A Matye koe‑noogo 25
25
Pʋg-sadb piig yel-bũndi
1 #
Luk 12.35
Dẽ, arzãn soolem na n yɩɩ wa pa-kuil-n-dãmb piig sẽn dɩgs b fɩtl dãmb n yi n na n tɩ seg pʋg-paal sɩdã. 2Bãmb sʋkã neb a nu yaa yalemba, tɩ nu wã ya yam dãmba. 3Yalembã sẽn na n dɩgs b fɩtl dãmbã, b ka zɩ kaam ye. 4La yamã rãmb rɩgsa b fɩtl dãmbã, la b zɩ kaam ne tʋgdo. 5La pʋg-paal sɩdã sẽn kaoosd waoongã yĩnga, gõeem yõka b fãa tɩ b gũsi. 6Kɛleng n zẽk yʋn-sʋkã n yeele: «Pʋg-paalã sɩd watame! Yi-y n seg-y-yã-a.» 7Dẽ, pa-kuil-n-dãmb kãens fãa yikame n maneg b fɩtl dãmba. 8Yalembã kosa yam dãmbã tɩ b yãk b kaamã bilf n kõ-b tɩ bãmb fɩtl dãmbã sɩnga kũum. 9Yam dãmbã leok-b lame n yeele: «Ayo! Ka na n sek tõnd ne yãmb me ye. Kẽng-y ka-koaasdbã nengẽ n tɩ ra y mens yĩng tɩ rẽnda n são.» 10Bãmb sẽn wa n kẽnd n na n tɩ ra wã, pʋg-paalã sɩd taame. Pʋg-sadb nins sẽn dag n segl n sɛ wã tũu yẽnda n kẽ kãadmã tigr doogẽ, la b paga kʋɩlengã. 11#Luk 13.25Pa-kuil-n-dãmb a taabã yaool n wa waame n yeele: «M soaala! M soaala! Pak-y tɩ d kẽ!» 12La a leoka bãmb yaa: «Sɩd-sɩdã, mam ka mi yãmb ye.» 13Woto yĩnga, bɩ y gũ!#25.13 Neende: yaa moorã gom‑bil sẽn dat n yeel tɩ f ra bas tɩ gõeem yõk‑f ye. Bala, yãmb ka mi daarã, wall wakatã ye.
Talã-rãmb yel-bũndi
(Luk 19.11-27)
14 #
Luk 19.11-27
Arzãn soolmã leb n na n yɩɩ wa rao a yembr sẽn dat n tog sore, n bool a tʋmtʋmdbã, n dɩk a paoongã n pʋɩ-ba. 15A kõo ned a yembr talã a nu, n kõ a yiib soabã talã a yiibu, la a kõ tãabẽ soabã talã a yembre, n zems ned kam fãa sẽn tõe n tall n tʋme, la a bas n tog sore. 16A sẽn loog bal yee, la sẽn deeg-a talã a nu wã loog yã, n tɩ tall-b n leeb n paam yõod talã a nu n paase. 17Sẽn deeg-a talã a yiibã me maana a woto, n paam yõod talã a yiib n paase. 18La sẽn deeg-a talã a yembr tãa wã tɩ tuka bok tẽnga, n bus a zu-soabã ligdi. 19Sẽn wa n kaoose, tʋmtʋmd-kãens zu-soabã waame n zĩnd ne-b n na n geele. 20Sẽn dag n deeg-a talã a nu wã kolgame, la a talla talã a nu wã a sẽn paamã n wa ne n yeele: «Zu-soaba, yãmb dag n kõo maam talã a nu. La ad talã a nu a taab mam sẽn tʋm n paame.» 21A zu-soabã yeel-a lame: «Yaa sõama, tʋmtʋmd sõng sẽn maand sɩda! Fo maana sɩd ne bũmb bilfu, la mam na n kɩtame tɩ fo ges bũmb wʋsg yelle. Wa n paam pʋɩɩr ne f zu-soabã sũ-noogo.» 22Sẽn dag n deeg-a talã a yiibã me kolgame n yeele: «Zu-soaba, yãmb dag n kɩsa maam talã a yiibu, la ad talã a yiib a taab mam sẽn tʋm n paame.» 23A zu-soabã yeel-a lame: «Yaa sõama, tʋmtʋmd sõng sẽn maand sɩda! Fo maana sɩd ne bũmb bilfu, la mam na n kɩtame tɩ fo ges bũmb wʋsg yelle. Wa n paam pʋɩɩr ne f zu-soabã sũ-noogo.» 24Sẽn dag n deeg-a talã a yembr tãa wã yaool n kolgame n yeele: «Zu-soaba, mam dag n miime tɩ yãmb yaa nen-kɛgeng soaba, n kẽebd y sẽn ka bʋdẽ, la y wʋkd y sẽn ka yɛdgẽ ye. 25Dẽ n kɩt tɩ rabeem yõk maam tɩ mam kẽng n tuk bok tẽng n solg y talã wã. Ad-y y talã wã! Deeg-y-yã‑a.» 26A zu-soabã yeel-a lame: «Tʋmtʋmd-wẽng sẽn yaa kʋɩɩma, fo rag n miime tɩ mam kẽebda m sẽn ka bʋdẽ ye, la m wʋkd m sẽn ka yɛdgẽ ye. 27Sã n yaa a woto, fo rag n tog n tɩ ningẽ‑la mam ligdã bãnkẽ, tɩ m sã n wa lebg n wa, bɩ m deeg-a ne yõodo. 28Deeg-y-yã a talã wã n kõ ned ning sẽn tar-a talã piigã. 29#Mat 13.12, Mark 4.25, Luk 8.18Bala, b na n kõo ned ning sẽn tar-a wã t'a paam hal wʋsgo, la sẽn ka tar-a wã, b na n deega baa bũmb bilf ning a sẽn tarã n bas-a. 30#Mat 8.12, 22.13, Luk 13.28La sã n yaa ne tʋmtʋmd ning sẽn ka-a yõodã, lob-y-yã-a lik bida sẽn be yɩngã pʋgẽ, beenẽ na n yɩɩ wiisg la yẽn wãbr n na n zĩndi.»
