Sõdbo 26
26
1 #
Sõd 1.1-46
Sẽn-Ka-Saab yeela a Moyiis ne a Aarõ biig a Eleyazaar yaa: 2«Sõd-y Israyɛll nebã fãa buud-buudu. Sõd-y raop nins sẽn ta yʋʋm pisi la sẽn yɩɩd woto, n tõe yɩ tãb-biisã.» 3Dẽ, a Moyiis ne a Eleyazaar goma ne Israyɛll nebã Moaab weoogẽ wã, wakat ning b sẽn wa n be Zʋrdẽ kʋɩlgã noor sẽn tees ne Zeeriko wã, n yeel-b yaa: 4«D na n sõda Israyɛll raop nins yʋʋm sẽn ta pisi la sẽn yɩɩd woto wã, wa Sẽn-Ka-Saab sẽn dag n yeel a Moyiisã.»
5Pipi yaa a Zakoob bi-kãseng a Rubɛn buudã nebã. Bãmb yaa Hanok roogã sẽn yaa Hanok yagensã, la Palu roogã sẽn yaa a Palu yagensã. 6La Hɛsron roogã yaa a Hɛsron yagense, tɩ Karmi roogã yaa a Karmi yagense. 7Ad a Rubɛn buudã nebã la woto. Bãmb sõorã yaa raop tus pis-naas la a tãab la kobs-yopoe la pis-tã. 8-9A Elyaab yaa a Palu yagenga la yẽnda n doga a Nemwɛlle, a Datã, ne a Abiram. La a Datã ne a Abiram da yaa buudã kãsem-dãmb nins sẽn naag a Koore nebã n yẽgem ne Wẽnnaam n zab ne a Moyiisã ne a Aarõ wã. 10Tẽngã yaaga a noor n vel bãmb ne a Koore, la yɩɩ daar ninga bugmã sẽn dɩ a Koore poorẽ dãmbã n kʋ neb kobs-yi la pis-nu wã. Bõn-kãng yɩɩ keoogr Israyɛll neb a taabã yĩnga. 11La a Koore kom-dibli wã ka naag n ki badaar ye.
12A Sɩmyõ buudã rot la woto: «Yaa a Nemuwɛll dotã sẽn yaa Nemuwɛll yagensã, a Yamin dotã sẽn yaa Yamin yagensã, la a Yakin rotã sẽn yaa Yakin yagensã. 13A Zeera rotã sẽn yaa a Zeera yagensã, la a Sayull dotã sẽn yaa Sayull yagensã. 14Ad Sɩmyõ buudã rot la woto. Bãmb sõorã yaa raop tus pis-yi la a yiib la kobs-yi.»
15A Gaad buudã rot la woto: Yaa a Sefõ rotã sẽn yaa Sefõ yagensã, la a Hagi rotã sẽn yaa Hagi yagensã, a Suni rotã sẽn yaa Suni yagensã, 16A Ozni rotã sẽn yaa Ozni yagensã, la a Eri rotã sẽn yaa Eri yagensã. 17A Arood rotã sẽn yaa Arood yagensã, la a Areli rotã sẽn yaa Areli yagensã. 18Ad Gaad buudã rot la woto. Bãmb sõorã yaa raop tus pis-naas la kobs-nu. 19-21A Zʋʋda buudã rot la woto: A Zʋʋda kamb a Ɛɛr ne a Ona kii Kana tẽnga pʋgẽ. A Sela rotã sẽn yaa Sela yagensã, a Perɛɛz rotã sẽn yaa Perɛɛz yagensã, la a Zeera rotã n yaa a Zeera yagensã. A Perɛɛz yagensã la woto: Yaa a Ɛsron rotã sẽn yaa Ɛsron yagensã, la a Amull rotã sẽn yaa Amull yagensã. 22A Zʋʋda buudã neb la woto. Bãmb sõorã yaa raop tus pis-yopoe la a yoob la kobs-nu.
