A Zozoe 13

Israyɛll nebã sẽn tog n dees tẽms ninsi

1A Zozoe rag n kʋʋla wʋsgo. Dẽ, Sẽn-Ka-Saab yeel-a lame yaa: «Fo lebga nin-kẽema, fo kʋʋla wʋsgo, la tẽms nins sẽn ket yãmb sẽn tog n deegã yaa wʋsgo. 2Ad tẽms nins sẽn ket yãmb sẽn tog n deegã: Yaa Filistẽ-dãmbã sẽn so wã fãa, ne Gesʋʋr dãmbã soolem zãnga. 3Sẽn sɩng ne Sɩhoor kʋɩlgã sẽn zoet n dabd Ezɩptã hal n tãag Ekrõ sẽn be rɩtgã, bãmb fãa rag n yaa Kana-rãmbã n so-ba. La b lebga Filistẽ-dãmbã rĩm-dãmb a nu wã soolem: yaa Gaaza, Asdoode, Askalon, Gate, ne Ekrõ rĩmã, n paas ne Ave-rãmbã. 4Sẽn sɩng ne goabgã, yaa Kana-rãmba tẽng zãnga, ne Meytara sẽn yaa Sɩdõ nebã soolmã, hal n tãag Afɛke, n tɩ ta Amoor-dãmbã tẽng toadga, 5la ne Geball rãmbã tẽnga, ne Libã yaang tẽmsã, sẽn sɩng ne Baall-Gaad sẽn be Hɛrmo tãngã pendã n tɩ tãag Hamat tẽngã noore, 6#Sõd 33.54n paas neb nins sẽn be-b tãmsã zutã, sẽn sɩng ne Libã n tɩ tãag Misrefot-Mayim, ne tẽms nins fãa Sɩdõ nebã sẽn so wã. Mam na n deesa tẽn-bãmbã fãa tɩ yɩ Israyɛll nebã pʋɩɩre. La bũmb sẽn be bala, pʋɩ tẽngã n kõ Israyɛll nebã tɩ yɩ b pʋɩɩre wa mam sẽn dag n yeel foomã. 7Moasã, bɩ f pʋɩ-a n kõ Israyɛll buud a wɛ wã ne Manaase buudã pʋɩ-sʋkã.»

Manaase, Rubɛn, ne Gaad buudã tẽmse

8 # Sõd 32.33, Tõ 3.12 Manaase buudã pʋɩ-sʋk a yembrã, ne Rubɛn buudã la Gaad buudã rag n zoe n deega b zĩis Zʋrdẽ kʋɩlgã yaanga, wa Wẽnnaam tʋmtʋmd a Moyiis sẽn dag n kõ-bã. 9Yaa sẽn sɩng ne Arowɛɛr sẽn be Arno ko-soogã noorã, la ne tẽng ning sẽn be longã pʋgẽ wã, n paas Medeba tẽn-nabdrã hal n tãag Dibõ. 10Yaa sẽn naag ne Amoor-dãmbã rĩm a Sihon tẽmsã fãa. Rĩm-kãng rag n dɩta naam Hɛsbon, la a so tẽngã hal n tɩ tãag Amo-rãmbã toadga, 11n paas Galaad sẽn yaa Gesʋʋr dãmbã ne Maaka rãmbã soolmã, ne Hɛrmo tãngã zug rãmbã ne Basan gillã fãa n tɩ tãag Salka. 12Tẽn-kãens yaa rĩm a Oog sẽn be Basan wã soolem. A Oog rag n soo Astarot ne Edreyi sẽn dag n yaa Refayim dãmbã yaoolem tẽngã. A Moyiis n dag n zab n tõog n dees tẽn-bãmba. 13La baoosgo, Israyɛll nebã ka reeg Gesʋʋr dãmbã ne Maaka rãmbã tẽms ye. Rẽ kɩtame tɩ Gesʋʋr tẽngã ne Maaka tẽngã neb ket n be Israyɛll nebã sʋk hal tɩ ta rũndã.

14 # Tõ 18.1 Yaa Leevi buudã bal la b ka kõ tẽms tɩ yɩ b pʋɩɩre. Bãmb pʋɩɩr yaa maoong sẽn yõogd bugum Sẽn-Ka-Saab sẽn yaa Israyɛll Wẽnnaamã yĩngã, wa bãmb sẽn dag n yeel b tʋmtʋmd a Moyiisã.

