Sõdbo 31
31
Israyɛll nebã zaba ne Madiyã nebã
1Sẽn-Ka-Saab yeela a Moyiis yaa: 2«Kẽng n tɩ sɩbg Madiyã nebã n dok Israyɛll nebã sũuri. Rẽ poore, fo na n kiime.» 3Dẽ, a Moyiis yeela Israyɛll nebã yaa: «Bɩ y yãk neb kẽer yãmb sʋkã, tɩ b bob b zab-teed n kẽng n tɩ sɩbg Madiyã nebã, wa Sẽn-Ka-Saab sẽn yeelã. 4Bɩ y yãk tãb-biis tusr Israyɛll buud fãa pʋgẽ. 5Dẽ, Israyɛll tãb-bi-sulã pʋgẽ, yãmb na n yãka raop tusr buud fãa pʋgẽ. Woto, tãb-biisã fãa sõorã na n yɩɩ neb tus-piig la a yiibu.» 6Dẽ, a Moyiis kɩtame tɩ b fãa kẽng zabrã zĩigẽ, la a Eleyazaar biig a Fineyaas tũu bãmba. La yaa a Fineyaas n dag n zãad sɛk roogã teedo, n paas zabrã tãntãado.
7Dẽ, bãmb zaba ne Madiyã nebã wa Sẽn-Ka-Saab sẽn dag n yeel a Moyiisã, n kʋ raopã zãnga. 8La bãmb kʋʋ Madiyã nanambs a nu wã me: Yaa a Evi, a Rekɛm, a Suuri, a Ʋʋre, ne a Reba, la b kʋ a Bewoor biig a Balaam n paase. 9Dẽ, Israyɛll nebã yõga Madiyã pagbã ne b kambã n maan yembse, la b zɛ b rũmsã fãa, la b sẽn so wã zãnga. 10La Israyɛll nebã yõoga Madiyã nebã tẽmsã, ne b sik zĩisã fãa bugum. 11La bãmb talla teedã b sẽn wʋkã, ne nebã la rũmsã b sẽn yõgã n looge. 12Bãmb talla nebã b sẽn yõgã ne teedã b sẽn wʋkã, n kẽng n tɩ wilg a Moyiis ne a Eleyazaare, la Israyɛll neb nins fãa sẽn dag n be Moaab kunkubã zut sẽn yeg Zʋrdẽ kʋɩlgã, n tees Zeeriko wã nengẽ.
13Dẽ, a Moyiis ne a Eleyazaar la Israyɛll buudã kãsem-dãmb fãa yii sik zĩigẽ wã n na n tɩ seg tãb-biisã. 14La a Moyiis sũurã puuga ne tãb-biisã nanambsã sẽn nan yi zabrã zĩigẽ n watẽ wã. A Moyiis yeela bãmb yaa: 15«Bõe yĩng tɩ yãmb bas pagbã n ka kʋ? 16#Sõd 25.1-9Yãmb mensã bãng n sɛɛme tɩ yaa Madiyã pagb la sẽn kelg a Balaam saglsã, n kɩt tɩ Israyɛll nebã wẽnemd n bas Sẽn-Ka-Saabo, Pewoor wẽn-naandg a Baall yellã wakatã. La yaa yel-kãng pʋgẽ, la bã-wẽngã paam Sẽn-Ka-Saab nebã. 17Moasã, bɩ y kʋ kom-dibli wã fãa, la y kʋ pʋg-sadb nins fãa sẽn bãng raoã. 18La bɩ y bas kom-pugli nins fãa sẽn nan ka mi-b raoã, n da kʋ ye. Soog-y-ba. 19Yãmb sʋkã neb nins sẽn zoe n kʋ neda, ne neb nins sẽn sɩɩs-b kũumã tog n yii sikã zĩigẽ wã n tɩ zĩnd kɩreng rasem a yopoe. La yãmb ne yem-pogsã me tog n yɩlga b mens rasem a tãabã ne rasem a yopoe wã daare. 20Yãmb tog n yɩlga futã, la teoog buud fãa sẽn maan ne gãongo, la teoog buud fãa sẽn maan ne bʋ-kõbdo, la ne laok buud fãa sẽn maan ne raado.»
21Dẽ, maan-kʋʋd a Eleyazaar yeela tãb-biis nins sẽn kẽng-b zabrã yaa: «Ad bũmb ning sẽn gʋls tõog ninga Sẽn-Ka-Saab sẽn kõ a Moyiisã pʋgẽ. 22Teoog buud fãa sẽn maan ne sãnemã, wanzuri, zũudu, kutu, la ne namdo, la waasdã, 23sẽn dat n togs tɩ teoog buud fãa sẽn ka rɩt bugmã, bɩ y ning-a bugmẽ, tɩ bugmã yɩlg-a. La sã n yaa ne teoog ning fãa sẽn ka tõe ning bugmẽ wã, bɩ los-a yɩlgr koomã pʋga. 24La rasem a yopoe daarã, bɩ y pegs y futã, la yãmb na n lebga yɩlma. Dẽ poore, y na yaool n lebg n leb sik zĩigẽ wã.»
