kɔɔ̃nbaa ǹ lɛ dɛ!
A giala,
Dɛnaa Lawa n wusii a zaman
lɛ foo doɛ.
A n makara boe nɔmaa-wɔlen ganaa.
Dɛnaa Lawa na a zaman kirisibaa wole lɛa
14 *Siɔn na á goã pii:
«Dɛnaa Lawa nə́ n la bɔ
ma ganaa.
Dɛnaa yiri bɔ ka ma nɛ.»
15Sɛnɛ, Dɛnaa Lawa n pii:
Nɛ ǹ dan yiri á boe
a nɛnyaan tiɛɛ̃n ganaa?
A nɛ mɛn yɛ, a kɔn-narɛɛ
á nyɛɛ ka bɛ nɛ?
Ta bɛ din yiri á boe,
masɛ yiri á boe n ne duduu wa.
16Á ke, má n tɔ kiɛ̃ ma gɔn tìsì bii.
N tamaa ǹ kungɔnɔn kɛn,
man taasiɛ we bɛn ganaa
biikoo yii li.
17Zeruzalɛmu,
n dɔ̃ wolen lɛn nə́ ke baa sii die.
Sɛnɛ, min mɛnɛn nə n ziziɛ̃,
ǹ nə́ n yɔyɔrɛ,
bɛn tá re woe sɔsɔɔ n ganaa.
18N mìi saa lon, n ga n paran li.
N nɛnyaanan tumaa nə́ n sɔkɔn,
maǹ die n din li.
Dɛnaa Lawa a da ǹ boo á ke:
Maa yiikoonaabaa taman yii
ǹ tá re n biɛ n wɔ lɛa ka bɔlɔ-a
ǹ gii bɛ́ lɔn,
ka bɔsɔ-n gii bɛ́ lɔn lɔ wɔsiɛ n diɛ.
19Hiĩ, n gána lɛ n kɛbɔlɔ lɛa,
a n diə gole lɛa, á ziziɛ̃.
Sɛnɛ, kànaa ka boɛɛn nɛ,
á re kiɛɛrɛ koe n zaman ganaa.
Min mɛnɛn nə goã yui
ka gialaa,
bɛn tá re woe sɔsɔɔ.
20N nɛnyaanan mɛnɛn yɛ n gɛ̀
koa biikoo li,
ǹ tá re pii n too ne ǹ kɔn
pinaa kɛnɛn:
«Bǎã kɛ n kiɛɛrɛ wɔ ganaa.
N zɔ̃ wɔ giã ǹ bǎã yɛ.»
21N tá re pii n din gɔ́ɔ̃-n kəni:
Die na á nɛnyaanan kɛn tumaa
kɔ ma la?
Man má goã gɛlaa lɛa,
maa nɛ banban.
Man má goã bɛ̀rɛbaa ǹ bǎã nɛ,
gɔn dɔ̀ɔ̃ nɛ.
Kɛn bíi-a, die na á ǹ too?
Ma bɛ́ má goã bíi-a ma dinsɔɔ̃,
bɛa nɛnyaanan kɛn man nə́
goã maa kəni?
22Dɛnaa Lawa n kɛ pii:
Á ke, man die n gɔn yiɛ
tɔrɔ kɔsɔn manɛ.
Man die sii giala pɛ ǹ
zanzan zumi ǹ wɔ lɛa.
Ǹ tá re die n nɛgiĩn ni ǹ kolo-n,
ǹ nə n nɛlɔn kɛn gũ ǹ kɔrɔn.
23Kiin tá re n nɛnyaanan toe.
Kii a nɛlɔn tá re màn-bii koe ǹ la.
Ǹ tá re n musin koɛ
tán-a n yɔrɔ-a,
ǹ nyanlɛ n doa-n tán,
ǹ nə n guguru kɔ.
N tá re doɛ̃ ka bɛ-n kəni,
mà ma din nə Dɛnaa Lawa lɛa.
Min mɛnɛn dɔn bɛ́ n foo doɛ
masɛ ganaa,
sìi á re ǹ kuĩ wa.
24Zia-baali màn mɛn si zia la,
die n boe la a bɛ si la doo?
Die n boe la a kòso nɛ
gɔsɛ pàã-zɛnaali gɔn?
25Dɛnaa Lawa a lɛ si ǹ boo á ke:
Hiĩ, sàabaa ba la wa.
Ma á re zia-baali a kòso nɛ
lɛ gɔsiɛ a gɔn,
zia-baali mànan mɛnɛn si zia la,
ma á re bɛn sii la.
Minin mɛnɛn bɛ́ zia biɛ n ganaa,
ma din nə die yui bɛn gialaa,
ma n nɛnyaanan kirisibaa.
26Min mɛnɛn bɛ́ boe n yii ni,
ma á re bɛn kiɛ ǹ dinin
siĩ soɛ̃ ganaa.
Ǹ tá re n dinin mà mii, a ǹ yii kũ,
ka duvɛ̃ dii bɛ́ min yii kuĩ lɔn.
Ka bɛ nɛ, yiikoonaa tumaa
á re doɛ̃,
mà masɛ Dɛnaa Lawa nə
n kirisibaali lɛa,
ma nə n si sii la wole lɛa,
masɛ Zakɔba a Lawa Pàãyiidɛnaa.
Currently Selected:
Iza 49: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
