A Ezekɩyɛlle 31

Sɛɛdr tɩɩg yel-bũndi

1Yʋʋmd piig la a yembr soabã pʋgẽ, kiuug a tãab soabã pipi daarã, Sẽn-Ka-Saab goma ne maam n yeele:

2«Ninsaala, yeel Ezɩpt rĩm a Faarõ ne a neb kʋʋngã yaa:

‹Fo wẽnda ãnda f kãosengã pʋgẽ?

3Ade, Asiiri rag n wẽnda wa Libã sɛɛdr tɩɩga,

yẽnda rag n tara wil sẽn yaa neeba,

n tar maasem wʋsgo.

A rag n tãoome n yaa woko,

t'a zugã rag n sãd n tat sawatã.

4Koomã rag n kɩtame t'a bɩ.

Ko-bundmã rag n kɩtame t'a tão n lebg woko.

Ko-zoetmã rag n tigimda a sɛɛgẽ wã,

n lebgd n zoet n kẽed tɩɩs a taabã fãa sẽn be

weoogã pʋgã.

5Yẽnda yẽgã sẽn dag n sag ko-kãsemsã

pʋgẽ wã yĩnga,

a tãoome n zʋʋg tɩɩs a taabã fãa sẽn be

weoogã pʋgã.

Yẽnda wilã rag n yaa wʋsgo,

n tão n yaa wogdo.

6Yĩngr bõn-yɩgdɩ wã fãa rag n tʋɩta

b tʋgd a wilẽ wã.

We-rũmsã fãa rag n wat n dogda b kambã

yẽnda tẽngre,

la buud toay-toayã fãa neb rag n vɩ

a maasmã tẽngre.

7Yẽnda sẽn dag n yaa bedre,

t'a wilã tão n yaa wogdã kɩtame

tɩ yẽnda tar da-sãnde.

Bala, a yẽgã rag n saga ko-kãsemsã pʋgẽ.

8 # Sɩng 2.9 Wẽnnaam zẽedã zĩigẽ sɛɛdr tɩɩsã ba

a yembr ka yɩɩd-a ye.

Sɩprɛs tɩɩsã woglem dag n ka yɩɩd a wilã ye.

La palatan ba a yembr vãad zɩ n yɩ bĩmm

wa yẽnda ye.

La Wẽnnaam zẽedã pʋgẽ,

tɩɩg ba a yembr dag n ka be n wẽnd-a ye.

9Mam dag n kɩtame t'a tar wil wʋsg

n yaa neere,

Edɛn zẽedã zĩigẽ,

Wẽnnaam zẽedã pʋgẽ,

tɩɩsã rag n maanda sũkiir ne yẽnda.»

10Bõn-kãng yĩnga, ade, maam a Zu-soab a Sẽn-Ka-Saab yetame: «Yẽnda rag n yaa woko, la yẽnda zugã woglem dag n yɩɩda tɩɩs a taabã sẽn bĩmã. Yẽnda rag n wukda a meng a woglmã yĩnga. 11Rẽ n kɩt tɩ mam na n bas yẽnda buud toay-toay pãens rãmb nusẽ, tɩ b maan-a wa sẽn zems a wẽnemã. Mam diga yẽnda. 12Sãamb sẽn yaa buud toay-toayã nin-toosã, wa n kɛ-a lame n bas-a beenẽ, la a wilã kaoome n dʋʋg tãmsã zutu, la tãn-londã fãa pʋse, t'a wil-bãoonegã kao n dʋʋg tẽngã ko-soayã fãa pʋse. Dũniyã nebã buud fãa sẽn dag n vɩ a maasmẽ wã loogame n bas-a.

13Yĩngr bõn-yɩgdɩ wã fãa wa n be a wilã

sẽn kao wã zutu.

La we-rũmsã fãa wa n maana b gãag zĩig

yẽnda wil-bãoonegã sʋka.

14Na n yɩɩ woto, tɩ tɩɩs nins sẽn be koom noorã ba a yembr da leb n tõog n bɩ n lebg wok ye. Bãmb ba a yembr zug woglem kõn leb n zʋʋg tɩɩs a taabã sẽn bĩmã ye. Tɩ-bɛdã sẽn paamd koomã ba a yembr ka na n tõog n bɩ n lebg wok ye. Bala, bãmb fãa na n kiime, b na n siga tẽngã zĩ-zulumsẽ, n naag ninsaalbã, ne sẽn sigd-b bok pʋgẽ wã.»

15Ade, Zu-soab a Sẽn-Ka-Saab yetame: «Daar ning sɛɛdr tɩɩgã sẽn sig kɩɩm-kulgã, mam kɩtame tɩ bũmb fãa maan sũ-sãanga. Yẽnda yĩng kɩtame tɩ mam yẽd bog-zulumsã, la m gɩdg kʋɩlsã. Ko-kãsemsã koom yalsame. Mam kɩtame tɩ lik zĩnd Libã, wetã tɩɩs fãa kʋɩɩ yẽnda yĩnga. 16Mam sẽn kɩt tɩ yẽnda sig kɩɩm-kulg n naag b rãmb nins sẽn sigd bok pʋgẽ wã, mam kɩtame tɩ yẽnda lʋɩɩsã bʋrg kɩt tɩ buud toay-toayã fãa rigi. Edɛn tɩɩsã fãa, ne Libã tɩɩsã sẽn yaa tɩ-neeb la sõama n yɩɩdã, la tɩɩs nins fãa sẽn paamd koomã, bãmb fãa sẽn be tẽngã zĩ-zulumsẽ wã paama belsgo. 17Bãmb me siga kɩɩm-kulg ne yẽnda, n naag b rãmb nins sẽn pa tãpẽ wã. Bãmb n dag n yaa sõangdba, n vɩ a maasmẽ wã buud a taabã sʋka.

18Edɛn tɩɩsã sʋka, ãndã n wẽnd foom, f ziirã ne f kãosengã pʋga? B yaool n na n kɩtame tɩ fo naag Edɛn tɩɩsã fãa n sig tẽngã zĩ-zulumsẽ. Fo na n gãanda sẽn ka kẽ-b bãongã sʋka. Ad Faarõ ne a nebã baoosgo. Maam a Zu-soab a Sẽn-Ka-Saab n yeele.»

Currently Selected:

A Ezekɩyɛlle 31: MPBU

Highlight

Copy

Compare