Yikri 21

Tõod sẽn kẽed yembs wɛɛngẽ

1«Ad noy nins fo sẽn na n wilg nebã: 2#Mk 25.39-46Fo sã n da yamb sẽn yaa Ebre buudã neda, yẽnda na n tʋma yʋʋm a yoobe, la yʋʋm a yopoe wã, yẽnda na n yii ne lohorem n ka yao bũmb ye. 3Yẽnda sã n dag n wa a yembre, yẽnda na n leb n yi a yembr bala. La a sã n dag n waa ne a paga, a pagã na n tũ-a lame n yi. 4Yẽnda zu-soabã sã n kõ yẽnda paga, t'a pagã rog kom-dibli la kom-pugli, pagã ne a kambã yaa yẽnda zu-soabã n so, yẽnda na n yi a yembr bala. 5La yambã sã n yeel t'a nonga a zu-soabã ne a pagã, la a kambã, tɩ la a ka rat tɩ b kõ-a lohorem t'a yi, 6bɩ a tall-a n wa Wẽnnaam taoore, n kɩt t'a kolg kʋɩlengã, wall lugrã sɛɛgẽ t'a zu-soabã vʋdg a tʋbrã ne pĩim. La yẽnda na n kell n yɩ a zu-soabã yamb a yõor tɛka. 7La ned sã n koos a bi-pugl t'a lebg yem-poakã, bi-pugl-kãng sẽn lebg yem-poakã ka na n yi a yembdã pʋg wa yem-daad sẽn yit to-to wã ye. 8La a soaalã sã n ka rat-a, bɩ a tɩ lebs-a la a reeg a ligdi. Yẽnda ka tar noor tɩ koos-a ne sãan ye. Bala, yẽnda belg-a lame. 9La yẽnda sã n dat n dɩk-a n kõ a meng biiga, bɩ a maan-a wa sẽn zems b noor ning sẽn kẽed kom-pugli wɛɛngẽ wã. 10La a sã n peeg pag a to, bɩ a ra boog dẽenem soabã rɩɩbo, wall a fut ye. Yẽnda tog n kell n kẽeda ne pipi pagã wa sẽn zems kãadem tõogo. 11Yẽnda sã n ka maan bõn-kãensã a tãabã n kõ yem-poakã, yem-poakã tõe n yiime n ka kɩs bũmbu, wall a yao ligd ye.»

Beegr sẽn tõe n kɩt tɩ b kʋ neda

12 # Mk 24.17 «Ned sã n wẽ a to n kʋ, bɩ b kʋ a soabã. 13#Sõd 35.10-34, Tõ 19.1-13, Zoz 20.1-9La yẽnda sã n ka maan ne pʋ-toogo, la yaa Wẽnnaam n kɩt t'a nug maane, mam na n wilga foom zĩig yẽnda sẽn tõe n zoe n kẽng n põse. 14La ned sã n maan sɩlem n kʋ-a to ne pʋ-toogo, bɩ f yõk-a, ba a sã n bee mam tẽn-kugrã taoore, bɩ f yiis-a beenẽ n kɩt tɩ b kʋ-a.

15Ned sã n wẽ a ba bɩ a ma, bɩ b kʋ-a.

16 # Tõ 24.7 Ned sã n zuk ninsaala, a sã n paam n koos-a lame, wall b sã n yãnd nedã t'a ket a nugẽ, bɩ b kʋ sẽn zuk-a nedã.

17 # Mk 20.9, Mat 15.4, Mark 7.10 Ned sã n tʋʋs a ba bɩ a ma, bɩ b kʋ-a.

18Raop a yiib sã n zab taaba, t'a yembr rɩk kugr n wẽ a to wã, wall a wẽ-a ne nug-giulg t'a pogl n ka ki, n gãe a gãagẽ n ka tõe n yiki, 19la a sã n wa tõe n yik n tik raoog n yi n kẽne, bɩ b bas sẽn wẽ-a yẽnda wã taale. La baoosgo, bɩ a kõ yẽnda sẽn pogl a soabã ligd sẽn zems wakat ning a sẽn ka tʋmã yaoodo, la a ges a yell hal t'a wa paam laafɩ zãnga.

