Iza 37

Ezekiasi n nɔ̀n diɛ Izayii la

1Kii Ezekiasi bɛa boon kɛn ma lɔn, a ná a mɔnaan tɔtoɛ̃, á gɛ̀ koa ǹ mɔnaan wɔ, á kiɛ̃ á wɔ Dɛnaa Lawa a kion. 2A din biikoo goon kɛ lɛ nɛ, á kii kion a kiã Eliyakimu laanka sɛ́wɔ-kiɛ̃li Sebunaa ka Lawa a wúlu-bɔlen min golen dia Amɔsi a nɛgiĩ Izayii li, ǹ dɔn tumaa n ka gɛ̀ koa ǹ mɔnaan nɛ ǹ ganaa. 3Ǹ nə́ pɛ Lawa a dia dí-a wole lɛ-n kɛnɛn: – Ezekiasi a boo á ke: «Pelo á lɛawaa kɛ n foo ziziɛ̃ ǹ lɛawaa lɛa. Dɔlɔ lɛawaa nɛ, sìi lɛawaa nɛ. Ká ǹ bɛ pii lɔn, nɛnyaan lɛ a yɛ dɔ, sɛnɛ, pàã ba ǹ dan lon á yii wa. 4Asiiriin kii na á sɔraasin goledɛnaa dia die sɔ koe Lawa yiikoonaa ganaa. Toa bɛ̀ Dɛnaa Lawa too n sɔ kɔ kɛ miɛ, a dɔlɔ bɔ a ganaa a da ǹ boon kɛn lɛa! Nsɛ Izayii, Dɛnaa Lawa, n Lawa nyankɔ n zaman kɛa lɛa, ǹ mɛnɛn lɛn yii goã koo.»

5Kii Ezekiasi a dí-nyalin lɛn nə́ woo n bɔlɔ pɛ, Izayii ni. 6Izayii pɛ ǹ nɛ: – Ka wo Dɛnaa Lawa a boo kɛ pɛ kaa dɛnaagiĩ Ezekiasi ni: «Ń Asiiriin sɔraasin goledɛnaa lɛ ma sɔ koe ma ganaa. N boo mɛn ma, nyɛ́ɛ nyan nə n kũ wa. 7Ǹ kii á re boo goon miɛ. Á ke ma á re a yiri bɔyɛɛ, ma dia a gána nɛ. Walan kəni, ǹ tá re dii ka gɔya sa nɛ.»

Asiiriin kii n sɔ koe Zeruzalɛmu ganaa

8Asiiriin sɔraasin goledɛnaa lɛ ma, mà a kii lɛ soo Lakiisi. A na á goã zia biɛ kɔn ka Libnaa kiwi ni. Sɔraasin goledɛnaa lɛ kiɛ̃ á woo yaa walan. 9Ǹ nə́ daa pɛ Asiiriin kii lɛ nɛ mà Etiopiin kii Tirakaa zii saa a n die a gialaa. A bɛ́ á bɛa boo lɛ ma, á dia dí-a wolen dia Ezekiasi la. 10Á pɛ ǹ nɛ mà ǹ pɛ Zudaan kii Ezekiasi ni: «N nə n foo doa n Lawa mɛn ganaa bɛ nyan nə n yiri sã a ń pii n ni mà Zeruzalɛmu ba re n we Asiiriin kii gɔn wa. 11Asiiriin kiin nə gánan mɛnɛn ziziɛ̃ lenlen, á ke ń bɛ boo ma! Ma n taasɛ mà n tá re n boe a nɛ? 12Kiin mɛnɛn nə goã ma nyɛɛnɛ ǹ nə́ gánan kɛn yu, Goozan nɛ, Karan nɛ, Resɛfu ni, ka Edɛn tɔrɔn kɛn nɛ Telasaara, bɛa gánan lɛn dìn nə boo la ǹ nə́ ǹ si wa. 13Kiin kɛn man maa? Amaati wɔ nɛ, Arpaadi wɔ nɛ, Layiiri wɔ nɛ, Sefaravayimu kiwi wɔ nɛ Enaa wɔ nɛ ka Iva wɔ nɛ.»

