A Zeremi 31
31
Israyɛll nebã lebg n wa b tẽngẽ
1Sẽn-Ka-Saab yetame: «Wakat-kãnga, mam na n yɩɩ Israyɛll buud toay-toayã fãa rĩmã, la bãmb na n yɩɩ mam nebã. 2Ade, maam a Sẽn-Ka-Saab yetame:
‹Mam wilga m nonglem ne neb nins
sẽn põs zabr sʋʋg n be we-raoogẽ wã.
Israyɛll nebã kẽnd n dabda vʋʋsg zĩigẽ.›
3Sẽn-Ka-Saab zĩnda yɩɩg n puk
b meng ne maam n yeele:
‹Mam nonga foom ne nonglem
sẽn ka sɛta.
Rẽ kɩtame tɩ mam na n nong
foom n ka basdẽ ye.
4Israyɛll tẽn-neere,
mam na n lebs n mee foom,
b na n lebs n me-f lame yɛsa.
Fo na n leb n dɩka f gãngãado,
n yi n saoodẽ la f laadẽ.
5Fo na n leb n sela reezẽ tɩɩs
Samaari tãmsã zutu.
Neb nins sẽn na n sel tɩɩsã
na n dɩ b yõodo.›
6Bala, wakat n wate,
tɩ gũudbã na n kelem Efrayiim soolem
ning sẽn be tãms sʋkã n yeele:
‹Wa-y tɩ d kẽng Sɩyõ,
Sẽn-Ka-Saab sẽn yaa tõnd
Wẽnnaamã nengẽ!› »
7Bala, ad Sẽn-Ka-Saab sẽn yeta:
Kaas-y ne sũ-noog a Zakoob yagensã yĩnga.
Kɩdm-y n yɩɩg-y buud toay-toayã fãa!
Zẽk-y y koees n pẽg Sẽn-Ka-Saab n yeele:
Sẽn-Ka-Saabo, fãag-y y nebã!
Fãag-y Israyɛll bu-kellã!
8Mam tara bãmb n yit wĩntoog
sẽn lʋɩtẽ dɩtg tẽngã n watẽ.
Mam yiisa bãmb dũniyã kɩremsã
fãa n wat n na n tigme.
Bãmb sʋkã, zoense, koms-rãmba,
pagb sẽn tʋte, ne pagb sẽn kũmd
dogem na n zĩnda be.
Yaa bu-kãseng n lebg n wat zĩ-kãngã.
9Bãmb watame la b yãbda,
la m tɛta bãmb b se-yõkrã pʋga
Mam tɛta bãmb so-tɩrg b sẽn ka tõe
n lak n lʋɩ zugu,
n dabd ko-zoetem zĩisẽ.
Bala, mam lebga ba Israyɛll nebã yĩnga,
la a Efrayiim yaa mam bi-rẽenga.
Sũ-sãang na n lebga kɩdengo
10Buud toay-toayã fãa,
kelg-y Sẽn-Ka-Saab goamã,
la y moon-a tẽn-zãrsã sẽn be
koom sʋkã nebã n yeele:
«Soab ning sẽn sãeeg-a Israyɛll nebã
na n lebg n tigim-b lame,
la b na n gũu Israyɛll nebã wa pe-kɩɩm
sẽn gũud a piisi.
11Bala, Sẽn-Ka-Saab n fãagd
a Zakoob yagensã,
n deegd bãmb neb sẽn tar pãng
n yɩɩd bãmbã nugẽ.
12Bãmb na n waame,
n kaas ne sũ-noog Sɩyõ tãngã zugu.
Bãmb na n kaoog n wa reega
bõn-sõamy nins Sẽn-Ka-Saab
sẽn segl b yĩngã:
‹Yaa koodo, reezẽ rã-paalga, ka-paalga,
la rũm-bãooneg ne rũm-bɛda.
Bãmb vɩɩmã na n yɩɩ wa zẽed
zĩig sẽn paam koom tɩ seke.
Bãmb pãng kõn tol n leb n sɛ ye.›
13Dẽ, pʋg-sadb na n saoome
n maan sũ-noogo.
Kom-bɩɩs ne nin-kẽemb na n naaga
taab n maan sũ-noogo.
Mam na n kɩtame tɩ b sũ-sãangã
lebg kɩdengo,
la m na n bels-b lame.
Bãmb toogã poore, mam na n
kõ-b-la sũ-noogo.
