Ebre‑rãmba 7
7
Maan-kʋʋd sẽn wẽnd a Melkisedɛke
1 #
Sɩng 14.17-20
A Melkisedɛk dag n yaa Salɛm dĩma, la saasẽ-saasẽ Wẽnnaamã maan-kʋʋda. A kẽngame n tɩ seg a Abrahaam sẽn tɩ tõog rĩm-dãmb n lebg n watẽ wã, n ning-a barka. 2Yaa yẽnda la a Abrahaam kõ bũmb fãa piig pʋɩɩre. La d sã n na n bilg a yʋʋrã võore, pipi a yaa tɩrlem dĩma, tɩ Salɛm rĩungã pʋgle, sẽn dat n togs tɩ laafɩ rĩmã. 3A ka tar ba, a ka tar ma, n ka tar yaab roog ye. A ka tall sɩngre, la a vɩɩmã ka tall tɛk ye. B kɩtame t'a yɩ wa Wẽnnaam Bi-riblã, la a yaa maan-kʋʋd wakat sẽn ka sɛt yĩnga.
4Ges-y soab ning tõnd yaab a Abrahaam mengã sẽn yãk zabrã te-zɛɛdem piig pʋɩɩr n kõ wã, n bãng a sẽn ya kãseng to-to! 5#Sõd 18.21A Leevi yagens nins b sẽn kõ maan-kʋʋr tʋʋmdã, tõogã kõ-b-la noor tɩ b reeg piig pʋɩɩr Israyɛll nebã sẽn yaa bãmb ba-biisi, la a Abrahaam yagensã nengẽ. 6A Melkisedɛk sẽn ka be a Leevi yaab roogã pʋgẽ wã deega a Abrahaam piig pʋɩɩre, a ninga soab ning sẽn paam kãabgã barka. 7Nokoeemd kae tɩ yaa sẽn yɩɩd-a wã n ningd sẽn ka ta-a yẽnda wã zug barka. 8La ka wã, yaa nin-kiids n deegd piig pʋɩɩrã, la be wã, yaa ned gʋls sõamyã sẽn kɩt kaset t'a vɩɩme. 9Moasã, a Leevi sẽn deegd piig pʋɩɩrã, a ra zoe n yaoo a piig pʋɩɩre, a Abrahaam yaoodã pʋgẽ. 10Bala, wakat ning a Melkisedɛk sẽn tɩg n seg a Abrahaamã, rẽ t'a Leevi da ket n bee a Abrahaam zɩɩmẽ.
11Sã n yaa tɩ Leevi rãmbã maan-kʋʋrã tʋʋmd wata ne zemsgo, tõog ning Wẽnnaam sẽn kõ b nebã yẽbga maan-kʋʋrã tʋʋmd zugu. Bõe yĩng tɩ b leb n dat tɩ maan-kʋʋd sẽn yaa wa a Melkisedɛk la ka wa a Aarõ wa? 12Bala, maan-kʋʋrã tʋʋmd sã n toeeme, yaa tɩlɛ tɩ tõogã me toeeme. 13Sɩd me, ned ning yell b sẽn gom woto wã yaa buud a to neda, la ned baa a yembr buud‑kãng sʋk ka be tẽn-kugrã tʋʋmdẽ ye. 14Bala, yaa vẽeneg tɩ tõnd Zu-soabã yaa Zʋʋda neda, la a Moyiis ka gom buud‑kãng yell n kẽes maan-kʋʋrã wɛɛngẽ ye. 15A yellã leb n yaa vẽeneg n yɩɩd wakat ning ned sẽn wa n yaa wa a Melkisedɛkã 16n yaa maan-kʋʋd a to wã. Ka ne ninsaalb tõog yãkr la a lebg maan-kʋʋdã ye, la yaa ne vɩɩm sẽn ka sãamd pãnga. 17#Yɩɩn 110.4Bala, b kɩsa a kaset n yeele:
Fo yaa maan-kʋʋd wakat sẽn kõn sa yĩnga,
wa a Melkisedɛke.
18Sɩd me, b kiisa tõog sẽn dag n be, a pãn-komsem la a ka-yõodã yĩnga, 19(bala tõogã ka tõog tɩ baa fɩ zems ye), la b waa ne saag-sõng sẽn yaa sõama n yɩɩd pĩnd soabã. Saag-sõng‑kãng maasem yĩnga tõnd kolgda Wẽnnaam.
20La Wẽnnaam ka maan t'a Zeezi yɩ maan-kʋʋd tɩ wẽeneg ka wẽen ye. 21#Yɩɩn 110.4Sɩda, ka yɩ ne wẽeneg la neb a taabã lebg maan-kʋʋdb ye. La a Zeezi lebga maan-kʋʋd ne wẽenego, la yaa soab ning sẽn yeel tɩ: Zu-soabã wẽename, la b ka na n lebs b noor poorẽ ye. B yeelame yaa:
Fo yaa maan-kʋʋd wakat sẽn kõn sa yĩnga.
22Woto kɩtame t'a Zeezi lebg kaool sẽn yaa sõama n yɩɩdã zãada.
23Sẽn paase, maan-kʋʋdb kãens sõor yɩɩ wʋsgo, tɩ bõe kũum da gɩdgda bãmb tɩ b ka tõe n kẽng taoor ne b tʋʋmã ye. 24La a Zeezi sẽn paad wakat sẽn kõn sa wã yĩnga, bãmb maan-kʋʋrã yaa bũmb b sẽn ka tõe n deeg n kõ ned a to ye. 25Dẽ me n kɩt tɩ bãmb tõe n fãag neb nins sẽn tũnugd bãmb n kolgd Wẽnnaamã hal sõama, bala bãmb vɩɩ wakat fãa n yõkd sɛɛg b yĩnga.
26Yaa maan-kʋʋd kãsem a woto la tõnd sɩd tog n paame: Ned sẽn welg toor Wẽnnaam yĩnga, n ka tar yelle, ned sẽn ka rog-b ye, n bak ne yel-wẽn-maandbã, la b zẽk-b lame n kẽng saasẽ. 27#Mk 9.7Ka tɩlɛ tɩ b maand maand daar fãa wa maan-kʋʋd kãsem-dãmbã sẽn dengd n maan maoong b mens yĩnga, n yaool n maan neb a taabã yĩngã ye. Bãmb maana maoong a yembr tãa wakat fãa yĩnga, la yaa b meng la b tall n maan maoongã. 28Sɩd me, tõogã yãkda neb sẽn yaa pãn-komsem dãmb tɩ b yɩ maan-kʋʋd kãsem-dãmba. La wẽeneg ning sẽn be sẽn deng tõogã waoongã yãka Wẽnnaam Bi-riblã tɩ b yɩ maan-kʋʋd kãsma, la bãmb zemsa zãng wakat sẽn ka sɛta.
Currently Selected:
Ebre‑rãmba 7: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
