A Zeremi 46
46
1Ad goam nins Sẽn-Ka-Saab sẽn yeel b no-rɛɛs a Zeremi, sẽn kẽed ne soolem-dãmbã wɛɛngẽ.
B tõoga Ezɩpt nebã Karkemiis tẽnga
2 #
Eza 19.1-25, Eze 29.1—32.32 Yaa sẽn kẽed ne Ezɩpt wɛɛngẽ, la sẽn kẽed ne Ezɩpt rĩm a Faarõ Neko tãb-biisã wɛɛngẽ. Tãb-biisã rag n bee Efrat kʋɩlgã noore, Karkemiis soolmã pʋga. Babilond dĩm a Nebukatnedzaar rag n zaba ne bãmb n tõoge. Wakat-kãng tɩ yaa Zʋʋda rĩm a Zoziyaas biig a Yoyakim sẽn deeg a naamã tɩ yʋʋm-naaslẽ.
3Segl-y gãn-bi wã ne gãn-bɛdã.
Kẽng-y zabrã zĩigẽ!
4Sog-y wiidã!
Wed-rʋʋdba, zomb-y y wiidã!
Fõgn-y y kut pugli n yals y zĩigẽ!
Segl-y y kãnã!
Yeelg-y y gãn-tigsã!
5Bõe yĩng tɩ mam neẽ tɩ bãmb yɛɛsame?
Bãmb tardame n lebd poorẽ.
B tõoga bãmb gãndaadã,
Bãmb zoetame, b zoetame n ka
wẽnegd b poorẽ ye.
Zĩigã fãa lebga pelen-yɩka!
Maam a Sẽn-Ka-Saab n yeele.
6Bɩ sẽn tʋʋl-a ne zoees ra tõog n zoe ye!
Bɩ gãndaoog ra tõog n põs ye!
Bãmb lakdame n lʋɩt
tẽngã nug-rɩtg sẽnẽ,
Efrat kʋɩlgã noore.
7Ãnda la sẽn fudgd wa Nill kʋɩlgã
koom sẽn pid n daagdẽ wã?
8Yaa Ezɩpt n fudgd wa Nill kʋɩlgã
koom sẽn pid n daagdẽ wã.
A yetame: Mam na n zẽkame
n lim dũniyã.
Mam na n menesa tẽmsã ne nebã.
9Wed-rʋʋdba, zomb-y-yã!
Saar-dãmba, fõd-y n kẽ-y-yã!
Kuus ne Put gãndaad sẽn tõe
n tall gãn-bi n zabe,
la Luud gãndaad nins sẽn
mi tãp yãagrã,
yik-y n kẽng-y-yã!
10Rũndã yaa Zu-soabã sẽn yaa
Saasẽ-Pãng-Soabã daare.
Yaa sũ-dokr daare,
yaa daar b sẽn na n dok
b sũur ne b bɛɛbã.
Zabr sʋʋg vargdame.
A rɩtame n yũud bãmb zɩɩm n tɩgda.
Yaa maoong Zu-soabã sẽn yaa
Saasẽ-Pãng-Soabã yĩnga,
wĩndg sẽn lʋɩtẽ dɩtg tẽngã pʋgẽ,
Efrat kʋɩlgã noore.
11Ezɩpt tẽn-neere, m yãbd-fo!
Kẽng Galaad n tɩ bao kaam!
Fo sẽn tɩpd f mengã yaa zaalem,
tɩɩm sẽn tõe n maag foom ka be ye.
12Buud a taabã wʋmda f yãndã yelle,
la f kelemsã zẽk n pida dũniyã gilli,
bala, gãndaadã kanda taab n lʋɩtẽ,
bãmb naaga taab n lʋɩtẽ.
Ezɩpt yãmbgo
13 #
Zer 43.10-13
Ad koɛɛg ning Sẽn-Ka-Saab sẽn kõ b no-rɛɛs a Zeremi, sẽn kẽed ne Babilond dĩm a Nebukatnedzaar sẽn wat n na n sãam Ezɩptã wɛɛngẽ:
14«Moon-y-yã-a Ezɩpt tẽngã pʋgẽ,
togs-y-yã-a Migdoll nebã,
togs-y-yã-a Nof ne Takpanees nebã
n yeel-b yaa:
‹Segl-y y mens tɩ ned fãa yik n yals a zĩigẽ,
bala, zabr sʋʋg gũbga yãmb n vargdẽ!
15Maana a wãn tɩ f wẽnnaam a Apiisi#46.15 Apiisi yaa wẽn-naandg sẽn yaa wa loalga. zoetẽ?