23A Isakaar buudã rot la woto: Yaa a Tola rotã sẽn yaa Tola yagensã, la a Puuva rotã sẽn yaa Puuva yagensã. 24A Yasuub rotã sẽn yaa Yasuub yagensã, la a Sɩmrõ rotã sẽn yaa Sɩmrõ yagensã. 25A Isakaar buudã rot la woto. Bãmb sõorã yaa raop tus pis-yoob la a naas la kobs-tã.
26A Zabulõ buudã rot la woto: Yaa a Serɛɛd rotã sẽn yaa Serɛɛd yagensã, a Elõ rotã sẽn yaa Elõ yagensã, la a Zalehɛll rotã sẽn yaa Zalehɛll yagensã. 27A Zabulõ buudã neb la woto. Bãmb sõorã yaa raop tus pis-yoob la kobs-nu.
28A Manaase ne Efrayiim buudã rot yaa Zozɛf yagensã fãa. 29A Manaase buudã yaa a Makɩɩr dotã sẽn yaa Makɩɩr yagensã, la a Makɩɩr biig a Galaad rotã sẽn yaa Galaad yagensã. 30A Galaad rotã yaa a Yezɛɛr rotã sẽn yaa Yezɛɛr yagensã, a Helɛk rotã sẽn yaa Helɛk yagensã, 31a Asriyɛll rotã sẽn yaa Asriyɛll yagensã, a Sekɛm rotã sẽn yaa Sekɛm yagensã, 32a Semida rotã sẽn yaa Semida yagensã, a Efɛɛr dotã sẽn yaa Efɛɛr yagensã. 33A Efɛɛr biig a Selofaad ka paam bi-ribl ye. Yẽnda roga kom-pugli bala. Bãmb yʋyã la woto: Yaa a Mala, a Hogla, a Milka, a Noha ne a Tɩrsa. 34A Manaase buudã rot la woto. Bãmb sõorã yaa raop tus pis-nu la a yiib la kobs-yopoe.
35A Efrayiim buudã rot la woto: Yaa a Sutela rotã sẽn yaa Sutela yagensã, a Bekɛɛr dotã sẽn yaa Bekɛɛr yagensã, a Tahãn rotã sẽn yaa Tahãn yagensã, 36la a Sutela biig a Ɛɛrã rotã sẽn yaa Ɛɛrã yagensã. 37A Efrayiim buudã rot la woto. Bãmb sõorã yaa raop tus pis-tã la a yiib la kobs-nu. Bu-kãens a yiibã rot yaa a Zozɛf yagense.
38A Benzame buudã rot la woto: yaa a Bela rotã sẽn yaa Bela yagensã, a Asbɛll dotã sẽn yaa Asbɛll yagensã, a Ahiram doogã sẽn yaa Ahiram yagensã, 39a Sufam doogã sẽn yaa Sufam yagensã, ne a Ufam doogã sẽn yaa Ufam yagensã. 40A Bela roogã yaa a Ard dotã sẽn yaa Ard yagensã, ne a Naama roogã sẽn yaa Naama yagensã. 41A Benzame buudã rot la woto. Bãmb sõorã yaa raop tus pis-naas la a nu la kobs-yoobe.
42A Dan buudã roog yaa a yembr bala: yaa a Suham doogã sẽn yaa Suham yagensã. 43A Dan roogã neb sõorã yaa raop tus pis-yoob la a naas la kobs-naase.
44A Asɛɛr buudã rot la woto: yaa Imna roogã sẽn yaa Imna yagensã, la a Isvɩ roogã sẽn yaa Yisevi yagensã, a Beriya roogã sẽn yaa Beriya yagensã. 45A Beriya roogã yaa a Ebɛɛr doogã sẽn yaa Ebɛɛr yagensã, ne a Malkiyɛll doogã sẽn yaa Malkiyɛll yagensã. 46A Asɛɛr da tara bi-pugl t'a yʋʋr boondẽ t'a Seera. 47A Asɛɛr buudã rot neb sõorã yaa raop tus pis-nu la a tãab la kobs-naase. 48A Neftali buudã rot la woto: yaa a Yasiyɛll roogã sẽn yaa Yasiyɛll yagensã, a Guni rotã sẽn yaa Guni yagensã, 49a Yetsɛɛr dotã sẽn yaa Yetsɛɛr yagensã, ne a Sɩlɛm dotã sẽn yaa Sɩlɛm yagensã. 50A Neftali buudã rot neb sõorã yaa raop tus pis-naas la a nu la kobs-naase.
