A Zowɛlle 2
2
Sẽn-Ka-Saab daarã kolgdame
1Peeb-y baorg Sɩyõ!
Kelm-y mam tãn-sõngã zugu.
Bɩ tẽngã nebã fãa rig ne rabeem!
Bala, Sẽn-Ka-Saab daarã watame,
la a taame n sɛ.
2Yaa lik ne lik bida daare,
na n yɩɩ sawat sẽn yaa lik tuu daare,
ra-kãng wata wa zĩ-yẽegr sẽn pukd tãmsã zutu.
Yaa buud#2.2 Buudu: Tɩ y ges-y 1.6 zĩigẽ bilgrã. sẽn yaa wʋsgo, n tar pãnga,
Bu-kãng buud zɩ n zĩndi,
la a buud kõn tol n leb n zĩndi,
hal baa zamaan ning sẽn watã pʋgẽ ye.
3Bu-kãng na n waa wa bugum sẽn dɩta,
a taoor yaa bug-witim n dɩtẽ,
t'a poorẽ yaa bugum n dɩtẽ.
Sẽn deng a waoongã, tẽngã rag n yaa wa
Edɛn zẽedã zĩiga,
la a loogrã poore, tẽngã sãama zãnga,
n lebg we-raoogo.
Bũmb ka tõe n zoe n põs-a ye.
4 #
Vẽn 9.7-9
Bãmb bʋrgã wẽnda wiid sẽn zoete,
bãmb zoeta wa wed-rʋʋdba.
5B maanda bʋrg wa saar-dãmba,
wa saar-dãmb sẽn yi tãms zut n zoet n sigda.
B bʋrgã wẽnda bug-witim bʋrgo.
B wata wa tãb-biis sẽn tar pãng
sẽn teedg n na n zabe.
6Nebã sã n yãnd b sẽn watã,
lebga rabeem la rigbu,
tɩ nebã fãa nens bendge.
7Bãmb zoeta wa gãndaado,
b gãensda lals wa zabr pʋgẽ gãndaado.
B ned kam fãa teesa tɩrg n kẽnda,
n ka bʋdgd n bas a sor ye.
8Bãmb ned ba a yembr ka tusd a to ye.
Ned kam fãa rɩka a sore.
Bãmb wẽdgda pɛɛmã sẽn fɩɩndã sʋk n loogdẽ,
la b ka sãeegd n bas taab ye.
9Bãmb kẽe tẽngã ne pãnga,
n zoet lalsã zut n tũud peem-leesẽ wã
n kẽed rotã pʋs wa wagda.
10 #
Vẽn 8.12
B sã n watẽ, tẽn-gãongã rĩmdame,
tɩ saasã miimdẽ, tɩ wĩndgã ne kiuugã lebgd lika,
tɩ ãdsã vẽenem ki.
11 #
Vẽn 6.17
Sẽn-Ka-Saab lʋɩ b tãb-biisã taoor n tãsdẽ,
bãmb tãb-biisã sõor yaa kʋʋngo,
sẽn sakd-b bãmb noorã tara pãnga.
Bala, Sẽn-Ka-Saab daarã yaa ra-kãsenga,
la a seka yɛɛsg wʋsgo.
Dẽ, ãndã n na n tõog n põs ra-kãnga?
Yam tekr wakate
12Moasã yɛsa, Sẽn-Ka-Saab yetame:
«Lebg-y n wa-y mam nengẽ ne y sũyã fãa,
wa-y ne no-loeere, ne yãbr la wiisgu!
13Da pãrs-y y fut ye, maneg-y y sũyã,
n lebg n wa Sẽn-Ka-Saab sẽn yaa yãmb
Wẽnnaamã nengẽ,
bala, b yaa sugr soaba, la nimbãan-zoeer soaba,
bãmb sũur ka yikd tao-tao ye,
la b yaa nonglem-kãseng soaba,
bãmb sã n sɩbge, b sũurã sãamdame.
14Ãnda n mi b sã n ka na n tek yam,
wall b sã n ka na n ning bark b sã n wa pɩʋʋgdẽ?
Wa-y ne bõn-koaadl kũuni, la bõn-yũudl kũuni,
n wa kõ Sẽn-Ka-Saab sẽn yaa yãmb Wẽnnaamã.
