Efɛɛs‑rãmba 4
4
Sɩɩg-sõng raabo
1Woto yĩnga, mam sẽn be bi-bees roogẽ Zu-soabã tũudum yĩngã, mam sagenda yãmb tɩ y kẽn wa sẽn zems boolg ning Wẽnnaam sẽn bool yãmbã. 2#Kol 3.12,13Kẽn-y ne sik-m-meng la sũ-bʋgsem la sũ-mare, la y sak n deeg taab ne nonglem, 3n mao tɩ Sɩɩg-sõng lagem-n-taar zĩndi, laafɩ ning sẽn loe-a yãmb ne taabã yĩnga. 4Yĩng a yembr bal n be, la Sɩɩg-sõng a yembr bal n be, wa b sẽn bool yãmb tɩ y paam tẽeb pidsg gũudum a yembr y boolgã yĩngã. 5Zu-soab a yembr bala n be, la tẽeb a yembr bala, la lisg a yembr bala. 6Wẽnnaam a yembr bal n be n yaa nebã fãa ba, n so bũmb fãa, la b be b fãa sʋka, la b fãa pʋse.
7La b kõo tõnd ned kam fãa barkã, wa sẽn zems Kiris kũun makdgã. 8#Yɩɩn 68.19Yaa woto yĩng tɩ gʋls-sõamyã yetẽ yaa:
Bãmb sẽn dʋ yĩngrã, b zãa yembse,
la bãmb kõo ninsaalb kũuni.
9La gomd ning sẽn yet tɩ bãmb dʋʋme wã võor yaa bõe, sã n ka tɩ bãmb reng n siga tẽngã tẽngr me? 10Soab ning sẽn dag n sig-a wã, yaa soab‑kãng bal n zẽk yĩngr hal n loog saasẽ, tɩ bãmb tõe n pid bũmb fãa. 11Yaa bãmb n kɩt tɩ neb kẽer yɩ tẽn-tʋmdbã, tɩ kẽer yɩ bãmb no-rɛɛsdba, tɩ kẽer yɩ koe-noogã moaandba, tɩ kẽer yɩ pe-kɩɩmba la karen-saam-dãmba, 12b nebã bɩɩsg yĩnga. Wẽnnaam maana a woto bãmb tʋʋmdã na tõog n maan yĩnga, la Kiris yĩngã bɩɩsg yĩnga, 13hal tɩ tõnd fãa na lagem taab n paam tẽeb a yembre, la d bãng Wẽnnaam Bi-riblã, n yɩ neb sẽn bɩ, n lebg wa a Zeezi sẽn yaa bũmb ningã, n zems zãngã. 14Woto, tõnd kõn leb n yɩ wa kamb sẽn lengde, tɩ zãmsg buud fãa rɩkd-d n loogdẽ, tɩ ninsaalbã zãmbã ne b belgr tʋʋmã tar tõnd n leebdẽ ye. 15La yaa tɩ tõnd sẽn togsd sɩd ne nonglmã yĩnga, tõnd na n bɩɩ bɩʋʋngã ne bũmb fãa, Kiris sẽn ya tõnd naabã pʋgẽ. 16#Kol 2.19Yaa bãmb yĩng la yĩngã wil gill fãa sẽn sog taab sõama, sũgdsã sẽn zãad yĩngã sõama wã yĩngã, yĩngã will fãa bɩtame n zems a sẽn tog n bɩ to-to, la a bɩɩsd a meng ne nonglem.
Vɩ-paalg Kiris pʋgẽ
17Woto yĩnga, ad bũmb ning mam sẽn yet yãmba, la m sẽn kɩt a kaset Zu-soabã pʋgẽ: Yaa tɩ yãmb ka tog n leb n kẽn wa neb nins sẽn ka pʋʋsd Wẽnnaamã ye. Bãmb kẽnda wa sẽn zems b tagsg sẽn ka yõodã. 18Zɩɩlmã sẽn be nin-kãens pʋgẽ la b sũyã sẽn diglmã yĩnga, b yamã ka liki, la b ka vɩ wa Wẽnnaam sẽn datã ye. 19Yel-wẽnã maaneg yãnd ka leb n tar-b baa bilfu. B basame tɩ raglem soog-ba, tɩ b maand tʋʋm dẽgd buud fãa la rat-wʋsgo. 20La yãmba, ka yɛl a woto maaneg pʋgẽ la yãmb zãms tɩ bãng Kirisã ye, 21-22#Kol 3.9sã n yaa tɩ yãmb wʋma bãmb yelle, la y paam zãmsg bãmb pʋgẽ, n zems ne sɩd ning sẽn be a Zeezi pʋgẽ wã. Sɩdã võor yaa tɩ yãmb bas y tʋʋm kʋdã sẽn yaa nin-kʋdgã rẽndã, nin-kʋdg ning sẽn dẽgemd a meng nana, ratem wẽngã sẽn tudgd nedã yĩnga, 23la tɩ Sɩɩgã tek yãmb yamã, 24#Kol 3.10, Sɩng 1.26la y yeelg nin-paalgã wa fuugu, nin-paalg ning Wẽnnaam sẽn naan wa b sẽn data, tɩrlem la sõmblem sɩd sẽn wat ne wã pʋgẽ.
25 #
Zaka 8.16
Woto yĩnga, bas-y zĩrẽ yagbo,
la bɩ yãmb ned kam fãa togs a to sɩda.
Bala, tõnd yaa yĩng a yembr wil ne taaba. 26#Yɩɩn 4.5Yãmb sũur sã n yiki, da sak-y tɩ wĩndg tɩ kẽ tɩ y sũurã nan ka sig ye. 27Da kõ-y-yã a Sʋtãan weer ye. 28Bɩ ned ning sẽn dag n zuud da leb n zu ye. A mao n tʋm pʋ-peelem tʋʋmd ne a nusi, t'a tõe n paam bũmb sẽn na kõ ned ning sẽn tog ne sõngrã. 29Da sak-y tɩ gom yook ba a yembr yi yãmb noorẽ ye. Gomd sã n na n wa yi, bɩ yɩ gom-sõng sẽn na sõng ned t'a bɩ la a wa ne bark neb nins sẽn wʋmdã zutu. 30Da maan-y tɩ Wẽnnaam Sɩɩg-sõngo, Sɩɩg ning b sẽn tall n ning yãmb bãnd fãagr daarã yĩngã sũur sãam ye.
31Yiis-y sũ-toogo la kisgri, la tẽn-kãnem, la pʋ-toog buud fãa y sʋka. 32#Kol 3.13Maan-y taab neere, n kũmd taaba, la y kõ taab sugri, a wa Wẽnnaam sẽn kõ yãmb sugr Kiris maasem yĩngã.
Currently Selected:
Efɛɛs‑rãmba 4: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