51Israyɛll neb nins fãa b sẽn sõdã sõor yaa raop tus kobs-yoob la a yembre, la kobs-yopoe la pis-tã.
Kana tẽngã pʋɩɩbo
52 #
Sõd 34.13, Zoz 14.1,2 Sẽn-Ka-Saab yeela a Moyiis yaa: 53«Bɩ f pʋɩ tẽngã n kõ tɩ Israyɛll buud fãa paam a pʋɩɩr wa sẽn zems a buudã neb sõore. 54Buud fãa tog n paama zĩig wa sẽn zems a nebã sõore. Buud ning neb sõor sẽn yaa wʋsg tog n paama zĩ-bedre, la buud ning neb sõor sẽn paoodã, tog n deega zĩ-bila. 55Baa ne rẽ fãa, tẽnga pʋɩɩb pʋgẽ, b tog n maana poeere, tɩ buud fãa paam wa zems a nebã sõore. 56La yaa poeerã n na n wilg buud fãa sẽn segd n deeg zĩig ninga. Sã n yaa bu-kãsenga, a reegda zĩ-bedre, la sã n yaa buud sẽn paooda, a reegda zĩ-bilfu.»
B leb n sõda Leevi buudã nebã
57Ad a Leevi buudã neb b sẽn sõdã: a Gɛrsõ roogã sẽn yaa Gɛrsõ yagensã. A Kehat roogã sẽn yaa Kehat yagensã, ne a Meraari roogã sẽn yaa a Meraari yagensã. 58La Leevi buudã rot pʋsẽ, rot a taab n be beenẽ tɩ b nebã ka waoog ye: Yaa Libni roogã, la Ebrõ roogã, la Maali roogã, la Musi roogã, ne a Koore roogã. A Kehat n dog a Amram. 59La a Amram kẽe kãadem ne a Zokebɛɛde, sẽn yaa a Leevi bi-pugl ning a sẽn dog Ezɩpt tẽngã. La a Zokebɛɛd doga a Amram kamb a Tãabo: Yaa a Aarõ, a Moyiisi, ne b tão-poak a Miryam. 60#Sõd 3.2A Aarõ doga kamb a naase. Yaa a Nadaabe, a Abiyu, ne a Eleyazaar la a Itamaare. 61#Mk 10.1,2, Sõd 3.4La a Nadaab ne a Abiyu kii wakat ning bãmb sẽn tall bug-zẽng sẽn ka tẽn-kugrã zug bugmã, n wa yõog wisdã Sẽn-Ka-Saab taoorã.
62Raopã, ne kom-dibli nins yʋʋm sẽn ta kiuugu, la sẽn yɩɩd woto wã fãa sõor yaa neb tus pis-yi la tãabo. La b ka sõd bãmb n naag Israyɛll buudã neb a taabã ye. Bala, bãmb dag n ka segd n paam zĩig tɩ yaa b pʋɩɩr wa Israyɛll buud a taabã ye.
63Israyɛll nebã a Moyiis ne maan-kʋʋd a Eleyazaar sẽn sõdã yɩɩ woto. Yaa Moaab weoogã sẽn be Zʋrdẽ kʋɩlgã noor sẽn tees Zeeriko tẽngã la b maan sõd-kãnga. 64La Israyɛll neb nins b sẽn sõdã sʋka, b ka leb n yãnd neb nins a Moyiis ne maan-kʋʋd a Aarõ sẽn dag n sõd Sɩnayi weoogã pʋgẽ wã ye. 65#Sõd 14.26-35Bala, Sẽn-Ka-Saab dag n keooga bãmb n yeel-b tɩ b na n kii weoogã pʋga. Dẽ, sã n ka a Yefune biig a Kalɛɛb ne a Nun biig a Zozoe bala, ned ba a yembr ka kell ye.
Currently Selected:
Sõdbo 26: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
