A Zozoe 20

B yãka weem-tẽmse

1 # Sõd 35.9-34, Tõ 4.41-43, 19.1-13 Sẽn-Ka-Saab goma ne a Zozoe n yeel-a yaa: 2«Gom ne Israyɛll nebã n yeel-b yaa: Yãk-y weem-tẽms yãmb sẽn tõe n tɩ kẽ n soonde, wa mam sẽn dag n yeel a Moyiis t'a togs yãmbã. 3Ned sã n kʋ a to ne yĩdgu, tɩ ka ne pʋ-toogo, bɩ a zoe n kẽng beenẽ. Tɩ sẽn ki-a wã neb sã n dat n dok b sũur ne yẽnda, a sẽn kʋ b nedã yĩnga, bɩ b ra paam-a ye. 4Ned sã n kʋ a to, a tog n zoe n kẽnga tẽn-bãmb tẽng a yembr pʋgẽ. A sã n ta tẽngã noore, bɩ a yals be n togs a yellã tẽngã kãsem-dãmba. Kãsem-dãmbã na n deeg-a-la b tẽngã pʋga, n bao zĩig n kõ-a t'a zĩnd bãmb sʋka. 5Ned ning sẽn dat n dok a sũurã sã n pʋgl yẽnda n wa, bɩ kãsem-dãmb ra sak n yõk sẽn kʋ-a nedã n kɩs ye. Bala, a ka kʋ a to wã ne pʋ-toog ye, yaa yĩdgu, beem sẽn dag n ka be b sʋkã yĩnga. 6Bɩ yẽnda zĩnd tẽn-kãng pʋg hal tɩ b wa bʋ a bʋʋd Israyɛll nebã taoore, la hal tɩ maan-kʋʋr kãsem ning sẽn vɩ wakat-kãngã ki. Dẽ, sẽn kʋ-a nedã tõe n lebg n leba a tẽngẽ wã, ne a nebẽ wã, tẽng ning yẽnda sẽn yi n zoe wã pʋgẽ.»

7Israyɛll nebã yãka Galɩle tẽng a ye sẽn boond tɩ Kedɛɛs n be Neftali tãmsã sʋka, ne Sɩkɛm sẽn be Efrayiim tãmsã sʋkã, n paas ne Kiryat-Arba b sẽn boond tɩ Ebrõ n be Zʋʋda tãmsã sʋkã. 8La Zʋrdẽ kʋɩlgã rʋʋndã, Zeeriko nin-taoorã, b yãka Bɛtsɛɛr sẽn be weoogẽ wã, yaa tẽn-nabdrẽ sẽn be Rubɛn nebã tẽngã pʋgã. Bãmb yãka Ramot sẽn be Galaad soolmẽ wã sẽn yaa Gaad buudã soolmã sʋkã. B leb n yãka Golan sẽn be Basannã, Manaase buudã soolmã sʋka. 9Tẽn-bãmbã n yaa tẽms nins b sẽn yãk Israyɛll nebã yĩnga, ne sãambã sẽn be bãmb sʋkã yĩnga, tɩ ned sã n kʋ a to ne yĩdgu, bɩ a zoe n kẽng be, tɩ b ra wa kʋ-a n dok b sũur t'a nan ka yals nebã taoor tɩ b kao a bʋʋd ye.

Currently Selected:

A Zozoe 20: MPBU

Highlight

Copy

Compare