Galat‑rãmba 3
3
Ned deegda Sɩɩg-sõng ne tẽebo
1Yãmb Galasi neb sẽn ka yam! Ãnda n belg yãmba, b bilga yãmb a Zeezi Kiris b sẽn ka da-pɩk zugã yellã vẽenegã ãnda n belg yãmba? 2Ad bũmb ning bal mam sẽn dat tɩ yãmb leok maam: Yaa yãmb sẽn maan tõogã sẽn yeelã yĩng la yãmb deeg Sɩɩg-sõngã bɩ, bɩ yaa yãmb sẽn kelg koe-noogã ne tẽebã? 3Yãmb ka yamã taa a woto? Yãmb sẽn sɩng ne Sɩɩgã pãngã, yãmb na n baasa ne yĩng rẽnd moasã la? 4Bũmb nins fãa yãmb sẽn yã wã yɩɩ zaalem la? Sã n yaẽ la zaalem! 5Soab ning sẽn kõt yãmb Sɩɩgã la b maand bõn-bãn yãmb sʋkã, yaa yãmb sẽn sakd tõogã yĩng la b maand bɩ, bɩ yaa yãmb sẽn kelgd koe-noogã ne tẽebã yĩnga?
Wẽnnaam kãabg ne a Abrahaam
6 #
Sɩng 15.6, Rom 4.3 La ne a Abrahaam, a tẽe Wẽnnaam,
la Wẽnnaam ges-a-la wa nin-tɩrga,
a tẽebã yĩnga.
7 #
Rom 4.16
Dẽ wã, bɩ y reeg tɩ yaa neb nins sẽn tẽedã n yaa a Abrahaam kamba. 8#Sɩng 12.3Woto, Wẽnnaam gʋls-sõamyã sẽn pĩnd n neẽ tɩ Wẽnnaam na n kɩtame tɩ bu-zẽmsã yɩ tɩrs tẽeb yĩngã, b pĩnd n togsa a Abrahaam koe-no-kãngã n yeele:
Buud fãa na n paama bark fo yĩnga.
9Woto, neb nins sẽn tar tẽebã naaga ne tẽeb soab a Abrahaam n paam barka. 10#Tõ 27.26Sɩd me, neb nins fãa sẽn teegd tõog tʋʋmã bee kãab-wẽng pʋgẽ, bala, b gʋlsame n yeele:
Kãab-wẽng n be ned ning fãa
sẽn ka sakd bũmb nins fãa
sẽn gʋls seb-kãngã pʋgẽ,
la a ka maand wa sẽn gʋlsã zugu.
11 #
Hab 2.4
La yaa vẽeneg tɩ ned baa a yembr kõn paam tɩrlem Wẽnnaam taoor tõog yĩng ye, bala,
nin-tɩrg na n vɩɩ ne tẽebo.
12 #
Mk 18.5
Tõog yaool n ka yit tẽebẽ ye. La tõogã yetame tɩ
ned ning sẽn na n maan-a wa sẽn gʋlsã,
bõn-kãens na kɩt t'a vɩɩmde.
13 #
Tõ 21.23
Kiris yolsa tõnd ne kãab-wẽngã, bãmb sẽn lebg kãab-wẽng tõnd yĩngã yĩnga. Bala, b gʋlsame tɩ
kãab-wẽng n be ned ning sẽn lulg raoog zugã zugu.
14Woto, a Abrahaam barkã na n zĩnda a Zeezi Kiris pʋgẽ bu-zẽmsã yĩnga, la ne tẽebo, bɩ tõnd deeg Sɩɩgã Wẽnnaam sẽn kãabã.
15M ba-biisi, m dɩk ninsaalb mamsgo: Ned sã n gʋls sebr n wilg a sũur gomde, a sẽn dat tɩ yɩ to-to a kũum poore, baa ne sẽn yaa ninsaal n gʋlsã, ned baa a yembr ka kɩɩsd gomdã wall a paas-a bũmb ye. 16Kãabdã sẽn kãabã yaa a Abrahaam ne a yagengã. B ka yeel tɩ yagense, wa b yaa wʋsg ye. Yaa a yembr tãa. B sẽn yeel tɩ ‹fo yagengã› dat n togsame tɩ Kirisi. 17#Yik 12.40Ad mam gomdã võore: Yaa tɩ yam-yãkr ning Wẽnnaam sẽn yãke, n togs tɩ bu-zẽmsã, ka tõog sẽn yaool n wa yʋʋm kobs-naas la pis-tã rẽnda zugẽ wã n na n kiis-a, n kɩt tɩ kãabgã yɩ zaalem ye. 18#Rom 4.14Bala, rogem‑pʋɩɩrã sã n dag n yitẽ tõogã pʋgẽ, a rag n kõn leb n yi kãabgẽ ye. Yaool n yaa kãabg pʋgẽ la Wẽnnaam ning b barkã a Abrahaam zugu.
Tõogã võore
19La yaa bõe yĩng la b wa ne tõogã? Wẽnnaam yaool n waa ne tõogã n na puk nebã beegre, hal tɩ yageng ning Wẽnnaam kãabgã sẽn be a zugã na wa. Malegs n moon kãab-kãnga, la b tũnuga sɛ-yõakda. 20Sã n yaool n yaa nin-yend yelle, a ka baood sɛ-yõakd ye. La Wẽnnaam yaool n yaa b yembre. 21Dẽ wã, tõogã kɩɩsda Wẽnnaam kãabgã la? Ayo! B sã n dag n kõẽ tõog sẽn tõe n kõ vɩɩm, tõogã dag n na n sɩd waa ne tɩrlem. 22Wẽnnaam gʋls-sõamyã yeelame tɩ dũni gill fãa bee yel-wẽn maaneg pʋgẽ. Woto, yaa neb nins sẽn tẽed a Zeezi Kirisã n na n paam kũun ning Wẽnnaam sẽn kãabã, b sẽn tẽ wã yĩnga. 23Sẽn deng tẽebã waoongo, tõnd dag n bee tõogã yembdẽ n gũud tẽebã sẽn na n wa pukã. 24Woto, tõog yɩɩ tõnd gũuda n na n tɛ tõnd n taas Kiris nengẽ, tɩ ne tẽebo, tõnd na lebg tɩrse. 25Tẽebã sẽn wa wã, ka leb n yaa gũud‑kãng n so tõnd yɛs ye. 26Bala, yãmb sẽn tẽed a Zeezi Kirisã yãmb fãa yaa Wẽnnaam kamba. 27Yãmb sẽn deeg lisg Kiris pʋgẽ wã, Kiris luda yãmb wa fuugu. 28Ka leb n be tɩ m yaa Zʋɩf bɩ Gɛrka, yamb bɩ burkĩna, dao bɩ pag ye. Bala, yãmb fãa yaa yembr a Zeezi Kiris pʋgẽ. 29#Rom 4.13La yãmb sã n yaa Kiris nebã, dẽnd yãmb yaa a Abrahaam yagense, n yaa pʋɩt-n-taas ne a rogem-pʋɩɩrã wa b sẽn kãabã.
Currently Selected:
Galat‑rãmba 3: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