14Mam na n kɩtame tɩ maan-kʋʋdbã
paam nem-kaam n wãb n tɩge,
la m na n tɩgsa m nebã ne m bõn-neebã.
Yaa maam a Sẽn-Ka-Saab n yeele.»
Tẽeb ket n bee yãmb yĩnga
15 #
Sɩng 35.16-19,
Mat 2.18
Sẽn-Ka-Saab yetame:
«B wʋmda kelems sẽn yit Rama,
yaa sũ-toog kelemse.
Yaa a Rasɛll n yãbd a kambã yĩnga.
A kambã kaalem yĩnga,
a ka sakd belsg ye.»
16Sẽn-Ka-Saab yetame:
«Sĩnd la f ra leb n yãb ye.
Yẽes f nintãm.
Bala, f na n paama keoor f tʋʋmã yĩnga.
Maam a Sẽn-Ka-Saab yetame:
Fo kambã na n yii b bɛɛbã
tẽngẽ n lebg n wa.»
17Sẽn-Ka-Saab yetame:
«Tẽeb ket n bee fo beoog vɩɩmã yĩnga.
Fo kambã na n lebg n wa b soolmẽ wã.
18Mam wʋmda Efrayiim buudã
sẽn yẽgemd n yetẽ:
Yãmb demsa tõndo, la d saka remsgã
wa nag-bil sẽn ka yã wõrbo.
Tall-y tõnd n lebg n wa,
la d na n sak n waame.
Bala, yãmb yaa Sẽn-Ka-Saab
sẽn yaa tõnd Wẽnnaam.
19Tõnd sẽn wẽnemd n bas yãmbã,
d maanda d bãngẽ.
Yãmb sẽn kɩt tɩ tõnd bãng d kongrã,
tõnd sũur sãamame tɩ d pĩis d gɛya.
Yãnd tara tõnd tɩ d zut surẽ,
bala, tõnd bi-bɩɩlem wakatẽ paoogrã
ket n be d zugu.
20A Efrayiim yaa mam bi-nongre,
Mam nonga yẽnda ne m sũur fãa.
Mam sã n gomd a yelle,
m ket n tagsda a yelle.
Yaa rẽ n kɩt tɩ rogem yĩn-sidg
tar maam a yĩnga.
Yaa sɩda, a nimbãaneg tara maam.
Maam a Sẽn-Ka-Saab n yeele.»
Israyɛll nebã, lebg-y n wa-y-yã!
21Israyɛll nebã, ning-y y bãnã,
lug-y y sor wilgdsã!
Ges-y y sorã,
Tags-y sor ning yãmb sẽn tũudã yelle.
Israyɛll tẽn-neere,
lebg n wa tẽn-kãensã sẽn yaa
fo rẽndã pʋse!
22Bi-tõtre, fo na n yeeba a woto
tɩ ta dabʋre?
Bala, bõn-paalg la Sẽn-Ka-Saab
maan dũniyã zugu.
Pag n baood rao a toore!
Zʋʋda nebã lebg n wa b tẽngẽ
23Saasẽ-Pãng-Soabã sẽn yaa Israyɛll Wẽnnaamã yetame: mam sã n wa lebs n maneg Israyɛll nebã yelle, ad b sẽn na n leb n gom goam nins Zʋʋda tẽmsã pʋsẽ: Sɩyõ tãn-sõng sẽn yaa tɩrlem zĩiga, bɩ Sẽn-Ka-Saab ning fo zug barka! 24Koaadbã ne rũm-gũudbã na n zĩnda Zʋʋda ne a tẽmsã fãa pʋsẽ. 25Bala, mam kõta sẽn yɛ-bã koom tɩ b yũ, la m tɩgsda neb nins pãng sẽn sɛ wã.
26Dẽ zugẽ, mam nekame, la m gõeemã yɩ-m-la noogo.
Wẽnnaam na n meeme la b sele
27Maam a Sẽn-Ka-Saab yetame: «Wakat n wate, tɩ mam na n pids Israyɛll ne Zʋʋda tẽmsã ne neb la rũmsi. 28Mam sẽn dag n gũus bãmb n võ-b la m pãb-b n wã, la m sãam-b la m menes-bã, n kɩt tɩ toog paam-bã, woto me, mam na n gũus-b lame, n lebs n me-b la m sel-ba. Maam a Sẽn-Ka-Saab n yeele.» 29#Eze 18.2Wakat-kãnga, b ka na n leb n yeele:
«Ba-rãmb dɩɩ reezẽ-kãse,
tɩ kamb yẽn deeg n zãab» ye.
