A Zozoe 21

Leevi nebã tẽmse

1Leevi buudã rot kãsem-dãmbã kẽnga maan-kʋʋd a Eleyazaar ne a Nun biig a Zozoe, ne Israyɛll buudã kãsem-dãmb nengẽ, 2#Sõd 35.1-8Sɩlo tẽngã sẽn be Kana soolmẽ wã, n yeel-b yaa: «Sẽn-Ka-Saab rag n goma ne a Moyiis n yeel tɩ b yãk tẽms n kõ tõnd tɩ d kẽ, la d soog a pʋ-weesã n wãbneg d rũmsi.» 3Dẽ, Israyɛll nebã kõo Leevi buudã tẽms nins sẽn pʋgdã tɩ b sooge, wa sẽn zems Sẽn-Ka-Saab sẽn yeel tɩ b maan to-to wã.

4B maana poeer a Kehat yagensã yĩnga, la b paama tẽms piig la a tãabo, Maan-kʋʋd a Aarõ yagensã sẽn yaa Leevi buudã sʋka, la yaa tẽms sẽn be Zʋʋda buudã ne Sɩmyõ buudã la Benzame buudã soolem pʋse. 5La b maana poeerã yɛsa, n yãk tẽms piiga, Efrayiim buudã ne Dan buudã la Manaase buudã pʋɩ-sʋk rot soolem pʋsẽ, n kõ a Kehat yagens a taabã. 6B maana poeere, n yãk tẽms piig la a tãab Isakaar buudã ne Asɛɛr buudã ne Neftali buudã la Manaase buudã pʋɩ-sʋkã sẽn be Basan wã soolem pʋgẽ n kõ a Gɛrsõ yagensã.

7B yãka tẽms piig la a yiib Rubɛn buudã ne Gaad buudã ne Zabulõ buudã soolem pʋgẽ, n kõ a Meraari yagensã wa sẽn zems b buudã rot sõore.

8Israyɛll nebã maana poeer n yãk tẽn-bãmbã ne b tẽn-kɩremsã n kõ Leevi yagensã wa Sẽn-Ka-Saab sẽn dag n yeel a Moyiis t'a maanã. 9Tẽms nins b sẽn yãk n na n kõ Zʋʋda buudã ne Sɩmyõ buudã yʋy la d sẽn na n sõdgã. 10B yãka tẽn-bãmb n kõ a Leevi yagensã sẽn yaa a Kehat yagensã sẽn yaa a Aarõ yagensã. Bala, poeerã reng n yãka bãmb pipi. 11B kõo bãmb Kiryat-Arba b sẽn boond tɩ Ebrõ wã. A bee Zʋʋda tãmsã sʋka, la yaa ne a tẽn-kɩremsã sẽn gũbg-a wã. A Arba rag n yaa a Anak ba. 12La b rɩka tẽngã pʋtã ne a tẽn-kɩremsã n kõ a Yefune biig a Kalɛɛbe.

13B yãka weem-tẽms n kõ maan-kʋʋd a Aarõ yagensã, tɩ ned sã n kʋ a to bɩ a zoe n tɩ soond be. Yaa Ebrõ ne a tẽn-kɩremsã, Libna ne a tẽn-kɩremsã. 14Yaa ne Yatɩɩre ne a tẽn-kɩremsã, la Ektemoa ne a tẽn-kɩremsã, 15n paas Holon ne a tẽn-kɩremsã, Debɩɩr ne a tẽn-kɩremsã, 16Ayin ne a tẽn-kɩremsã, Yuta ne a pʋ-weesã, n paas Bɛt-Semees ne a pʋ-weesã, yaa tẽms a wɛ la b kõ buud a yiibã. 17B sẽn yãk Benzame buudã tẽms ninsã yaa Gabawõ ne a pʋ-weesã, Geba ne a pʋ-weesã, 18n paas Anot ne a pʋ-weesã, n naag ne Almon ne a pʋ-weesã, yaa tẽms a naase. 19A Aarõ yagensã sẽn yaa maan-kʋʋdbã tẽmsã fãa sõor yaa tẽms piig la a tãabo.

20B maana poeerã n yãk Efrayiim yagensã soolem tẽms n kõ a Kehat yagens a taabã sẽn yaa Leevi buudã. 21B maana poeer n yãk tẽms n kõ a Kehat yagensã tɩ ned sã n kʋ a to, bɩ a zoe n tɩ soond be: yaa Sɩkɛm sẽn be Efrayiim tãmsã sʋkã ne a pʋ-weesã, la Gezɛɛr ne a pʋ-weesã, 22n paas Kibtesayim ne a pʋ-weesã, n naag ne Bɛt-Horon ne a pʋ-weesã, yaa tẽms a naase. 23Dan buudã tẽms b sẽn yãkã la woto: Ɛlteke ne a pʋ-weesã, ne Gibetõ ne a pʋ-weesã, 24n paas Ayalõ ne a pʋ-weesã, n naag ne Gat-Rimo ne a pʋ-weesã, yaa tẽms a naase, 25Manaase buudã pʋɩ-sʋkã tẽms b sẽn yãkã yaa: Taanak ne a pʋ-weesã, ne Gat-Rimo ne a pʋ-weesã, yaa tẽms a yiibu. 26A Kehat yagens a taabã tẽms yaa tẽms piig ne b pʋ-weese.