Te-zɛɛdem pʋɩɩbo
25Sẽn-Ka-Saab yeela a Moyiis yaa: 26«Bɩ foom ne maan-kʋʋd a Eleyazaare, la buudã nanambsã, naag taab n sõd zabrã zĩigẽ teedã b sẽn wʋkã, ne nebã la rũmsã b yõg zabrã zĩigẽ wã. 27La bɩ f rɩk teedã n pʋɩ pʋɩ-sʋk n kõ neb nins sẽn kẽng-b zabrã, ne neb a taabã fãa sẽn ketã. 28La pʋɩɩr ning fo sẽn kõ neb nins sẽn kẽng-b zabrã zĩigẽ wã pʋgẽ, fo na n yãka pʋɩɩr n kõ Sẽn-Ka-Saabo: Neb kobs-nu pʋgẽ, yaa nin-yɛnga. La rũm-bɛdã ne bõensã la rũm-bãoonegã sʋka, bãmb kobs-nu pʋgẽ, yaa rũng a ye. La pʋɩɩr-kãng yaa maam a Sẽn-Ka-Saab n so. 29La fo na n dɩka pʋɩɩrã n yãk pʋɩɩr n kõ maan-kʋʋd a Eleyazaare, tɩ yɩ kũun maam a Sẽn-Ka-Saab yĩnga. 30La pʋɩɩr ning sẽn yaa Israyɛll nebã sẽn ketã rẽndã pʋgẽ, fo tog n yãka nin-yɛng neb pis-nu pʋgẽ, la niigã ne bõensã, la rũm-bãoonegã, rũmsã fãa, yaa rũm-yɛng rũms pis-nu pʋgẽ, la f yãkd n kõ Leevi buudã, tɩ yaa bãmb n get Sẽn-Ka-Saab sɛk roogã yelle.» 31Dẽ, a Moyiis ne maan-kʋʋd a Eleyazaar maana wa Sẽn-Ka-Saab sẽn dag n yeel a Moyiisã. 32Zabrã te-zɛɛdmã pʋga, sẽn kellã yaa rũm-bãooneg tus kobs-yoob la pis-yopoe la a nu. 33Niig tus pis-yopoe la a yiibu. 34Bõens tus pis-yoob la a yembre. 35La pʋg-sadb sẽn nan ka mi raoã tus pis-tã la a yiibu.
36B sẽn yãk tãb-biisã pʋɩɩrã yɩɩ rũm-bãooneg tus kobs-tã la pis-tã la a yopoe la kobs-nu. 37La b yãka rũm-bãooneg kobs-yoob la pis-yopoe la a nu n kõ Sẽn-Ka-Saabo. 38Leb n yaa niig tus pis-tã la a yoobe, tɩ b yãk bãmb pis-yopoe la a yiib n kõ Sẽn-Ka-Saabo, 39n paas bõens tus pis-tã la kobs-nu, tɩ b yãk bãmb pis-yoob la a yembre, n kõ Sẽn-Ka-Saabo. 40La ninsaalbã sõor yɩɩ tus piig la a yoobe, tɩ b yãk neb pis-tã la a yiib n kõ Sẽn-Ka-Saabo. 41La a Moyiis rɩka pʋɩɩr ning b sẽn yãk Sẽn-Ka-Saab yĩngã, n kõ maan-kʋʋd a Eleyazaare, wa Sẽn-Ka-Saab sẽn yeel a Moyiisã.
42La pʋɩɩrã pʋɩ-sʋk ning b sẽn yãk n kõ Israyɛll nebã, rat n yeel tɩ pʋɩɩr ning a Moyiis sẽn yãk n kõ tãb-biisã tɩ kellã, 43yaa rũm-bãooneg tus kobs-tã la pis-tã la a yopoe la kobs-nu. 44La niig tus pis-tã la a yoobe. 45N paas bõens tus pis-tã la kobs-nu. 46La ninsaalbã sõor yɩɩ tus piig la a yoobe. 47La pʋɩɩr ning sẽn yaa Israyɛll nebã rẽndã pʋgẽ, a Moyiis yãka nin-yɛng neb pis-nu pʋgẽ, la rũm-yɛng rũms pis-nu pʋgẽ, n kõ Leevi buudã nebã. Tɩ bala, yaa bãmb n get Sẽn-Ka-Saab sɛk roogã tʋʋmd yelle, wa zems Sẽn-Ka-Saab sẽn dag n yeel a Moyiisã.
Yamleoog kũun Wẽnnaam yĩnga
48Tãb-bi-sul nanambsã, ne tãb-biis tusr-tusr nanambsã, la tãb-biis koabg-koabg nanambsã kẽnga a Moyiis nengẽ, 49n tɩ yeel-a yaa: «Tõnd sõda tãb-biis nins tõnd sẽn so wã n mik tɩ ned ka paoog ye. 50Yaa rẽ yĩnga, tɩ tõnd ned kam fãa tall sãnem teed nins tõnd sẽn wʋkã n wat n na n kõ Sẽn-Ka-Saabo, tɩ yɩ kũuni, tɩ b tõe n bas-d tɩ põse. Yaa yãndo, zũyã, nugbĩnsi, tʋb-londo, la te-bobdɩ.» 51Dẽ, a Moyiis ne maan-kʋʋd a Eleyazaar n reega sãnem teed nins fãa b sẽn tall n wa wã. 52La sãnem teed nins fãa Tãb-bi-sul nanambsã, ne tãb-biis tusr-tusr nanambsã, la tãb-biis koabg-koabg nanambsã sẽn tall n wa wã zɩslem rag n taa kɩlo koabg la pis-yopoe. 53La tãb-biisã ned kam fãa rag n wʋka teed a meng yĩnga. 54La a Moyiis ne a Eleyazaar rɩka sãnem teed nins fãa tãb-bi-sul nanambsã, ne tãb-biis tusr-tusr nanambsã, la tãb-biis koabg-koabg nanambsã sẽn tall n wa wã n tɩ bĩng sɛk roogã pʋgẽ, tɩ tõe n yɩ tẽegr Israyɛll nebã yĩng Sẽn-Ka-Saab taoore.
Currently Selected:
Sõdbo 31: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