30Ned kam fãa na n ki a meng kongr yĩnga. Ned ning sẽn dɩ-a reezẽ-kãse, a meng yẽn n na n zãabe.
31 #
Mat 26.28, Mark 14.24, Luk 22.20, 1Kor 11.25, 2Kor 3.6 #
Ebr 8.8-12
Sẽn-Ka-Saab yetame: «Ade, wakat n wate, tɩ mam na n maan kaool-paalg ne Israyɛll buudã, la ne Zʋʋda buudã. 32La ka na n yɩ wa kaool ning mam sẽn dag n maan ne b ba-rãmbã, daar ning mam sẽn gãd bãmb nus n tall-b n yiis Ezɩpt tẽngã ye. Bãmb sãama kaool-kãngã, baa ne mam sẽn yaa bãmb Zu-soabã. Maam Sẽn-Ka-Saab n yeele. 33#Ebr 10.16La ad kaool ning mam sẽn na n maan ne Israyɛll nebã sẽn na n yɩ to-to da-kãens loogr poore: Ka na n leb n yɩ kug-wals zut la mam na n gʋls m tõodã ye. Mam na n ning-b-la bãmb pʋ-tẽerẽ, mam na n gʋls-b-la b sũyã pʋse. Mam na n yɩɩ bãmb Wẽnnaam, la bãmb na n yɩɩ mam nebã. Maam a Sẽn-Ka-Saab n yeele. 34#Ebr 10.17Tẽngã pʋgẽ, ned ba a yembr ka na n leb n zãms a to ye. Ned ka na n zãms a ba-biiga, n yeel-a t'a sak Sẽn-Ka-Saab noorã ye. Bala, b fãa na n saka maam, sẽn sɩng ne sẽn yaa-a bilf n yɩɩd bãmb sʋkã, tɩ ta sẽn yaa-a kãseng n yɩɩdã. Mam na n kõo bãmb sugr b kongrã yĩnga, mam ka na n leb n tẽeg b yel-wẽnã yell ye.» Sẽn-Ka-Saab n yeele.
35Ade, Sẽn-Ka-Saab sokdame:
«Ãnda n kɩt tɩ wĩndgã beẽ,
n kõt vẽenem wĩntoogo?
Ãnda n kɩt tɩ kiuugã ne ãdsã
vẽenem yãgd yʋngo?
Ãnda n kɩt tɩ ko-kãsengã rãmbdẽ,
t'a ko-wĩisã tãoosdẽ?
Yaa soab ning yʋʋr sẽn boond
tɩ Saasẽ-Pãng-Soabã.»
36Sẽn-Ka-Saab yetame:
«Mam sã n wa sak tɩ tõ-kãensã
mam sẽn vigl tɩ be wakat fãa wã
ka leb n beẽ,
Israyɛll nebã me kõn leb n
yɩ mam buud wakat fãa ye.»
37Maam a Sẽn-Ka-Saab yetame:
«B sã n tõog n mak yĩngrã
n bãng a zãntlem,
la b tõog n mak tẽn-gãongã
n bãng a zulum,
mam me na bas Israyɛll yagensã fãa,
bũmb nins fãa b sẽn maanã yĩnga.»
Maam a Sẽn-Ka-Saab n yeele.
Zeruzalɛm-paalgã
38Sẽn-Ka-Saab yetame: Wakat n wate, tɩ nebã na n lebs n me Zeruzalɛm tẽngã Sẽn-Ka-Saab yĩnga, sẽn sɩng ne Hananeyɛll gãosgã n tãag rignoor ning sẽn be tẽngã lalg gõdrẽ wã. 39B na n sõoga tẽngã toadg n tãag Garɛɛb kũnkubgã, n wẽnemd n tees Gowate. 40Sẽn sɩng ne kũum ne maand tompeglem longã zãnga, ne zĩ-koodsã fãa n tall n tãag Sedrõ ko-soogã, ne tẽngã lalg gõdr sẽn be wiidã rignoorã sẽn be yaang sẽnẽ wã na n welga toor maam a Sẽn-Ka-Saab yĩnga. B kõn tol n leb n võog wall b siig bũmb ba a yembr beenẽ ye.
Currently Selected:
A Zeremi 31: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
