A Ezekɩyɛlle 7
7
Sẽn-Ka-Saab wilgda yɛlã fãa sɛɛbo
1Sẽn-Ka-Saab goma ne maam n yeel yaa:
2«La foom a ninsaala, ad maam a Zu-soab
a Sẽn-Ka-Saab sẽn gomd ne Israyɛll
tẽn-gãongã n yetẽ:
‹Sɛɛbã wakat taame!
La tẽngã kɩrems a naasã sɛɛb wakat watame.
3Moasã, sɛɛbã wakat taa fo yĩnga.
Mam sũurã na n yika ne foom.
Mam na n kaoo fo bʋʋd wa
sẽn zems f manesmã,
mam na n kɩtame tɩ f yel-beedã sɩbgr
wa f zugu.
4Mam ka na n zoe f nimbãaneg ye.
Mam ka na n bas ned ba a yembr t'a põs ye.
Bala, mam na n kɩtame tɩ f yel-beedã fãa
wa f zugu.
Fo yel-beedã na n zĩnda f pʋgẽ.
Woto, yãmb na bãng tɩ mam
yaa Sẽn-Ka-Saabo.› »
5Ad Zu-soab a Sẽn-Ka-Saab sẽn yeta:
«Toogo! Toog sẽn ka tar to n wate!
6Sɛɛbã watame!
Sɛɛbã waame n sɛ!
A yik n wata fo yĩnga!
A na n waame!
7Tẽngã nebã, yãmb me wakatã watame,
daarã watame,
pelen-yɩk daarã watame!
Sũ-noog kaasg ka na n leb
n zĩnd tãmsã zut ye!
8Moasã, mam segl n sɛɛme,
n na n sik m sũ-puugrã fo zugu.
Mam na n basame tɩ m sũ-puugrã
maan a tʋʋmd n tãag a tɛka.
Mam na n kaoo fo bʋʋd wa
sẽn zems f manesmã,
mam na n kɩtame tɩ f yel-beedã sɩbgr
wa f zugu.
9Mam ka na n zoe f nimbãaneg ye,
mam ka na n bas ned ba a yembr t'a põs ye.
Bala, mam na n kɩtame tɩ f yel-beedã
wa f zugu.
Fo yel-beedã na n zĩnda f pʋgẽ.
Woto, yãmb na bãng tɩ mam
yaa Sẽn-Ka-Saab sẽn sɩbgda.
10Ade, daarã waame, a watame!
Wakatã watame! Dasaarã ningda puudu!
Tɩtaamã lebgda wʋsgo!
11Pãn-maanegã yikame n yals n na n
yɩ wẽngã dasaare:
Bãmb bũmb ba a yembr ka na n pa ye!
Bãmb paoongã na n sɛɛme!
Bãmb nebã na n sɛɛme!
Bãmb ziirã na n sɛɛme.
12Wakat watame, daarã kolgdame!
Bɩ sẽn daad-a ra maan sũ-noog ye.
Bɩ sẽn koosd-a ra maan sũ-sãang ye!
Bala, mam sũ-puug-kãsengã yika ne tẽngã
arzegs fãa.
13Sɩdã, ned sã n dag n koos a bũmbu,
ba a sã n ket n vɩ, a ka na n leb n paam
a bũmbã ye.
Bala, vẽnegr ning sẽn gomd tẽngã
paoongã fãa yellã pidsg ka na n vaal ye.
Ned kõn tõog n kogl a vɩɩm a kongr yĩng ye.
14B peebda baorgo, b segl n sɛɛme,
la ned ba a yembr ka kẽnd zabr ye.
Bala, mam sũ-puug-kãsengã yika ne tẽngã
arzegs fãa.
15Yɩnga, zabr sʋʋga!
Pʋgẽ, bã-longds la kom!
Sẽn be-a weoogẽ na n kii ne zabr sʋʋga.
La sẽn be-a tẽngã pʋga,
kom la bã-loangdg n na n kʋ-a.
16Bãmb neb nins sẽn põsã zoet n dʋʋda
tãmsã zut wa walã sẽn be londã pʋsã.
Bãmb ned kam fãa wõosda a meng
kongr yĩnga.
17Bãmb fãa nus pãng sɛɛme,
b rũmã fãa komsame.
18Bãmb sẽgenda boto,
la b rigda ne rabeem.
Yãnd tara bãmb fãa,
bãmb zutã fãa põngame.
19Bãmb na n loba b wanzuri wã soayã zutu,
la bãmb sãnemã na n yɩɩ bõn-dẽgdo,
la b wanzuri wã ne b sãnemã,
ka na n tõog n fãag-b Sẽn-Ka-Saab
sũ-puugrã daar ye.
Bãmb wanzuri wã ne b sãnemã ka tõe
n dɩk n ning b noorẽ,
la b ka tõe n pids bãmb pʋs me ye.
Bala, yaa bõn-kãens n yɩ bãmb kug-lakdga,
la yaa bõn-kãens n wa ne b kongrã.
20Bãmb wuka b mens ne b fan-teedã,
bãmb ninga b yel-beedã ne b yel-yoodã
naand b fan-teedã zutu.
Yaa rẽ tɩ m na n kɩt tɩ b lebg bõn-dẽgd
b yĩnga.
21Mam na n kɩtame tɩ sãamb wa fã-ba,
la m bas tɩ b lebg tẽngã nin-wẽns laogo,
tɩ b tõe n dẽgem-ba.
22Mam na n tud-b-la m kudga,
la b na n dẽgma m laogã bĩngr zĩiga.
Fãadb n na n kẽ beenẽ n dẽgm-a.
23Segl sogle!
Bala, tẽngã pida ne zɩɩm daagre,
a pida ne pãn-maanego.
24Mam na n kɩtame tɩ buud
nins sẽn yaa wẽns n yɩɩd buud
a taabã wa reeg b yiyã n sooge.
Mam na n kɩtame tɩ pãens-rãmbã
wuk-m-meng sɛ,
la b na n dẽgma bãmb zĩ-sõama wã.
25Yellã daar watame,
nebã na n baoo vɩ-bãane,
la vɩ-bãane ka na n zĩnd ye!
26Na n yɩɩ toog woo, toogo,
na n yɩɩ koe-beed woo, koe-beedo.
Bãmb kota no-rɛɛsdbã tɩ b kõ bãmb vẽnegre,
maan-kʋʋdbã ka leb n mi tõogã n na n
zãms nebã ye,
la kãsem-dãmbã ka leb n tar saglg n na n
sagl nebã ye.
27Rĩmã zĩi ne sũ-sãanga,
nanambsã sũy pida ne sũ-sãanga,
la tẽngã nebã nus rigdame.
Mam na n sɩbga bãmb wa sẽn zems b tʋʋmã,
mam na n kaoo bãmb bʋʋdo,
wa bãmb sẽn kaood bʋʋdã to-to wã.
Woto, bãmb na bãng tɩ mam yaa Sẽn-Ka-Saabo.»
Currently Selected:
A Ezekɩyɛlle 7: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