Fo loalgã ka tõe n yals ye,
bala Sẽn-Ka-Saab lubd-a lame.
16Sẽn-Ka-Saab kɩtame tɩ tãb-bi-kʋʋng
lakd n lʋɩtẽ.›
Bãmb kanda taab n lʋɩt n yetẽ:
Yik-y tɩ d kuil d nebã nengẽ,
d leb d ba-yirã,
n zãag d mens ne sãamdã sʋʋga.
17Sẽn kẽed ne Ezɩpt rĩm
a Faarõ wɛɛngẽ,
bool-y-yã-a tɩ ‹Bʋrg soab
sẽn ka leb n tõe n maan baa fɩ.› »
18Maam a rĩm ning yʋʋr sẽn boond
tɩ Saasẽ-Pãng-Soabã yetame:
«Bɛ wã waoong ka na n vaal ye.
Na n yɩɩ wa Taboor tãngã
sẽn be tãms a taabã sʋkã,
la wa Karmell tãngã sẽn
zẽk n tʋʋg ko-kãsengã!
19Ezɩpt sẽn yaa tẽn-neerã nebã,
segl-y y teed tɩ y na n looga yembdo!
Bala, Nof na n sãamame,
bugum na n dɩ-a lame,
la ned kõn leb n zĩnd a pʋgẽ ye.»
20Ezɩpt yaa wa nag-sadg
sẽn yaa neere.
Keoodr yita wĩntoog sẽn lʋɩtẽ
dɩtg tẽngã n watẽ.
21A tãb-biisã yaa wa lull
sẽn be yãgrẽ.
Bãmb me lebg n zoetame,
B naaga taab n zoetẽ,
sẽn tõe n yals-a ka be ye.
Bala, b sãoongã daar taame,
b sɩbgrã daar taame.
22B zoetame n fɩɩnd wa waafo,
bala, bɛɛbã wat n na n zaba ne bãmba,
la b zãada lay wa tɩ-kɛɛdba.
23Baa ne b weoogã sẽn wẽnd wa
ka tõe n kẽ a pʋgẽ wã,
b bɛɛbã kɛɛda a tɩɩsã,
bala b sõorã yɩɩda kalwaare,
la ned ka tõe n bãng b sõorã ye.
24Yãnd tara Ezɩpt tẽn-neerã nebã.
B basa bãmb wĩntoog sẽn lʋɩtẽ
dɩtg tẽngã neb nugẽ.
25Saasẽ-Pãng-Soabã sẽn yaa Israyɛll Wẽnnaamã yetame: Ade, mam na n sɩbga Amon sẽn be No wã nebã, ne Faarõ, la Ezɩpt nebã ne b wẽnnaam-dãmbã la b rĩm-dãmbã. Mam na n na n sɩbga Faarõ ne neb nins fãa sẽn teeg yẽnda wã. 26Mam na n bas-b-la neb nins sẽn baood bãmb n dat n kʋ wã nugẽ: yaa Babilond dĩm a Nebukatnedzaare, ne neb nins sẽn be yẽnda zakẽ wã. Dẽ poore, nebã na n leb n zĩnda Ezɩpt wa kʋdem-wẽndẽ wã. Maam a Sẽn-Ka-Saab n yeele.
Israyɛll yolsgo
27 #
Zer 30.10,11 La sã n yaa ne foom a Zakoob
sẽn yaa mam tʋmtʋmdã,
da zoe rabeem ye!
Israyɛll nebã, da boog-y y raood ye!
Bala, mam na n fãaga yãmb tẽn-zãrg
ning y sẽn beẽ wã,
la m fãag y yagensã tẽng ning b
sẽn be yembd pʋgẽ wã.
A Zakoob yagensã na n lebg n waame,
la b na n leb n zĩnda yam-gãneg
ne vɩ-bãan pʋga,
la ned kõn tol n kẽes bãmb dabeem ye.
28Foom a Zakoob sẽn yaa mam tʋmtʋmdã,
da zoe rabeem ye!
Bala, mam bee ne foom.
Mam na n menesa buud nins fãa mam
sẽn dag n dig yãmb tɩ y tɩ zĩnd b sʋkã,
la sã n yaa ne foom,
mam ka na n sãam-f ye.
La baoosgo, mam n na n demsa
foom wa sẽn zemse.
Mam ka na n bas foom taal ye.
Maam a Sẽn-Ka-Saab n yeele
Currently Selected:
A Zeremi 46: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
