A Ezekɩyɛlle 32
32
Wiisg a Faarõ ne Ezɩpt yĩnga
1Yʋʋmd piig la a yiib soabã pʋga, kiuug piig la a yiibẽ soabã pipi daarã, Sẽn-Ka-Saab goma ne maam n yeele:
2«Ninsaala, pʋd sũ-sãang yɩɩll Faarõ sẽn yaa Ezɩpt rĩmã yĩng n yeel yaa: ‹Fo bee bu-zẽmsã sʋk wa gɩgem-polle,
la fo yaa wa wag-bɛɛg sẽn be ko-kãsemsã pʋse,
fo rag n be f kʋɩlsã pʋs n lisd n pukdẽ,
fo naoã rag n bendgda koomã,
fo rag n dãmbda b ko-wĩisã.›
3Ade, maam a Zu-soab a Sẽn-Ka-Saab yetame:
‹M na n kɩtame tɩ neb wʋsg wa tigme,
tɩ m yɛdg m gãmbrã fo zugu.
Bãmb na n vuuga foom ne m gãmbrã n yiisi.
4M na n basa foom tẽn-koɛɛngã zugu,
m na n tɩ lob-f-la weoogẽ wã.
Mam na n kɩtame tɩ yĩngr bõn-yɩgdɩ wã fãa
wa zĩnd fo zugu.
La m na n kɩtame tɩ dũniyã rũmsã fãa
wa wãb foom n tɩge.
5Mam na n sãeega f nemdã tãmsã zutu,
la m pids tãn-londã ne f nem-zersã.
6Mam na n zãgsa tẽng ning fo
sẽn be a pʋgẽ n dugdã ne fo zɩɩmã,
hal n tãag tãmsã zutu, n pid f kʋɩl-wagdã.
7 #
Eza 13.10, Mat 24.29, Mark 13.24,25, Luk 21.25, Vẽn 6.12,13, 8.12 Fo sã n wa ki, m na n luda sa-gãongã,
la m kɩt tɩ ãdsã sobge.
Mam na n luda wĩndgã ne sawad-taoko,
la kiuugã ka na n leb n kõ a vẽenem yɛs ye.
8Fo yĩnga, mam na n kɩtame tɩ vẽenem
buudã fãa sẽn be yĩngrã lebg lika,
la m kɩt tɩ f tẽngã gill lebg lik bida.
Maam a Zu-soab a Sẽn-Ka-Saab n yeele.›
9Mam sã n wa kɩt tɩ buud toay-toay sẽn be tẽms fo sẽn dag n ka mi pʋs wʋm fo sãoongã kibare, mam na n kɩtame tɩ neb buud wʋsg sũy sãame. 10Mam na n sãama buud wʋsg neb fo yĩnga, la bãmb dĩm-dãmbã na n diga ne rabeem fo yĩnga. Mam sã n wa wõog m sʋʋgã bãmb taoore, bãmb ned kam fãa na n diga ne rabeem a mengã vɩɩm yĩng fo sãoongã daare.»
11Ade, Zu-soab a Sẽn-Ka-Saab yetame: «Babilond dĩmã sʋʋg na n taa foom.
12Mam na n kɩtame tɩ gãndaad sẽn yaa
nin-toos n yɩɩd buud a taabã fãa wã kʋ f
neb kʋʋngã ne zabr sʋʋga.
Bãmb na n kɩtame tɩ Ezɩpt tɩtaamã sɛ,
la b sãam a neb kʋʋngã fãa.
13M na n sãama a rũms nins fãa
sẽn wat ko-kãsemsã noyã.
Ninsaal naoor kõn leb n bendg koomã,
la rũng nao-beong me kõn leb n bendg-a ye.
14Dẽ, mam na n kɩtame tɩ Ezɩpt koomã tisgi,
la m kɩt tɩ b kʋɩlsã koom zoe wa kaam.
Maam a Zu-soab a Sẽn-Ka-Saab n yeele.
15Mam sã n wa kɩt tɩ Ezɩpt lebg zĩ-vɩʋʋgo,
la m kɩt tɩ b vaag bũmb nins fãa sẽn be
tẽngã pʋgẽ wã n looge,
mam sã n wa kʋ tẽngã neb fãa zãnga,
bãmb na bãng tɩ mam yaa Zu-soab
a Sẽn-Ka-Saabo.»
16Woto yaa sũ-sãang yɩɩlle, la b na n yɩɩl-a lame. Buud a taabã fãa kom-pugli na n yɩɩl-a lame. Bãmb na n yɩɩl-a-la Ezɩpt ne a neb kʋʋngã fãa yĩnga. Maam a Zu-soab a Sẽn-Ka-Saab n yeele.