20Ned sã n wẽ a yem-daoogo, wall a pãb a yem-poak ne dasaar n kʋ, bɩ b sɩbg-a n lebse. 21La yambã bɩ yem-poakã sã n kell n vɩɩmd daar a yembr wall rasem a yiibu, bɩ b ra sɩbg a soaalã ye. Bala, yambã yaa yẽnda ligdi.

22Raop sã n zab taaba, n fão pag sẽn tʋt t'a pʋgã sãam tɩ pagã meng yaool n ka ki, bɩ sẽn fão-b pagã yao sẽn zems pagã sɩd sẽn yaoolg bãmb bũmb ningã, wa sẽn zems bʋ-kaoodbã sẽn yeelã. 23La a sã n ki, nedã na n yao a vɩɩm vɩɩm yĩnga, 24#Mk 24.19,20, Tõ 19.21, Mat 5.38la nifu, nif yĩnga, la yẽnde, yẽnd yĩnga, la nugu, nug yĩnga, la naoore, naoor yĩnga, 25bugum yõogre, bugum yõogr yĩnga, la poglgo, poglg yĩnga, la yĩng bugbu, yĩng bugb yĩnga.

26Ned sã n wẽ a yem-daoog bɩ a yem-poak t'a nif feooge, bɩ a kõ-a lohorem a nifã feoogr yĩnga. 27Yẽnda sã n wẽ a yem-daoog bɩ a yem-poak n feooge a yẽnde, bɩ a kõ-a lohorem a yẽndã feoogr yĩnga.

28Loalg sã n tãag rao bɩ pag t'a ki, bɩ b lob loalgã ne kuga, la b ra wãb a nemdã ye. Bɩ b bas loalgã soab taale. 29La loalgã sã n dag n yaa lol-tãadga, tɩ b togs a soabã t'a ka loe-a, a sã n kʋ rao bɩ paga, bɩ b lob loalgã kug n kʋ, la b kʋ a soabã me. 30B sã n yaoolg a soabã yaood t'a yao, tɩ b bas-a n ka kʋ, yaa tɩlɛ tɩ yẽnda yao yaood ning fãa b sẽn yeelã, a vɩɩmã yĩnga. 31Loalgã sã n tãag bi-ribl bɩ bi-pugla, bɩ b maan-a wa sẽn zems tõ-kãngã me. 32Loalgã sã n tãag yem-daoog bɩ yem-poaka, loalgã soab na n yaoo yem-poakã bɩ yem-daoogã soaalã wanzuri ligd pis-tã, la b lob loalgã kug n kʋ.

33Ned sã n pak bulga, ka rẽ bɩ a tuu bulg n ka pag a noorã tɩ ned loalg bɩ a bõang lʋɩ a pʋgẽ, 34bulgã soab na n yaoo bũmbã sẽn sãamã. A na n yao a soabã rũngã ligdi, la a tall rũm-kɩɩngã.

35Ned loalg sã n tã ned a to loalg n kʋ, bãmb na n koosa lol-vɩɩgã n pʋɩ taab ligdã, la bãmb na n pʋɩɩ lol-kɩɩngã nemd me. 36La b sã n dag n deng n bãngame tɩ loalgã yaa lol-tãadga, t'a soaba ka loe-a, loalgã soab tog n lebsa ned a to wã loalga, la a tall lol-kɩɩngã.

37Ned sã n zuk a to naafo, a pesgo, wall a bʋʋg n kʋ, wall a koos-a, a tog n lebsa loalgã soab niig a nu lol-yendã yĩnga, la rũm-bãooneg a naase, peosg a yembre, wall bʋʋg a yembr fãa yĩnga.»

Currently Selected:

Yikri 21: MPBU

Highlight

Copy

Compare