Yikri 26

Sɛk roogã

(26.1-37, Yik 36.8-38)

1«Maan sɛk roogã ne pɛɛl piig sẽn wʋg ne lamd gĩs-bãaneg sẽn yaa kẽeg haoo la gĩs-moaam ne gĩs-miidu, n gʋl serubẽ-rãmb naand pɛɛlã zutu. 2Peendã fãa woglem tog n yɩɩ kãntɩɩg pisi la a nii, la a yalmã tog n yɩɩ kãntɩɩg a naase. Pɛɛlã yalem ne b woglmã fãa tog n zemsa taaba. 3Bɩ y bogl a pɛɛl a nu ne taaba, la y bogl a nu wã sẽn ketã me ne taaba. 4Maan loets ne gĩs sẽn yaa kẽeg haoo peendã sẽn maan ne pɛɛl a nu sẽn bogl taabã noor kɩreng a ye. La f maan woto ne a to wã me. 5Maan loets pis-nu peend a yembr kɩrenga, la f maan loets pis-nu me peend a yiib soabã kɩrenga. Ning bãmb b yiibã fãa loets tɩ b zems taaba. 6Maan sãnem sogds pis-nu n sog pɛɛlã ne taaba tɩ b lebg roog a yembre.

7Wʋg pɛɛl piig la a yembr ne bʋʋs kõbdo, n lud fu-roogã yĩngrã. 8Peend fãa woglem tog n yɩɩ kãntɩɩg pis-tã, la a yalmã tog n yɩɩ kãntɩɩg a naase. Pɛɛl piig la a yembrã yalem tog n zemsa taaba. 9Bogl pɛɛl a nu ne taaba, la f bogl pɛɛl a yoobã sẽn ketã me ne taaba, la sɛk roogã noor sẽnẽ wã, bɩ f põdemd yoobẽ soabã. 10Ning loets pis-nu dẽenem peendã sẽn maan ne pɛɛl sẽn bogl taabã kɩreng a yembre. La f ning loets pis-nu a yiib soabã sẽn maan ne pɛɛl sẽn bogl taabã me kɩreng a yembre. 11Maan zũud sogds pis-nu n tui loetsã pʋse, n sog-a t'a lebg fu-roog a yembre. 12La fu-roogã lutgã sẽn na n kell peend a yembr yalem pʋɩ-sʋkã, bɩ f bas yẽnda t'a palg sɛk roogã poore. 13La fu-roogã lutgã woglem sẽn na n kell kãntɩɩg a yembr a noy a yiibã fãa wã, bɩ f bas yẽnda t'a palg sɛk roogã kɩrems a yiibã fãa n lud bãmba.

14Maan lutg ne pe-raad gãnd sẽn monem fu-roogã yĩnga, la f maan lutg ne dofẽ-rãmb gãnd n gãneg a zugẽ wã.

15Maan da-pegd sɛk roogã yĩnga. Maan-b ne akasiya raado, n yik-b n tilgi. 16Ra-peok fãa woglem tog n yɩɩ kãntɩɩg piiga, la a yalmã tog n yɩɩ kãntɩɩg a yembr la pʋɩ-sʋka. 17Ra-peok fãa tog n tara sogds a yiib-yiib sẽn tot taaba. Maan sɛk roogã ra-pegd fãa woto. 18Maan da-pegd pisi sɛk roogã yĩnga, n ning-b kɩreng ning sẽn tees goabgã. 19Maan wanzuri nao pis-naas sẽn na n ning ra-pegd pisi wã tẽngre. Ning ra-peok a yembr fãa nao a yiibu, a sogds a yiibã yĩnga. 20Maan da-pegd pisi sɛk roogã kɩreng ning sẽn teesd rɩtg sẽnẽ wã, 21la f maan wanzuri nao pis-naas n ning bãmb yiib-yiib ra-peok a yembr fãa tẽngre. 22Maan da-pegd a yoob sɛk roogã kɩreng ning sẽn teesd nin-taoorã yĩnga. 23La f maan da-pegd a yiib sɛk roogã kɩreng ning sẽn teesd nin-taoor lalsã gõdgr zĩis a yiibã yĩnga. 24Sẽn sɩng ne tẽngre, bãmb na n welga a yiib-yiibu, la b na n loee bãmb zutã ne wĩir n naag taab yĩngr tuiidsã zĩigẽ. Lals a yiibã fãa gõdgr zĩis me na n yɩɩ a woto. 25Bãmb na n yɩɩ ra-pegd a nii ne bãmb wanzuri nao piig la a yoobã. Ra-peok fãa tẽngr na n yɩɩ nao a yiibu. 26Maan akasiya ra-bɩlem a nu sɛk roogã kɩreng a yembr ra-pegdã yĩnga. 27Maan da-bɩlem a nu sɛk roogã kɩreng a yiib soabã ra-pegd yĩnga. La f maan da-bɩlem a nu sɛk roogã kɩreng ning sẽn teesd nin-taoorã yĩnga. 28La ra-bɩlemd ning sẽn na n zĩnd-a sʋkã na n pɩʋʋga ra-pegdã fãa sẽn sɩng ne lalga noor kɩreng a yembre, n tãag a noor a to wã. 29Bɩ f bolg ra-pegdã ne sãnem. La f maan sãnem tuiids sẽn yaa gils ra-bɩlmã yĩnga. La f bolg ra-bɩlmã ne sãnem.

30Tilg sɛk roogã wa sẽn zems mamsg ning mam sẽn wilg foom tãngã zugã.

31Wʋg fu-lillidg ne gĩs sẽn yaa miuug masɩ, la sẽn yaa kẽeg haoo, ne gĩs-moaama la gĩs-miidu, ne lamd gĩs-bãanegã, tʋʋm-mitbã sẽn maandã. La f gʋl serubẽ-rãmbã mamsd a zugu. 32Bɩ f yagl-a akasiya ra-lugds a naas sẽn bolg ne sãnem la sẽn tar sãnem yagendsã zutu. Maan bãmb tɩ b rog wanzuri nao a naas zutu. 33#Ebr 6.19, 9.3-5Yagl fu-lillidgã sogdsã tẽngre, la f tall kaset koglgã n wa fu-lillidgã taoore. Fu-lilldgã tog n bee zĩig sẽn welg toorã ne zĩig sẽn welg toor n yɩɩdã sʋk yãmb yĩnga.

34Fõgen kaset koglgã limd sẽn yaa bas-taal zĩigã sẽn be zĩig sẽn welg toor n yɩɩdã pʋgẽ wã. 35Ning taablã zĩig sẽn welg toorã pʋgẽ, fu-lilldgã yɩnga. La f ning fɩtl doagendgã nug-goabg sẽnẽ, sɛk roogã pʋga, t'a tees taablã sẽn be nug-rɩtg sẽnẽ wã.

36Maan fu-lillidg ne gĩs sẽn yaa miuug masɩ, la sẽn yaa kẽeg haoo, ne gĩs-moaama la gĩs-miidu, ne lamd gĩs-bãanegã, tʋʋm-mitbã sẽn maandã, fu-roogã noor yĩnga. 37La f maan akasiya ra-lugds a nu fu-lillidgã yĩnga, n lud-b ne sãnem, n ning sãnem yagendsã b zutu. La f rõog zũud nao a nu bãmb yĩnga.»

Currently Selected:

Yikri 26: MPBU

Highlight

Copy

Compare