15Dẽ, a Moyiis kõo Rubɛn nebã b pʋɩɩre, wa sẽn zems b roto. 16Bãmb soolmã sɩngda Arowɛɛr sẽn be Arno ko-soogã noorã, ne tẽng ning sẽn be longã pʋgẽ wã, n paas tẽn-nabdrã sẽn pẽ Medeba wã, 17n paas Hɛsbon ne a tẽn-kɩremsã fãa sẽn be tẽn-nabdrẽ wã. Yaa Dibõ, Bamot-baalle, Bɛt-baale, Meyõ, 18Yatsa, Kedmote, Mifaate, 19Kiriyatayim la Sibma ne Serɛt-Sahaar sẽn be longã pʋgẽ kunkubrã zugã, 20n paas Bɛt-pewoor ne Pisga sigdsã, la Bɛt-Yesimote, 21n paas tẽms nins fãa sẽn be tẽn-nabdrẽ wã, n naag ne Amoor-dãmbã rĩm a Sihon sẽn dag n dɩt naam Hɛsbonnã sẽn so tẽms ninsã. A Moyiis rag n tõoga yẽnda ne a nanamb-bãoonegã fãa: Yaa Madiyã rãmbã, Evi rãmbã, Rekɛm dãmbã, Suur dãmbã, Ʋʋr dãmbã, ne Reba rãmbã, b fãa rag n yaa Sihon nanamb-bi n be tẽn-kãngã. 22Israyɛll nebã sẽn kʋ neb nins ne zabr sʋʋgã sʋka, a Bewoor biig a Balaam sẽn yaa bagã rag n naaga be. 23Zʋrdẽ kʋɩlgã ne a kʋɩl-koakã n dag n yaa Rubɛn nebã toadga. Ad Rubɛn nebã pʋɩɩr wa sẽn zems b roog-roogo: Yaa tẽmsã ne b tẽn-kɩremsã.

24A Moyiis kõo Gaad buudã b pʋɩɩre, wa sẽn zems b rotã. 25Bãmb soolmã yaa Yazɛɛre, ne Galaad tẽmsã fãa, n paas Amo-rãmbã soolem pʋɩ-sʋka, n tall n tɩ tãag Arowɛɛr sẽn teesd Raba sẽnẽ, 26sẽn sɩng Hɛsbon n tɩ ta Ramat-Mitspe, ne Betonim, sẽn sɩngd ne Mahanayim n tɩ tãag Debɩɩr toadgã, 27n paas ne longẽ wã, la Bɛt-Haram, ne Bɛt-Nimra, Sukote, n paas ne Safon sẽn yaa Hɛsbon rĩm a Sihon soolmã kellã, ne Zʋrdẽ kʋɩlgã ne a kɩremsã, hal n tãag Kinerɛt ko-kãsengã zãng sẽn be Zʋrdẽ kʋɩlgã rʋʋndã yaangã. 28Ad pʋɩɩr ning b sẽn kõ Gaad rãmbã wa sẽn zems b roto. Yaa tẽmsã ne b tẽn-kɩremsã. 29A Moyiis dag n kõo Manaase buudã pʋɩ-sʋkã b pʋɩɩre, wa sẽn zems b roto. 30Bãmb soolmã toadg sɩngda Mahanayim ne Basan gillã fãa, Basan rĩm a Oog soolmã fãa, ne Yayɩɩr tẽms pis-yoobã fãa sẽn dag n be Basan soolmẽ wã. 31Galaad soolmã pʋɩ-sʋka, ne Astarot la Edreyi sẽn yaa Basan rĩm a Oog soolmã tẽmsã yɩ a Makɩɩr sẽn yaa a Manaase yagensã pʋɩ-sʋkã pʋɩɩre, wa sẽn zems b roto.

32Tẽn-bãmbã yaa tẽms nins a Moyiis sẽn dag n pʋɩ Moaab tẽn-nabdrã pʋgã, Zʋrdẽ kʋɩlgã rʋʋndã, sẽn teesd yaangã, Zeeriko tẽngã sẽnẽ wã. 33#Sõd 18.20, Tõ 18.2A Moyiis ka kõ Leevi buudã pʋɩɩr ye. Bala, Sẽn-Ka-Saab sẽn yaa Israyɛll Wẽnnaamã n yaa bãmb pʋɩɩre, wa Sẽn-Ka-Saab sẽn dag n yeel a Moyiis bãmb wɛɛngẽ wã.

Currently Selected:

A Zozoe 13: MPBU

Highlight

Copy

Compare