15Peeb-y baorg Sɩyõ!
Yãk-y daar no-loeer yĩnga,
moon-y tigin-kãseng daare!
16Tigm-y nebã, segl-y tiging sẽn welg toore!
Tigm-y kãsem-dãmbã, la y tigim kambã,
baa ne kom-peelsã sẽn ket n yẽsemdẽ wã fãa!
Bɩ yi-kãad-paalsã yi b rotẽ wã,
tɩ pʋg-paalsã me yi b rotẽ!»
17Bɩ maan-kʋʋdbã sẽn tʋmd Sẽn-Ka-Saab yĩngã
yals tẽn-kugrã ne zãongã sʋk n yãb n yeele:
«Sẽn-Ka-Saabo, zoe-y y nebã nimbãanega!
Da-y ning-y yãmb nebã yãnde,
tɩ b wa lebg yel-bũnd buud a taabã yĩnga,
tɩ b yetẽ tɩ bãmb Wẽnnaamã bee yɛɛnẽ ye.»
Sẽn-Ka-Saab leoka b nebã
18Sẽn-Ka-Saab nonga b tẽngã
ne nonglem-kãsenga.
Bãmb zoee b nebã nimbãanega.
19Sẽn-Ka-Saab leoka b nebã n yeele:
«Mam na n leb n kõo yãmb koodo,
la m kõ-y reezẽ rã-paalga, ne kaam,
yãmb na n tɩgame.
Mam ka na n leb n bas tɩ yãmb paam
yãnd buud a taabã taoor ye.
20Mam na n diga yãmb nug-rɩtg bɛɛbã
tɩ b zãag ne-yã,
mam na n dig-b lame n tɩ kẽes tẽn-koɛɛng
sẽn yaa vɩ-raoog pʋgẽ,
m na n diga b tãb-biis nins sẽn deng taoorã
n kẽes ko-kãsengã sẽn be yaangã pʋga,
la m dig b tãb-biis nins sẽn pa poorẽ wã
n kẽes ko-kãsengã sẽn be nin-taoorã pʋga.
Bãmb na n põogame tɩ b yũugã zẽke,
b põogrã yũug na n wulumda zĩig zãnga,
bãmb sẽn maan yel-bɛdã yĩnga.
21Tẽnga, ra zoe rabeem ye,
bɩ f maan sũ-noog n kɩdme,
bala, Sẽn-Ka-Saab maanda tʋʋm-kãsemse!
22We-rũmsi, da zoe-y rabeem ye.
Bala, yamd leb n tobda we-raoogẽ wã,
la tɩɩsã leb n womda biisi,
kankamsã ne reezẽ tɩɩsã wom n zõondame.
23Sɩyõ nebã, kɩdm-y-yã,
la y maan sũ-noog ne Sẽn-Ka-Saab
sẽn yaa yãmb Wẽnnaamã,
bala, bãmb kɩtame tɩ dẽenem saag ni
wa sẽn zems a wakate,
bãmb sika sa-kẽeng yãmb yĩnga,
bãmb kɩtame tɩ dẽenem ne yaoolem
saag ni wa pĩndã.
24Zeesã na n leb n pida ne koodo,
la sĩmsã na n leb n pida ne reezẽ rã-paalga, la kaam.
25Mam na n lebsa yãmb y koodã,
sʋ-kitrzĩgnisã ne nesneedã la kalwaarã
ne zũnzũyã sẽn dɩ wã.
Bãmb yaa mam tãb-bi-kʋʋng m sẽn tʋm
tɩ b zab ne yãmba.
26Yãmb na n dɩɩme n tɩge,
la y na n pẽga Sẽn-Ka-Saab sẽn
yaa yãmb Wẽnnaamã yʋʋre,
bãmb sẽn maan tʋʋm-kãsems n kõ yãmbã yĩnga.»
B yeelame: «Mam nebã kõn tol n leb n paam yãnd ye.»
27Yaa woto la y na n bãng tɩ mam bee ne Israyɛlle,
la mam yaa Sẽn-Ka-Saab sẽn yaa yãmb Wẽnnaam,
la Wẽnnaam a to ka be ye.
Mam yetame: «Mam nebã kõn
tol n leb n paam yãnd ye.»
Currently Selected:
A Zowɛlle 2: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
