A Zozoe 17

A Manaase buud pʋɩ-sʋkã soolem

1A Manaase sẽn yaa a Zozɛf bi-rẽengã reega pʋɩɩre. A Manaase bi-rẽengã sẽn yaa a Galaad ba wã, paama Galaad ne Basan, bala, a rag n yaa gãndaoog zabr pʋga. 2B yãka zĩis n kõ a Manaase kamb a taabã, wa sẽn zems b rotã sõore. Yaa sẽn kẽed ne a Abiyezɛɛr kambã, a Helɛk kambã, a Asriyɛll kambã, a Sɩkɛm kambã, a Hefɛɛr kambã ne a Semida kambã. Bãmba fãa yaa a Zozɛf biig a Manaase kom-dibli, wa sẽn zems b rotã sõore. 3A Manaase biig a Makɩɩr biig a Galaad biig a Hefɛɛr biig a Selofaad ka paam bi-ribl ye. Yẽnda roga kom-pugli bala. Kom-pugli wã yʋy la woto: Yaa a Mala, a Noa, a Hogla, a Milka ne a Tirsta. 4#Sõd 27.1-7Bãmb kẽng n tɩ yãnda maan-kʋʋd a Eleyazaar ne a Nun biig a Zozoe, ne nanambsã n yeel yaa: «Sẽn-Ka-Saab kõo a Moyiis noor t'a kõ tõnd zĩis d ba-biisã sʋka.» Dẽ, b kõo bãmb pʋɩɩr b ba wã kamb sʋka, wa Sẽn-Ka-Saab sẽn dag n yeelã. 5B maana poeer n kõ a Manaase zĩis piiga, n paas Galaad ne Basan tẽngã sẽn be Zʋrdẽ kʋɩlgã rʋʋndã. 6Bala, a Manaase yagensã paama b pʋɩɩr b yaab a Manaase yagensã sʋka, t'a Manaase yagens a taabã soog a Galaad tẽngã.

7A Manaase soolmã toadg ra sɩngda ne Asɛɛr sẽn be Mikmeta wã neng ne neng ne Sɩkɛm, n teesd rɩtgo, Ɛn-Tapuwa nebã sẽnẽ. 8Tapuwa tẽngã rag n yaa a Manaase yagensã n so, la Tapuwa ning sẽn be Manaase yagensã toadgẽ wã yaa Efrayiim yagensã n so. 9Toadgã sigd n dabda Kana ko-soogã goabga. Tẽn-bãmb yaa a Efrayiim n so n tãag Manaase tẽmsã sʋka. Manaase nebã toadg sẽn be ko-soogã rɩtgã tɩ tãaga ko-kãsengã. 10Nug-goabg soolmã rag n yaa Efrayiim nebã n so, tɩ Manaase nebã so rɩtg tẽmsã. Dẽ, yaa ko-kãsengã n yaa bãmb toadga. Todsã tɩ yeka Asɛɛr soolmã sẽn be rɩtgã sẽnẽ tɩ Isakaar soolmã be yaangã. 11A Isakaar ne a Asɛɛr soolmã pʋga, a Manaase paama Bɛt-Seyã ne a tẽn-kɩremsã n paas Yibleyam ne a tẽn-kɩremsã, la b soog neb nins sẽn be Door tẽngã ne b tẽn-kɩremsã, ne neb nins sẽn be Ɛn-doorã ne b tẽn-kɩremsã, ne neb nins sẽn be Taanakã ne b tẽn-kɩremsã, ne neb nins sẽn be Megido wã ne b tẽn-kɩremsã. Yaa soolem a tãabo. 12#Bʋ 1.27,28A Manaase yagensã ka tõog n deeg tẽn-bãmb ye. Dẽ, Kana nebã kell n yãka yam tɩ b na n paa soolem-kãng pʋga. 13Israyɛll nebã sẽn wa n paam pãngã, b modga Kana nebã tɩ b tʋm bãmb tʋʋm-wɛglã, la b ka tõog n dig-b n yiis tẽngã ye.

14A Zozɛf yagensã kẽng n tɩ yẽgma ne a Zozoe n yeel yaa: «Sẽn-Ka-Saab ninga tõnd zug bark hal tɩ ta rũndã, tɩ tõnd lebg wʋsgo, la yaa bõe yĩng tɩ yãmb kõ tõnd pʋɩɩr a yembr bala, zĩig a ye tãa bala?» 15A Zozoe yeela bãmb yaa: «Sã n yaa tɩ yãmb yaa wʋsgo, bɩ y kẽng n tɩ kɛ tʋgã sẽn be Ferɛɛz rãmbã ne Refayim nebã tẽmsẽ wã n kẽ, bala, Refayim tãngã yaa sẽk ne yãmba.» 16A Zozɛf yagensã yeelame yaa: «Yaa sɩd tɩ tãngã yaa sẽk ne tõndo, la sẽn paas me, Kana nebã sẽn be longã pʋgã fãa, ne neb nins sẽn be Bɛt-Seyã wã, ne b tẽn-kɩremsã, ne neb nins sẽn be Zizreyɛll longã pʋgã fãa tara kut saar-dãmba.» 17A Zozoe yeela a Zozɛf yagensã, a Manaase ne a Efrayiim yagensã yaa: «Yãmb yaa buud sẽn yaa wʋsgo, n tar pãng wʋsgo. Dẽ wã, y ka na n deeg pʋɩɩr a yembr bal ye. 18Woto wã yĩnga, yãmb na n sooga tãngã, baa ne a sẽn yaa tʋgrã. Yãmb na n kɛ-a lame n sooge. Yãmb na n diga Kana nebã, baa ne bãmb sẽn tar kut saar-dãmba, la baa ne b sẽn tar pãngã.»

Currently Selected:

A Zozoe 17: MPBU

Highlight

Copy

Compare