Yikri 40

Sɛk roogã bark ningr no-tũudsi

1Sẽn-Ka-Saab yeela a Moyiis yaa: 2«Pipi kiuugã pipi daare, bɩ f tilg fu-roogã sẽn yaa sɛk roogã. 3La f rɩgl kaset koglgã be n yagl fu-lillidgã n lill koglgã. 4La f wa ne taablã n wa ning teedã a zug b zĩisẽ. La f wa ne fɩtl doagendgã n dogl fɩtl-dãmbã a zugu. 5Rɩgl sãnem tẽn-kugrã sẽn na n tar n yõogd wisdã kaset koglgã taoore, la f yagl fu-lillidgã sɛk roogã noore. 6Rɩgl tẽn-kugr ning b sẽn na n yõogd maand bugum a zugã fu-roogã sẽn yaa sɛk roogã noor yɩnga. 7La f rɩgl sĩngã sɛk roogã ne tẽn-kugrã sʋka, n ning koom a pʋgẽ. 8Maan zak n gilg sɛk roogã n yagl fu-lillidgã zakã noore. 9Yãk kaam ning sẽn pʋdgd maan-kʋʋdbã zutã n ning sɛk roogã ne bũmb nins fãa sẽn be a pʋgẽ wã zut n welg roogã ne a teedã fãa tɩ b yɩ sõama. 10La f yãk kaamã n ning tẽn-kugr ning b sẽn yõogd maand a zugã zugu, ne a teedã fãa. Welg tẽn-kugrã toore, t'a yɩ bũmb sẽn welg toor n yɩɩd fãa. 11La f ning kaam sĩngã me ne a naoorã me zug n welg-ba. 12Kɩt t'a Aarõ ne a kom-dibli wã me kolg sɛk roogã noor tɩ f so-b koom. 13La f sã n so bãmb koomã n sɛ, bɩ f yeelg a Aarõ a fut sẽn welg toorã, n pʋdg a zug kaam, n welg-a toor t'a maan maan-kʋʋr tʋʋmd mam taoore. 14La f kɩt tɩ yẽnda kom-dibli wã kolg tɩ f yeelg bãmb b futu. 15La f pʋdg kaam bãmb zut wa fo sẽn dag n pʋdg bãmb ba wã zugã tɩ bãmb me yɩ maan-kʋʋdb mam taoore. La kaam ning sẽn pʋdg bãmb zutã na n kɩtame tɩ bãmb yagensã yɩ maan-kʋʋdb bãmb zamaanã fãa tɛka.» 16A Moyiis maana wa Sẽn-Ka-Saab sẽn dag n yeel yẽnda wã kɛpɩ. A maana a woto.

Sɛk roogã tilgri

17Yʋʋm a yiibẽ soabã pipi kiuugã pipi daarã, b tilga sɛk roogã. 18A Moyiis tilga sɛk roogã. A vigla a naoã, n tilg a ra-pegdã, la a ning a ra-bɩlmã b zĩisẽ, la a lugl a ra-lugdsã. 19B yɛdga fu-roogã sɛk roogã zugu, n yɛdg fu-roogã zugẽ lutgã n lud-a, wa Sẽn-Ka-Saab sẽn dag n yeel a Moyiisã. 20B rɩka kaset kug-walsã n ning kaset koglgã pʋgẽ, la yẽnda rɩka ra-bɩlmã n tui koglgã, la a fõgen koglgã a limdã sẽn yaa bas-taal zĩigã. 21Dẽ, b talla koglgã n tɩ rɩgl sɛk roogã pʋga. La b yagl fu-lillidgã n lill kaset koglgã wa Sẽn-Ka-Saab sẽn dag n yeel a Moyiisã. 22B rɩgla taablã sɛk roogã pʋgẽ nug rɩtgo n kolg fu-lillidgã. 23La b rogla burã b zĩisẽ taablã zug Sẽn-Ka-Saab taoor wa Sẽn-Ka-Saab sẽn dag n yeel a Moyiisã. 24B rɩgla fɩtl doagendgã sɛk roogã pʋgẽ nug goabga t'a tees taablã. 25B rogla fɩtl-dãmbã b zĩisẽ Sẽn-Ka-Saab taoor wa Sẽn-Ka-Saab sẽn dag n yeel a Moyiisã. 26B rɩgla sãnem tẽn-kugrã sɛk roogã pʋgẽ n kolg fu-lillidgã. 27B yõoga wisd sẽn tar yũ-noog a zug wa Sẽn-Ka-Saab sẽn dag n yeel a Moyiisã. 28B yagla fu-lillidgã sɛk roogã noore. 29B rɩgla tẽn-kugr ning b sẽn na n yõog maoong a zugã fu-roogã sẽn yaa sɛk roogã noorã yɩnga. La b yõoga maandã ne kũunã bugum a zug wa Sẽn-Ka-Saab sẽn dag n yeel a Moyiisã. 30B rɩgla pekr sĩngã sɛk roogã ne tẽn-kugrã sʋka, n ning koom a pʋgẽ pekr yĩnga. 31A Moyiis ne a Aarõ la a Aarõ kom-dibli wã yãka koomã n nudg nusi, la b waas b nao. 32Bãmb sã n dat n kẽ sɛk roogẽ wã, wall b sã n dat n kolg tẽn-kugrã, b nudgda b nusi, la b waas b nao wa Sẽn-Ka-Saab sẽn dag n yeel a Moyiisã. 33Yẽnda maana zak n gũbg sɛk roogã ne tẽn-kugrã, la yẽnda yagla fu-lillidg zakã noore. Yaa woto la a Moyiis maan tʋʋmdã fãa n sɛ.

Sẽn-Ka-Saab ziirã pida sɛk roogã

34 # 1Rĩm 8.10,11, Eza 6.4, Eze 43.4,5, Vẽn 15.8 A Moyiis sẽn maan woto n sɛ, sawaodg waa n luda sɛk roogã, la Sẽn-Ka-Saab ziirã pida sɛk zĩigã. 35A Moyiis rag n ka tõe n kẽ sɛk roogã pʋgẽ ye. Bala, sawaodgã be a zugu, la Sẽn-Ka-Saab ziir pida sɛk zĩigã. 36Sawaod-taokã sã n wa n zẽk n bas sɛk roogã, Israyɛll nebã me yikdame n sɩng kẽnde, wa sẽn zems b yalsg fãa zĩiga. 37La sawaodgã sã n ka zẽke, bãmb ka yikd ye, bãmb paada beenẽ hal tɩ ta daar ning sawaodgã sẽn na n zẽkã. 38Bala, Sẽn-Ka-Saab sawaodgã paada sɛk roogã zug wĩntoog ne yʋngo. La yʋngo, sawaodgã tara bugum tɩ Israyɛll buudã fãa neẽ, hal n tãag b yalsgã zĩis fãa.

Currently Selected:

Yikri 40: MPBU

Highlight

Copy

Compare