Yikri 25

WẼNNAAM LUGLA B ROOGÃ ISRAYƐLL NEBÃ SƲKA

Kũun Sɛk roogã yĩnga

(25.1-9, Yik 35.4-25)

1Sẽn-Ka-Saab yeela a Moyiis yaa: 2«Togs Israyɛll nebã tɩ b bao kũun n kõ maam. Reeg kũun ned kam fãa nengẽ sẽn kõt ne yamleoogo. 3Ad kũun nins yãmb sẽn na n deeg bãmb nengẽ wã: yaa sãnem ne wanzuri la zũudu, 4ne gĩs sẽn yaa kẽeg haoo la gĩs-moaama, ne gĩs-miidu, la lamd gĩs-bãanega, ne gĩs sẽn maan ne bʋʋs kõbdo, 5la pe-raad gãnd sẽn moneme, ne dofẽ-rãmb gãndo, la akasiya raado, 6ne kaam fɩtl-dãmbã yĩnga, la parfẽ-rãmb sẽn tar yũ-noog nug-tikr kaamã ne wisdã yĩnga, 7la onigs kuga, ne kug a taab sẽn na n ning maan-kʋʋr kãsem fuugã, la yãoog lutgã. 8Bɩ bãmb maan doog mam yĩnga, tɩ mam tõe n zĩnd bãmb sʋka. 9Bɩ yãmb maan sɛk zĩigã ne a teedã fãa tɩ zems wa mam sẽn na n wilg foomã.»

Kaset koglgo

(25.10-20, Yik 37.1-9)

10«Bɩ bãmb maan koglg ne akasiya raado. A woglmã na n yɩɩ kãntɩɩg a yiib la pʋɩ-sʋka, la a yalmã na n yɩɩ kãntɩɩg la pʋɩ-sʋka, la a zãntlmã na n yɩɩ kãntɩɩg la pʋɩ-sʋka. 11La bɩ f bolga a pʋgã ne a yɩngã ne sãnem halaale. La f maan kogsr sẽn yaa sãnem n gilg a zugã. 12Rõog sãnem tuiid-gils a naas n ning bãmb a kɩrems a naasẽ wã. Ning tuiids a yiibã kɩreng a yembre, la f ning tuiids a yiibã me a kɩreng a to wã. 13Maan ra-bɩlem ne akasiya raado, n bolg bãmb ne sãnem. 14Rɩk ra-bɩlmã n tui tuiidsã sẽn be koglgã kɩremsã, tɩ b tar bãmb n zãad koglgã. 15Ra-bɩlmã tog n paa koglgã tuiidsã pʋse. Ra yiis bãmb ye. 16Ning kaset kug-wals nins mam sẽn na n kõ foomã koglgã pʋga. 17#Ebr 9.5Maan limd sẽn boond tɩ bas-taal zĩig ne sãnem halaale. A woglmã tog n yɩɩ kãntɩɩg a yiib la pʋɩ-sʋka, la a yalmã tog n yɩɩ kãntɩɩg la pʋɩ-sʋka. 18Kud sãnem n maan serubẽ-rãmb a yiibu. Maan a yembre bas-taal zĩigã kɩreng a yembre, la f maan a yembrã me a kɩreng a to wã. 19Maan serubẽ a yembr a kɩreng a yembre, la f maan serubẽ a to a kɩreng a yembrã me, tɩ serubẽ-rãmb a yiibã fãa sẽn be kɩrems a yiibã fãa sũgun ne bas-taal zĩigã sẽn yaa limdã sẽn yaa sãnemã n yaa a yembre. 20Serubẽ-rãmbã pɩgsã tog n tẽegame n lud bas-taal zĩigã. B nensã tog n teesa taaba. B nensã tog n teesa bas-taal zĩigã. 21Ning kaset kug-walsã mam sẽn na n kõ foomã koglgã pʋgẽ, la f fõgen koglgã ne a limdã sẽn yaa bas-taal zĩigã. 22Yaa beenẽ la mam na n seg foom. Mam na n goma ne foom bas-taal zĩigã zugẽ, serubẽ-rãmb a yiibã sẽn be kaset koglgã zugẽ wã sʋka, n kõ foom mam noyã fãa Israyɛll nebã yĩnga.»

