Sõdbo 25
25
Israyɛll nebã pʋʋsa wẽn-naandse
1Israyɛll nebã kẽng n tɩ zĩnda Sitim, la beenẽ, bãmb maana yoob ne Moaab kom-pugli wã. 2La Moaab kom-pugli wã kɩtame tɩ Israyɛll nebã kʋ maand n kõ bãmb wẽn-naandsã. Dẽ, Israyɛll nebã naaga Moaab kom-pugli wã n wãb b maandã nemdo, la b pʋʋs b wẽn-naandsã. 3Woto, Israyɛll nebã tɩ naag n pʋʋsa Pewoor wẽn-naandg a Baalle, la Sẽn-Ka-Saab sũurã puuga ne Israyɛll nebã. 4Dẽ, Sẽn-Ka-Saab yeela a Moyiis yaa: «Yõg Israyɛll buudã taoor dãmb n kɩt tɩ b luul-b wĩnto-sʋka mam taoore, dẽ, mam sũurã sẽn yik wʋsg ne Israyɛll nebã na n sigame.» 5Dẽ, a Moyiis yeela Israyɛll bʋ-kaoodbã yaa: «Bɩ yãmb ned kam fãa kʋ a buudã neb nins sẽn pʋʋsd Pewoor wẽn-naandg a Baallã.» 6Wakat ning a Moyiis ne Israyɛll nebã sẽn wa n be sɛk roogã noor n yãbdã, b yãnda Israyɛll ned a yembr sẽn tall Madiyã bi-pugl n wa kẽ a roogẽ. 7La Eleyazaar biig a Fineyaas sẽn yaa a Aarõ yagengã yika nebã sʋk n dɩk kãnde. 8Yẽnda pʋgla raoã n tɩ kẽ n bʋʋg yẽnda ne pagã fu-roogẽ wã, n kõs bãmb b yiibã fãa pɛlã, tɩ b ki. La wakat-kãng bala, bãagã sẽn dag n kʋʋd Israyɛll nebã yalsame. 9La bãagã sẽn da zoe n kʋ neb ninsã sõor yaa neb tus-pisi la a naase.
10Sẽn-Ka-Saab yeela a Moyiis yaa: 11«Gese, maan-kʋʋd a Aarõ yageng a Fineyaas sẽn yaa a Eleyazaar biigã kɩtame tɩ mam sũurã sẽn da yik ne Israyɛll nebã sigi. Bala, bãmb sʋkã, yaa yẽnda n ka sak mam poorẽ, rẽ kɩtame tɩ mam sẽn ka sakd tɩ b waoog wẽnd a to n paas maamã yĩnga, mam ka kʋ Israyɛll nebã zãng ye. 12Woto yĩngã, bɩ f yeel a Fineyaas tɩ m na n maana zems-n-taar kaool ne-a. 13Kaool-kãng yaa yẽnda ne a yagensã yĩnga, la a kɩtdame tɩ bãmb lebg maan-kʋʋdb zamaan fãa yĩnga. Bala, yẽnda wilgame tɩ mam sẽn yaa yẽnda Wẽnnaamã, yẽnda sɩd bee mam poorẽ. Bũmb ning yẽnda sẽn maanã kɩtame tɩ mam kõ Israyɛll nebã b yel-wẽnã sugri. 14Israyɛll ned ning a Fineyaas sẽn lagem ne Madiyã bi-puglã n kʋ wã yʋʋr boondame t'a Zimri, n yaa Sɩmyõ buudã taoor soab a Salu biiga. 15La Madiyã bi-puglã b sẽn kʋ wã yʋʋr da boondame t'a Kozbi. A baaba yʋʋr la a Sʋʋre, n yaa Madiyã buud a yembr rot wʋsg naaba.» 16Sẽn-Ka-Saab yeela a Moyiis yaa: 17«Yik-y n Zab-y ne Madiyã nebã n sãam-b zãnga! 18Bala, bãmb maana sɩlem ne yãmba, bãmb sẽn kɩt tɩ yãmb pʋʋs Pewoor wẽn-naandg a Baallã yĩnga. Bãmb naab a yembr bi-pugl a Kozbi kii wakat ning Sẽn-Ka-Saab sẽn wa n sɩbgd nebã. Bala, bãmb tɩ pʋʋsa Pewoor wẽn-naandg a Baalle.»
B leb n sõda Israyɛll nebã
19Toogã loogr zugẽ.
Currently Selected:
Sõdbo 25: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