Sũ-sãang yɩɩll buud a taabã yĩnga
17Yʋʋmd piig la a yiib soabã pʋgẽ, kiuugã rasem piig la a nu daarã, Sẽn-Ka-Saab goma ne maam n yeele:
18«Ninsaala, wõos Ezɩpt neb kʋʋngã yĩnga,
la f kɩt tɩ bãmb ne buud a taabã sẽn tar pãensã
tẽms sig dũniyã zĩ-zulumsẽ wã,
n naag b rãmb nins sẽn sigd bokẽ wã.
19Fo yɩɩda ãnda ne ra-sãnde?
Sig tɩ b gãneg-f n naag sẽn ka kẽ-b bãongã!
20Ezɩpt neb kʋʋngã na n ki n naaga neb
nins sẽn pa tãpẽ wã.
Zabr sʋʋg waame.
Sãam-y Ezɩpt ne a neb kʋʋngã!
21Gãndaad meng-mengã,
ne Ezɩpt sõangdbã na n zĩnda kɩɩm-kulg
n gom ne-a n yeele:
Ad sẽn ka kẽ-b bãongã sẽn ki zabrẽ wã
watame n na n gãand ne tõndo.
22Ade, Asiiri ne a zãma wã fãa la woto.
Ad yẽnda zãma wã sẽn pa tãpẽ wã
yaad sẽn gũbg-a.
23B ninga bãmb yaadã bokã zĩ-zulumsẽ,
n gũbg a yaoogã.
Bãmb sẽn dag n kẽesd dũniyã nin-vɩɩs
rabeemã paa tãpẽ.
24Ad Elam ne a zãma wã fãa yaad
sẽn gũbg a yaoogã, bãmb fãa paa tãpẽ.
Bãmb fãa sẽn dag n kẽesd dũniyã
nin-vɩɩs rabeemã siga dũniyã zĩ-zulumsẽ
n ka kẽ bãong ye.
Bãmb naaga neb nins sẽn sigd bok pʋgẽ
wã n dɩ yãnde.
25N-yẽe! B tʋɩɩ Elam dĩmã gãag a zãma wã
fãa sẽn ki wã sʋka, tɩ b yaadã gũbg-a.
Nin-bãmbã fãa sẽn ka kẽ bãongã paa tãpẽ,
bala, bãmb dag n kẽesda dũniyã nin-vɩɩs
rabeem,
la bãmb naaga neb nins sẽn sigd bok pʋgẽ
wã n dɩ yãnde.
B ninga bãmb sẽn ki-bã sʋka.
26Mesɛk ne Tuball me bee be,
la b zãma wã fãa yaad gũbga bãmba.
Nin-bãmbã fãa sẽn ka kẽ bãongã paa tãpẽ,
bala, bãmb dag n kẽesda dũniyã nin-vɩɩs
rabeem.
27B ka gãneg bãmb n naag gãndaadã,
b ka naag bãmb neb nins sẽn ka kẽ bãongã
sẽn ki wã sʋk ye.
Bãmb siga kɩɩm-kulg ne b zab-teedã,
tɩ b kʋgl bãmb zutã ne b zabr sʋʋsã.
Bãmb yel-wẽnã yaool n taba b kõabã,
bala, bãmb dag n kẽesda dũniyã nin-vɩɩs
rabeem.
28La sã n yaa ne foom a Faarõ,
fo me na n kiime tɩ b mum
foom n naag sẽn ka kẽ-b
bãongã sẽn ki zabrẽ wã.»
29«Ad Edom ne a rĩm-dãmbã la a nanambsã. Baa ne bãmb sẽn dag n yaa gãndaadã, b rɩka bãmb n ning sẽn pa-b tãpẽ wã sʋka. B gãnega bãmb sẽn ka kẽ-b bãongã sʋka, n naag sẽn sigd-b bok pʋgẽ wã. 30Ad tẽms nins fãa sẽn be nug-rɩtgã nanambsã, ne Sɩdõ nebã fãa sẽn naag sẽn ki-bã n sigã. Baa ne bãmb sẽn yɩ gãndaad n dag n kẽesd nebã rabeemã, bãmb dɩɩ yãnde. Nin-bãmbã sẽn ka kẽ bãongã gãeeme n naag sẽn pa-b tãpẽ wã, la bãmb ne sẽn sigd-b bokẽ wã rɩɩ yãnde.
31Faarõ na n yãnda bãmba, la a na n paama belsgo, yẽnda zãma wã fãa ne a nebã la a tãb-biisã fãa sẽn pa tãpẽ wã wɛɛngẽ. Maam a Zu-soab a Sẽn-Ka-Saab n yeele.
32Bala, mam na n kẽesa dũniyã nin-vɩɩs rabeem. B na n gãnega Faarõ ne a zãma wã fãa neb nins sẽn ka kẽ-b bãongã sʋka, n naag b rãmb nins sẽn pa tãpẽ wã. Maam a Zu-soab a Sẽn-Ka-Saab n yeele.»
Currently Selected:
A Ezekɩyɛlle 32: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