27B yãka tẽms a yiib ne b pʋ-wees Manaase buudã pʋɩ-sʋkã soolem pʋgẽ n kõ a Gɛrsõ yagensã sẽn yaa Leevi buudã, tɩ ned sã n kʋ a to bɩ a zoe n tɩ soond beenẽ. Yaa Golan sẽn be basannã ne a pʋ-weesã, n paas Bɛstra ne a pʋ-weesã, yaa tẽms a yiibu. 28B leb n yãka Kisyõ ne a pʋ-weesã, n paas Dabrat ne a pʋ-weesã Isakaar buudã soolmã pʋgẽ, 29n paas Yarmut ne a pʋ-weesã, n naag ne Ɛn-Ganim ne a pʋ-weesã, yaa tẽms a naase. 30B leb n yãka Miseyall ne a pʋ-weesã, Abdõ ne a pʋ-weesã Asɛɛr buudã soolem pʋgẽ, 31n paas ne Hɛlkat ne a pʋ-weesã, ne Rehoob ne a pʋ-weesã, yaa tẽms a naase. 32Neftali soolmã pʋga, b yãka tẽms beenẽ tɩ ned sã n kʋ a to, bɩ a zoe n kẽng be. Yaa Kadɛɛs sẽn be Galɩle wã ne a pʋ-weesã, Hamot-Door ne a pʋ-weesã, n paas ne Kartãn ne a pʋ-weesã, yaa tẽms a tãabo. 33Gɛrsõ yagensã paama tẽms piig la a tãab wa sẽn zems b buudã rot sõore.

34Leevi buudã rot neb sẽn ket yaa a Meraari yagensã. B yãka Zabulõ soolmã tẽms n kõ bãmba. Yaa Yokneyam ne a pʋ-weesã, Karta ne a pʋ-weesã, 35Dimna ne a pʋ-weesã, n paas Nahalall ne a pʋ-weesã. Rẽ yaa tẽms a naase. 36Rubɛn buudã soolem pʋgẽ, b yãka Bɛtsɛɛr ne a pʋ-weesã, Yatsa ne a pʋ-weesã, 37n paas Kedmot ne a pʋ-weesã, ne Mefat ne a pʋ-weesã. Rẽ yaa tẽms a naase. 38Gaad buudã soolem pʋgẽ, b yãka tẽms tɩ ned sã n kʋ a to ne yĩdgu, bɩ a zoe n tɩ soond be. Yaa Ramot sẽn be Galaadã ne a pʋ-weesã, Mahanayim ne a pʋ-weesã, 39n paas Hɛsbon ne a pʋ-weesã, ne Yazɛɛr ne a pʋ-weesã. Yaa tẽms a naas la fãa. 40B sẽn maan poeerã n yãk tẽms nins n kõ a Meraari yagensã sẽn yaa Leevi buudã kellã, wa sẽn zems b buudã rot sõorã, yaa tẽms piig la a yiibu.

41Leevi buudã sẽn paam tẽms nins Israyɛll nebã soolem pʋgẽ wã, yaa tẽms pis-naas la a nii, ne b pʋ-weesã. 42Tẽn-kãensã tẽng fãa rag n tara a pʋ-wees tɩ gũbg-a. Tẽmsã fãa rag n yaa woto.

Israyɛll nebã reega tẽngã

43Sẽn-Ka-Saab maana a woto, n kõ Israyɛll nebã tẽngã wa bãmb sẽn dag n kãab b yaab-rãmbã tɩ b na n kõ-b lame wã. Israyɛll nebã reega tẽngã n kẽ. 44Sẽn-Ka-Saab kɩtame tɩ Israyɛll nebã soolmã sẽn gilgã fãa zĩnd ne laafɩ, wa bãmb sẽn dag n kãab Israyɛll kambã yaab-rãmb tɩ b na n maaname wã. Israyɛll nebã bɛ baa a yembr ka tõog n yals n teeg a yãoog ne bãmb ye. Sẽn-Ka-Saab kɩtame tɩ bãmb tõog b bɛɛbã fãa. 45Kãab-nood nins fãa Sẽn-Ka-Saab sẽn dag n kãab Israyɛll buudã baa a yembr ka vaal ye, b fãa paama pidsgu.

Currently Selected:

A Zozoe 21: MPBU

Highlight

Copy

Compare