Kii Ezekiasi a Lawa nyankɔ

14Asiirii minin lɛn nə da ka sɛ́wɔ mɛn lɛ nɛ, Ezekiasi saa á pɛ. Bɛ kio, á tɔn woo Dɛnaa Lawa a kion, á bũ Dɛnaa Lawa yɔrɔ-a. 15Bɛ kio, Ezekiasi Dɛnaa Lawa nyankɔ á pɛ: 16#BBN 25.22 «Dɛnaa Lawa Pàãyiidɛnaa, Izirayeli a Lawa, nsɛ mɛn bɛ́ giã-n lon màn yiikoonaa tumaa mìi la, n dinsɔɔ̃ n kanaa a gánan tumaa a Lawa lɛa, n din ni n lon laanka tán zɛnaa. 17Dɛnaa Lawa, n para kanaa n nə n too kɔ taãn-taãnɛ! Dɛnaa Lawa, n yii bũ n ga gongon! Senankeribu a dia dí-a wolen nə sɔ mɛn kɔ n ganaa, Lawa Yiikoonaa, n too kɔ bɛ li. 18Dɛnaa Lawa, taãn nɛ, Asiirii kiin lɛn nə́ tɔrɔn tumaa lɛ naa, ǹ nə́ ǹ gánan ziziɛ̃. 19Ǹ nə́ ǹ dìn zũ tɛ-n, a gialaa, ǹ bie Lawa lɛa wa. Màn nyínin manɛ, gɔn hinlaa kɔlɔ lɛa, minbuiin nɛ a màn zɛnaa lɛa, ǹ nə́ ǹ ziziɛ̃. 20Sɛnɛ, nsɛ Dɛnaa Lawa, wɔa Lawa, wɔ kirisibaa Senankeribu ganaa, a gɔn nyan dɔ wɔ-a wa. Ka bɛ nɛ Dɛnaa Lawa, kanaa a gánan tumaa á re doɛ̃ mà n dinsɔɔ̃ n Lawa lɛa.»

Izayii n Dɛnaa Lawa a boo a binyəə koe

21Bɛ lɛ nɛ, Amɔsi a nɛgiĩ Izayii tɔn boo kɛ dia Ezekiasi la: – Dɛnaa Lawa, Izirayeli a Lawa bɛ́ màn mɛn pii, á ke: «N Lawa nyan ke ń kɔ, ń mà a kasɛn kirisibaa Asiiriin kii Senankeribu ganaa, bɛa binyəə á ke. 22Á ke, Dɛnaa Lawa n kɛ pii Senankeribu a paǹ li:

N tìĩ bɔ *Siɔn kiwi ni,

a n yaa we n ganaa.

Zeruzalɛmu kiwi nə n mìi

papasɛ n ganaa.

23Ma nə ń sɔ kɔ die ganaa?

Ma nə ń die piɛ̃ bɔ?

N yii na á wɔ n boo da

die ganaa?

Ma nə n ga die ganaa ka din

koa nɛ?

Masɛ din Izirayeli a

Lawa sonbore kɛ nɛ!

24Ma nə ń sɔ kɔ masɛ

Dɛnaa ganaa,

n dí-nyalin barka nɛ.

Ma nə ń pɛ: Masɛ Senankeribu,

maa ziabaa ǹ wotoron kɛn

pàã nɛ,

má dii kele sasan mìi ni,

yǎa Liban kele baã bii,

má a *sɛdrə da sonboren kuru,

ka a siprɛsi da sonboren ne.

A kele lɛ a mɛn mìi la bɛ́ lon,

á la ǹ miãn tumaa nɛ,

ma gɔn dɔ bɛ ganaa,

kɔnlɛ ka a daã sonbore kɛ nɛ.

25Má tùn fɔ̃ a nɛ, má ǹ mu mi.

Tà gòãn mɛnɛn bɛ́ die

Niili ganaa,

bɛ̀ má n gòã da Ezipti a tán la,

man bɛn tumaa piɛ̃ ka daɛ̃.

26Senankeribu, n ba bɛ doɛ̃ wa?

Haalɛ bibi,

masɛ din ni ma siin kɛn lɛn

yɔrɔ bɔ.

Ma din ni má ǹ yɔrɔ bɔ

á biikoo ná a kànaa wa.

Sisia kəni, man die ǹ zɛnɛɛ.

Man má n koa,

máa n basaã kɔ kiwin kɛn

manɛ tamaa nɛ,

ǹ kɛbɔlɔn baa.

