A Ezekɩyɛlle 14

Nebã tog n basa wẽn-naandsã

1Israyɛll nebã kãsem-dãmb kẽer waa mam nengẽ, n zĩnd mam taoore. 2La Sẽn-Ka-Saab goma ne maam n yeele:

3«Ninsaala, nin-kãensã sũyã loee ne b wẽn-naandsã. Bãmb dɩgenda bũmb ning sẽn na n yɩ kug-lakdg b yĩngã, la sẽn kɩtd tɩ bãmb lʋɩt kongr pʋgẽ wã b taoore. Dẽ yĩnga, mam na bas tɩ nin-bãmbã sok maam n na n bãng bũmbu?» 4Woto yĩnga, gom ne-b n yeel-b tɩ maam a Zu-soab a Sẽn-Ka-Saab yetame: «Israyɛll buudã ned ning fãa sũur sẽn loe ne a wẽn-naandse, la sẽn dɩgend bũmb ning sẽn na n yɩ kug-lakdg a yĩnga, la sẽn kɩtd t'a lʋɩt kongr pʋgẽ wã a taoorã sã n wa no-rɛɛsã nengẽ, yaa maam a Sẽn-Ka-Saab n na n leok-a, yẽnda wẽn-naandsã sẽn yaa wʋsgã yĩnga. 5Woto, Israyɛll buudã neb nins sẽn zãag b mens ne maam b wẽn-naandsã fãa yĩngã sũy na n kao b bʋʋdo. 6Woto yĩnga, yeel Israyɛll buudã tɩ Zu-soab a Sẽn-Ka-Saab yetame: ‹Wẽnemd-y n bas-y y wẽn-naandsã, bas-y y yel-beedã fãa! 7Bala, Israyɛll buudã ned ning fãa, la sãan ning fãa sẽn be Israyɛll pʋgẽ sã n zãag a meng ne maam t'a sũurã loe ne a wẽn-naandsã, yẽnda sã n dɩk bũmb ning sẽn na n yɩ kug-lakdg a yĩng n kɩt t'a lʋɩ kongr pʋgẽ wã n dɩgl a taoore, la a sã n wa no-rɛɛsã nengẽ, n na n kɩt t'a sok maam bũmbu, yaa maam a Sẽn-Ka-Saab meng n na n leok yẽnda. 8Mam na n wẽnemdame n zab ne nin-kãng soaba, n kɩt t'a lebg bãnde, la yel-bũndi. Mam na n yiis-a-la m nebã sʋka. Woto, yãmb na n bãngame tɩ mam yaa Sẽn-Ka-Saabo.

9No-rɛɛsã sã n bas tɩ b belg-a, la a sã n togs koɛɛga, yaa maam a Sẽn-Ka-Saab n belg no-rɛɛs-kãnga. Mam na n tẽega m nug yẽnda zug n kɩt t'a menem Israyɛll sẽn yaa mam nebã sʋka. 10No-rɛɛsã kongr sẽn yaa to-to wã, neb nins sẽn sokd-b yẽnda wã me kongr na n yɩ a woto. Bãmb kongrã taal na n zĩnda b zugu, 11sẽn na n yɩlẽ tɩ Israyɛll buudã ra leb n kẽ moog n zãag ne maam, la b ra leb n maan yel-wẽn nins fãa b sẽn maanã, n dẽgem b mens ye. Dẽ, bãmb na n yɩɩ mam neba, la mam na n yɩɩ bãmb Wẽnnaam. Maam a Zu-soab a Sẽn-Ka-Saab n yeele.»

Wẽnnaam sɩbgr sẽn ka na n vaale

12Sẽn-Ka-Saab goma ne maam n yeele:

13«Ninsaala, tẽng sã n maan sẽn kis n beeg maam, tɩ mam tẽeg m nugã yẽnda zug n kɩt tɩ rɩɩb sɛ a pʋgẽ, mam sã n kɩt tɩ kom kẽ a pʋgẽ, mam sã n menes ninsaalbã ne rũmsã sẽn be a pʋgẽ wã, 14la sã n mikame tɩ nin-bãmbã b tãabã be a pʋgẽ, a Nowe ne a Dãniyɛll la a Zoobe, bãmb na n fãaga b mensã vɩɩm b tɩrlmã yĩnga. Maam a Zu-soab a Sẽn-Ka-Saab n yeele. 15Mam sã n kɩt tɩ rũm-toos kẽ tẽngã n kʋ kambã, tɩ tẽngã lebg vɩʋʋg tɩ ned ka leb n tõe n tũ be rũm-kãens yĩnga, 16tɩ nin-bãmbã b tãabã be beenẽ, mam wẽenda ne m mengã tɩ b ka na n tõog n fãag bi-ribl bɩ bi-pugl ye, bãmb mens bal n na n paam fãagre, tɩ tẽngã lebg zĩ-vɩʋʋgo. Maam a Zu-soab a Sẽn-Ka-Saab n yeele. 17Bãmb sã n kɩt tɩ zabr sʋʋg kẽ tẽngã, bɩ mam sã n yeel tɩ zabr sʋʋg gilg tẽngã, wall mam sã n menes ninsaalbã ne rũmsã, 18tɩ nin-bãmbã b tãabã be tẽngã pʋgẽ, mam wẽenda ne m meng tɩ bãmb ka na n tõog n fãag bi-ribl bɩ bi-pugl ye, yaa bãmb mens bal n na n paam fãagre. 19Mam sã n kɩt tɩ bã-loangdg kẽ tẽngã, mam sã n yik m sũurã ne bãmb n na n daag zɩɩm n menes ninsaalbã ne rũmsã, 20t'a Nowe ne a Dãniyɛll la a Zoob be beenẽ, mam wẽenda ne m meng tɩ bãmb ka na n tõog n fãag bi-ribl bɩ bi-pugl b tɩrlmã yĩng ye. Yaa b mens bal la b na n fãage. Maam a Zu-soab a Sẽn-Ka-Saab n yeele.»

21 # Vẽn 6.8 N-yẽe! Zu-soab a Sẽn-Ka-Saab yetame: «Baa ne mam sẽn kɩt tɩ m sɩbg-kãsems a naasã sẽn yaa zabr sʋʋg la kom la rũm-toos ne bã-longds paam Zeruzalɛmã, n na n menes ninsaalbã ne rũmsã, 22neb kẽer n na n põs n yi beenẽ, yaa kom-dibli la kom-pugli. Bãmb na n waa yãmb nengẽ, la yãmb na n yãnda b yel-manesmã ne b tʋʋmã n paam belsgo, toogã ne bũmb nins fãa mam sẽn kɩt tɩ paam Zeruzalɛmã yĩnga. 23Yãmb sã n yãnd b yel-manesmã ne b tʋʋmã sẽn yaa to-to wã, y na n paama belsgo. Woto la y na n bãng tɩ mam sẽn maan Zeruzalɛm bũmb nins fãa wã ka zaalem yĩng ye. Maam a Zu-soab a Sẽn-Ka-Saab n yeele.»

Currently Selected:

A Ezekɩyɛlle 14: MPBU

Highlight

Copy

Compare