BLS 3
3
Sii tumaa laanka a biikoo ne
1Sii din tumaa laanka a waáraa nɛ.
Màn din tumaa laanka a biikoo ne kanaa kɛ nɛ.
2Yɛ biikoo tan,
gɛ̀-wɔ biikoo tan.
Da-zumii biikoo tan,
da-woɛ̃ biikoo tan.
3Gɛ̀-dɛ biikoo tan,
da gòã-diɛ biikoo tan.
Màn-wurii biikoo tan,
màn-doe biikoo tan.
4Wuu-pɛ biikoo tan,
yaa-wɔ biikoo tan.
Lala-diɛ biikoo tan,
bɛ̀-baa biikoo tan.
5Giã-kũ biikoo tan,
toɛ̃-kɔn biikoo tan#3.5 Giã-kũ biikoo tan, toɛ̃-kɔn biikoo tan: Ebrəə bɔlɔ sɛ na á pɛ mà Kɔlɔ-zuĩ biikoo tan, kɔlɔ-sɔkɔn biikoo tan. Bɛa boo lɛ n boo ti lɛa, a n giĩ laanka lɔ a giã-kũ giala pii..
Sɔɔ min ni biikoo tan,
sɔɔ min ni baã biikoo tan.
6Ga màn li biikoo tan,
màn a papaã biikoo tan.
Màn-koa biikoo tan,
màn-daa biikoo tan.
7Màn-toɛ̃ biikoo tan,
màn-nimii biikoo tan.
Lɛ-tiɛ̃ biikoo tan,
boo-diɛ biikoo tan.
8Min-narɛɛ biikoo tan,
min baa zɔ́ɔ biikoo tan.
Zia biikoo tan,
là nyantoro biikoo tan.
9Dí-nyali bɛ́ dí mɛn nyɛɛ,
a n wàa là yii a nɛ?
10Lawa bɛ́ dí mɛn koe minbuiin nɛ la,
mà a nɔmaa la,
ma yii tá bɛ ganaa.
11Lawa n sii tumaa zɛnɛɛ siĩni,
a kɔnpɛ ka a biikoo ne.
Ka bɛ dɔ nɛ,
biikoo mɛn bɛ́ nyɛɛn sɔsɔɔ,
Lawa bɛ dɔ din a doɛ̃ a taasiɛ wɔ minbuiin nɛ foo ne,
a laanɛ ǹ ba boe la ǹ tá Lawa a sii zɛnaa giala miɛ wa,
a saa a giala-kɔ ganaa,
a wo kaa a gɔn nyɔmiɛ̃ lɛ.
12Má tɔ́n dɔ̃,
máa màn kɔn din ba soɛ minbuiin nɛ
ganaa wa.
Bɛ̀ á n bɔ, a n nyɛnyɛɛ,
a ga a din a bǐɛ̃-kɔ li,
a yiikoonaabaa gɔ́ɔ̃ nɛ.
13A giala,
bɛ̀ min woo min tá màn bii,
á n màn mii,
a bɛ́ màn mɛn boe a dí ni,
a nə́ n nyɛnyɛɛ bɛ la,
Lawa a bǐɛ̃ n ka bɛ nɛ.
14Má dɔ̃,
máa Lawa bɛ́ sii mɛn tumaa zɛnɛɛ,
bɛ n bele-boe yǎa duduu.
Màn kɔn ba n diɛ li doɛ̃ wa,
màn kɔn ba n boe lɛ doɛ̃ wa.
Lawa n bɛ zɛnɛɛ,
màn mɛn bɛ́ toɛ ǹ nyɛ́ɛ baa asɛ yii ni.
15Màn mɛn bɛ́ a tan,
bɛ́ goã a tan.
Sii mɛn bɛ́ nyɛɛnɛ die n zɛnɛɛ,
bɛ bin nə́ n zɛnaa.
Sii mɛn nə kiɛ̃,
Lawa n wusii a da ka bɛ nɛ.
Mɛnaa kɔn la boo
16Ka bɛ dɔ nɛ,
kanaa kɛ nɛ, má yɛ doo,
baraabaa na á mɛ sii yɔrɔ bɔ bǎã nɛ,
baraabaa na á mɛ peperebaa bǎã nɛ.
17Má pɛ ma din gɔ́ɔ̃-n máa:
Lawa á re kiri kuri min pepere laanka min baraa la.
A giala,
sii tumaa laanka a waáraa nɛ,
dí tumaa laanka a biikoo ne.
18Minbuiin nɛn wɔ paǹ li,
má pɛ ma din gɔ́ɔ̃-n máa:
Lawa n giɛ li,
a n da ǹ gɔ́ɔ̃ li,
màn mɛn bɛ́ toɛ ǹ dininmaan nə yɛ,
mà màn kɔn bie ka ǹsɛn nɛ,
tɔɔn kio wa.
19A giala sii mɛn bɛ́ minbuiinin yii,
a din lɛ dɔ n tɔɔn yii.
Sii goon nə ǹ dinin tumaa yii.
Tɔɔn bɛ́ giɛ̃ lɔn,
minbuiin nɛn dɔn man giɛ̃ miɛ̃.
Fɔfoã mɛn bɛ́ ǹ nɛ, a n goon.
Minbuiin nɛ ba soɛ tɔɔ-n wa.
Sii kɔn din giala banban.
20Màn tumaa a giala-nyɔmɔɔ ǹ gɔn nə goon,
màn tumaa n tii lɛa,
màn tumaa nə n bɔyɛɛ a wo tii li.
21Fɔfoã mɛn bɛ́ minbuiin nɛ nɛ,
die n bɛ doɛ̃?
A n die woe lon,
tɔɔ a fɔfoã sɛ n gisĩ woe tán?
22Má tɔ́n yɛ,
máa màn kɔn din ba soɛ minbuiin nɛ
ganaa wa.
Bɛ̀ á n bɔ, a bɛ́ dín mɛnɛn nyɛɛ,
a n nyɛnyɛɛ bɛn la.
Bɛ lɛ na a wɔ gii lɛa,
a giala sii mɛn bɛ́ re n zɛnɛɛ a gɛ̀ kio,
die n die kuĩ a da bɛ nyaa nɛ?
Currently Selected:
BLS 3: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
