Iza 23
23
Tiiri laanka Sidɔn a ziziɛ̃
1 #
Eze 26.1–28.19; Zow 3.4-8; Amɔ 1.9-10; Zak 9.1-4; Mat 11.21-22; Luk 10.13-14 Tiiri a boo gii.
Kasɛn, bǎã sɔsɔɔ zii tɔ wɔ mu la ǹ goon,
ka wuu pɛ.
Tiiri kiwi kɛ ziziɛ̃.
Kion banban doo wa.
Kiɛnlɛ banban wa.
Bɛ̀ n dɔ Siipri gána nɛ,
man bɛa kibərə lɛ miɛ.
2Kasɛn mɛnɛn bɛ́ giã-n yìsi mu
lɛ koro lɛ-a,
ka gɛ̀ loe lɔ,
kasɛn Sidɔn a pii-kɔlen lɛn,
ka n dia dí-a wolen diɛ
Yìsi mu gole bii.
3Ǹ bɛ́ màn mɛn diɛ Niili tà lɛ-a,
ǹ bɛ́ màn mɛn kuri a lɛ-a,
bɛ lɛ na á goã Sidɔn a naforo lɛa.
Sidɔn na á goã tɔrɔn pii kɔ
ǹ bǎã lɛa.
4Sidɔn,
nsɛ mɛn bɛ́ Yìsi mu gole pàã lɛa
n wɔ n ka sìi ni:
«Ma nɔɔrɔ kɔ wa.
Ma nɛ yɛ wa.
Ma nɛginin too wa,
hinlaa nɛlɔ gole kɔ ma gɔn wa.»
5Bɛ̀ Ezipti boon kɛn ma,
a gɔ̀nɔn tá re bìn diɛ
ka a bɛ́ á boo mɛn ma Tiiri a
paǹ li lɔn.
6Ka yìsi mu wɔsɔ yǎa Tarsiisi.
Kasɛn kɛn giã-n yìsi mu
lɛkoro lɛ-a,
ka gɛ̀ loe lɔ.
7Lɛlɛ lɛlɛ,
ka dinin kiwi lɛ bie á goã
a foo n kɔɔ̃nɛ,
a n minin diɛ bǎã sɔsɔɔ nɛ,
bɛ̀ ǹ wo pii kɔ ǹ kionən doa wa?
8Tiiri kiwi na á goã kii
bafolon gii.
A pii-kɔlen man kii nɛn lɛa.
Maǹ nə́ goã kanaa a min
dadaran lɛa.
Die n zoɛ̃ kiwi lɛ a ziziɛ̃ li?
9Dɛnaa Lawa Pàãyiidɛnaa
na á golee bɛ li,
màn mɛn bɛ́ toɛ a din koa
wolen kɛn gisĩ,
a kanaa a min dadaraan kɛn
yii puusə kɔ.
10Tiiri, tán kɔsɔ
ka Niili tà lɛ-a minin bɛ́ lɔn,
a giala,
bǎã sɔsɔɔ zii tɔ wɔ mu la ǹ goon
golee ǹ bǎã banban doo wa.
11Dɛnaa Lawa na á n gɔn waa
yìsi mu ni,
á bìn da gánan ganaa,
Kanaan kiwin mɛnɛn bɛ́
tamaa nɛ,
á zii kɔ mà ǹ bɛn ziziɛ̃.
12Dɛnaa Lawa n kɛ pii:
«Sidɔn a zaman,
ka a re boe la ka kaa zɔ́nɔn
zɛnaa doo wa.
Ma nə n kɔnbɔ ka nɛlɔ ten mɛn bɛ́
ǹ nə́ kũ ka pàã nɛ.
A giala,
ta ń yìsi mu la bɔ
ń woo yǎa Siipri,
n ba re susui yii walan
dɔ din ni wa.
13N yiri kɔ ka *Baabilonii
minin gána nɛ:
Bɛa minin lɛn banban doo wa.
Asiirii na á bɔyaa á baa
don mànan bǎã lɛa.
Asiirii minin nə́ wɔlɔ
lɛduə̃ ǹ bǎãn dɔ.
Ǹ nə́ ǹ kii kionən ziziɛ̃,
ǹ nə́ ǹ baa kɛbɔlɔn lɛa.
14Bǎã sɔsɔɔ zii tɔ wɔ mu la
ǹ goon,
ka gɛ̀ loen lɔ.
A giala, kaa mìi duru ǹ
bǎã ziziɛ̃.»
15Ka bɛ nɛ, yiri á re boe Tiiri kiwi ni lɛ̀ pɔsɔbaa. Bɛ n kɔnpii ka kii a yiikoonaabaa nɛ. Bɛa lɛ̀ pɔsɔbaa lɛ a giala nyɔmɔɔ waáraa, màn mɛn nə́ lɔ kɔrɔ-baali yɛ loe kɛ gɔ́ɔ̃ nɛ, bɛ lɛ n die Tiiri yii:
16Lɔ kɔrɔ-baali,
nsɛ mɛn bɛ́ yiri bɔ n nɛ,
kɔnkoɛɛ̃ saa, n kiwi lɛnpɛnɛ.
A dɛ n parsiini, n loe gigiã lɔ,
màn mɛn bɛ́ toɛ minin yiri
gisĩ n ni!
17Kànaa ka lɛ̀ pɔsɔbaa (70), Dɛnaa Lawa á re sii zɛnɛɛ Tiiri kiwi ni. Wɔrɔ á re wusii a yɛ gána lɛ nɛ. A n die pii koe ka kanaa a gánan tumaa nɛ. 18Sɛnɛ, a bɛ́ re là mɛn yii, bɛ n die Dɛnaa Lawa wɔ biɛ. Bɛa là lɛ a re n tamɛɛ wa, a re n koɛ wa. A bɛ́ re màn mɛn yii, bɛ n die Dɛnaa Lawa guguru-kɔlen toe, ǹ kã, ǹ mɔnaa sonboren pii ni.
Currently Selected:
Iza 23: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