27Min mɛnɛn nə goã a nɛ,

bɛn nə boo màn kɔn la

ǹ nə́ zɛnaa wa.

Nyɛ́ɛ nə́ ǹ gù dɛ, sìi nə́ n kɔ ǹ lɛ.

Maǹ nə́ n baa ka wuru gɔ́ɔ̃ nɛ

ǹ buu bɛ́ lɔn,

ka tɔɔn buu sɔ̃ ǹ bǎã bɛ́ lɔn,

ka kala la ǹ buu bɛ́ lɔn,

ka wuru gɔ́ɔ̃ nɛ ǹ màn bɛ́ lɔn

a ná a tɔn ma wa.

28Ma tá n giã tán biikoo doɛ̃,

n soo laanka n wɔ kion biikoo ne,

hinlaa bɛ̀ n foo yoo masɛ li.

29Hiĩ, n foo bɛ́ á yoo masɛ li,

n tɔ ziziɛ̃ ǹ boo mɛn da,

á kaa ma too ne.

Bɛ lɛ nɛ, man die fɔlɔ biɛ

diɛ n nyin ni,

ma karfɔ wɔ n lɛ-n.

N kɔ zii mɛn lɛ n daa kànaa,

man die wusii ma n da bɛ lɛ la,

n wo piɛ.

30Ezekiasi, kɛ n die sii a kɔnboe biɛ n wɔ lɛa: Miɛla a lɛ̀ kɛ nɛ, *belee nàn mɛn mɛnaa tán á bɔ a din li, ka ǹ die bɛ lɛ bii. Lɛ̀ boe, ka ǹ die a pere bii. Sɛnɛ, a lɛ̀ sɔɔbaa ǹ wɔ li, ka á re belee diɛ, ka kuru, ka *rezɛ̃ da zumu ka a nɛ bii. 31Zudaa gána minin mɛnɛn yii goã koo, bɛn tá re goɛ̃ ka dan bɛ́ lɔn. Ǹ tá re gòon diin boe, ǹ wɔ tán. Ǹ gùrùn tá re nɛ koe. 32Hiĩ, min mɛnɛn yii goã koo, bɛn tá re soe Zeruzalɛmu. Min mɛnɛn nə n si gɛ̀ la, bɛn tá re golee lon Siɔn kele la. Dɛnaa Lawa Pàãyiidɛnaa a miãgoã-bɔ kɛ bɛ́ re diɛ sii mɛn zɛnaa ganaa, bɛ n ka kɛ nɛ.»

33Dɛnaa Lawa bɛ́ boo mɛn diɛ Asiiriin kii wɔ paǹ li, bɛ á ke: A re we kiwi kɛ-n wa, a re kiɛ goon din zuĩ a-n wa. A re yɔ boe a ganaa wa. A re goóron koɛ a din siã a yoo a gialaa wa. A re tii diɛ kɔn la a ganaa wa. 34A kɔ zii mɛn lɛ á daa kànaa, a n die wusii a kɔ a din lɛ lɛ, a woo. A re we Zeruzalɛmu wa. Masɛ Dɛnaa Lawa a da ǹ boo ne. 35Man kiwi kɛ tamɛɛ, ma a kirisibaa. Man bɛ zɛnɛɛ ma din a lɛa ka maa dí-nyali Davida nɛ.

Senankeribu a gɛ̀

36Dɛnaa Lawa a lon a dia dí-a wole soo, á min duu paabiɛ ka pɔkiwisi ka sooro (185 000) dɛ Asiirii minin giã ǹ bǎã nɛ. A lɛawaa baayɛlɛ, sɔraasin lɛn nə́ yoo. Á ke, bɛ̀ geren nə́ ke tán bǎã yii ni. 37Bɛ lɛ na á toa Asiiriin kii Senankeribu na a zìãn tumaa fore, á n bɔyaa á woo Ninivu, á giã walan. 38Ǹ kɔn pinaa, a toa a n nyankɔ we a dì Nisirɔki a kion, a nɛgiĩ Adramelɛki laanka Saresɛɛrɛ dɛ ka gɔya sa nɛ á gã. Ǹ nə́ baa si ǹ nə́ woo Araraa gána nɛ. A nɛgiĩ kɔsɔ Asaradɔn kii baa a bǎã nɛ.

Currently Selected:

Iza 37: SBPE2011

Highlight

Copy

Compare