Burã taable

(25.23-29, Yik 37.10-16)

23Maan taabl ne akasiya raado. A woglmã tog n yɩɩ kãntɩɩg a yiibu, a yalmã kãntɩɩg a yembre, a zãntlmã kãntɩɩg a ye la pʋɩ-sʋka. 24Lud-a ne sãnem halaale. Maan kogsr ne sãnem n gilg a zãngã. 25Maan da-pɩʋʋgds a naas sẽn zems nug-bi a naas n gilg-a. Maan kogsr ne sãnem n gilg ra-pɩʋʋgdsã. 26Maan sãnem tuiids a naase n ning a nao a naasã sokr zĩisẽ. 27Ning tuiidsã ra-pɩʋʋgdsã kɩrems tɩ b tui ra-bɩlmã bãmb pʋsẽ n zã taablã. 28Maan da-bɩlem ne akasiya raado, n bolg bãmb ne sãnem n tar bãmb n zãad taablã. 29Maan laase, la wũmbli, ne tʋgdo, la laas maandã pʋdgr yĩnga. Maan bãmb ne sãnem halaale. 30#Mk 24.5-8Fo na n dogla burã b sẽn kõt maamã taabl ning sẽn be mam taoorã zug wakat fãa.

Fɩtl doagendgã

(25.31-39, Yik 37.17-24)

31«Maan fɩtl doagendg ne sãnem halaale. Maan-a ne sãnem sẽn kudi. Maan a naoorã ne a sɛɛgã la a laasã ne a yoadã la a puudã fãa tɩ yɩ bũmb a yembre. 32Wil a yoob n na n zĩnd fɩtl doagendgã kɩremse. Wil a tãab na n zĩnda a kɩreng a yembre, tɩ wil a tãab me zĩnd a kɩreng a to wã. 33Will a yembr zugu, b tog ninga laas a tãab sẽn wẽnd amand tɩɩg bila, n tar yoad ne puudu, la will a to wã me zugu, b tog ninga laas a tãab sẽn wẽnd amand tɩɩg bila, n tar yoad ne puudu. B tog n maana a woto ne wil a yoobã fãa sẽn be fɩtl doagendgã zugã. 34Maan fɩtl doagendgã, n ning laas a naas sẽn wẽnd amand tɩɩg bila, n tar yoad ne puudu. 35Bɩ b maan yodr a yembr n ning a pipi wil a yiibã tẽngre, la yodr a yembr a wil a yiib nins sẽn pʋgdã tẽngre, la yodr a yembr a yaoolem wil a yiibã me tẽngre. A na n yɩɩ woto ne wil a yoobã sẽn yit fɩtl doagendgẽ wã. 36Fɩtl-dãmbã yoad ne b wilã na n yɩɩ bũmb a yembr ne fɩtl doagendgã. Bãmb fãa na n yɩɩ ne sãnem halaale b sẽn kudi, n yaa bũmb a yembre. 37Maan fɩtl-dãmb a yopoe. Dogl fɩtl-dãmbã a zugu, tɩ bãmb vẽenem yãg fɩtl doagendgã taoore. 38B tog n maana a yʋʋsã ne tom-peglem laasã ne sãnem halaale. 39Bɩ b rɩk sãnem halaal talã a yembr n maan fɩtl doagendgã ne a teedã fãa.

40 # Tʋʋm 7.44, Ebr 8.5 La bɩ f gũusi, n maan bãmb tɩ b zems mamsg ning mam sẽn wilg foom tãngã zugã.»

Currently Selected:

Yikri 25: MPBU

Highlight

Copy

Compare