Buud fãa bʋʋdo
31 #
Mat 16.27,
Mat 19.28
Ninsaal Bi-riblã sã n wa ne b ziirã, la ne b malegsã fãa, b na n zaoonda b ziir geerã zugu. 32Soolem toay‑toayã fãa neb na n tigma bãmb taoore. Bãmb na n welga nebã ne taab wa rũm-kɩɩm sẽn welgd piis ne bʋʋsã. 33Bãmb na n ninga piisã b rɩtgo, la b ning bʋʋsã b goabga. 34Dẽ, Rĩmã na n yeela sẽn be‑b bãmb dɩtgã yaa: «Yãmb dãmb sẽn tar m ba wã barkã, wa-y-yã! Reeg-y soolmã sẽn dag n segl yãmb yĩng hal dũni naaneg wakatã tɩ yɩ y pʋɩɩre. 35Bala, kom yõka maam, la yãmb kõo maam dɩɩb tɩ m dɩ. Ko-yũud yõka maam, la yãmb kõo maam koom tɩ m yũ. Mam dag n yaa sãana, la yãmb sika maam y yiri. 36Mam dag n yaa beelle, la yãmb kõo maam fuug tɩ m yeelge. Mam dag n yaa bãada, la yãmb waa n gesa maam. Mam dag n bee bi-bees roogẽ, la yãmb waa n gesa maam.» 37La nin-tɩrsã na n yeelame: «Zu-soaba, dabʋr la tõnd yãnd yãmb tɩ kom tar yãmb tɩ tõnd kõ yãmb tɩ y rɩ, wall tɩ ko-yũud tar yãmb tɩ tõnd kõ yãmb koom tɩ y yũ? 38Dabʋr la tõnd yãnd yãmb tɩ y ya sãan tɩ tõnd sik yãmb d yiri, wall tɩ y ya beell tɩ tõnd kõ yãmb fuugu tɩ yeelge? 39Dabʋr la tõnd yãnd yãmb tɩ y ya bãada, wall y be bi-bees roogẽ tɩ tõnd wa n ges yãmba?» 40Dẽ, Rĩma na n leoka bãmba: «Sɩd-sɩda, mam yeta yãmb tɩ wakat ning fãa yãmb sẽn maan bõn-kãens kom-kãensã sẽn yaa bõoneg n yɩɩda, la b ya mam ba-biisã, yaa maam la yãmb maan yã.» 41Dẽ poore, b na n yeela neb nins sẽn be-b bãmb goabgã yaa: «Yãmb dãmb kãab-wẽng sẽn be y zutã, zãag‑y ne maam! Kẽng-y bugum sẽn paad wakat sẽn kõn sa wã pʋgẽ, bugum ning sẽn segl sʋtãanã ne a malegsã yĩngã. 42Bala, kom yõka maam, la yãmb ka kõ maam dɩɩb tɩ m dɩ ye. Ko-yũud yõka maam, la yãmb ka kõ maam koom tɩ m yũ ye. 43Mam dag n yaa sãana, la yãmb ka sik maam y yir ye. Mam dag n yaa beelle, la yãmb ka kõ maam fuug tɩ m yeelg ye. Mam dag n yaa bãada, la mam zĩnda bi-bees roogẽ tɩ yãmb ka wa n ges maam ye.» 44La bãmb me na n leokame yaa: «Zu-soaba, dabʋr la tõnd yãnd yãmb tɩ kom wall ko-yũud tar yãmba, wall y yaa sãan bɩ beelle, bɩ bãada, wall y be bi-bees roogẽ la keta tõnd n ka sõng yãmba?» 45La b na n leoka bãmb yaa: «Sɩd-sɩda, mam yeta yãmb tɩ wakat ning fãa yãmb sẽn tõdg n ka maan kom-kãens sẽn yaa bõoneg n yɩɩd fãa wã ned a yembr bõn-kãense, yaa maam la yãmb ka maane.» 46#Dãn 12.2La nin-kãens na n kẽe sɩbgr sẽn kõn sa pʋgẽ, la nin-tɩrsã na n kẽe vɩɩm sẽn kõn sa pʋgẽ.
Currently Selected:
A Matye koe‑noogo 25: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
