Tõodo 21

Ned sẽn ki tɩ b ka mi a kʋʋd wɛɛngẽ

1B sã n yãnd ned sẽn ki n dɩg tẽng ning Sẽn-Ka-Saab sẽn yaa yãmb Wẽnnaamã sẽn kõ yãmb tɩ y soogã weoog pʋgẽ, tɩ b ka mi sẽn yaa ned ning n kʋ a soabã, 2bɩ yãmb kãsem-dãmbã ne y bʋ-kaoodbã kẽng n tɩ mak tẽms nins sẽn pẽ kũumã zãrem. 3La b sã n bãng tẽng ning sẽn pẽ-a n yɩɩdã, bɩ tẽn-kãng kãsem-dãmbã rɩk nag-sadg a yembr sẽn nan ka tʋm la sẽn nan ka zɩlg zɩɩbo, 4bɩ tẽn-kãng kãsem-dãmbã tall nag-sadgã n kẽng long sẽn tar ko-zoetem sẽn ka sɛt zĩigẽ, la b sẽn nan ka ko a pʋgẽ, n wẽ nag-sadgã kãar n wã ko-zoetmã pʋga. 5Dẽ, Leevi yagensã sẽn yaa maan-kʋʋdbã na n kolgame. Bala, Sẽn-Ka-Saab sẽn yaa yãmb Wẽnnaamã yãka bãmb tɩ b tʋm bãmb tʋʋmdã, n ning bark ne bãmb yʋʋre. Yaa bãmb n tar noor ne yell buud fãa, sãmpogr buud fãa bʋʋdo. 6Tẽng ning sẽn pẽ kũumã kãsem-dãmbã fãa na n nudga b nus nag-sadg ning b sẽn wẽ a kãar n wã ko-zoetemã koom pʋgẽ. 7Bãmb na n yeelame: «Tõnd ka raag zɩ-kãngã, la d ka yãnd a raagdã me ye. 8Sẽn-Ka-Saabo, kõ-y Israyɛll sẽn yaa yãmb nebã y sẽn fãagã sugri. Ra ning-y Israyɛll sẽn yaa yãmb nebã taale, bʋʋm soabã zɩɩm daagr poorẽ ye.» 9Yaa woto la yãmb na n yiis bʋʋm soabã zɩɩm daagr taal yãmb sʋka. Bala, yãmb maana sẽn yaa tɩrg Sẽn-Ka-Saab nifẽ.

B sẽn tog n kẽes pag to-to b sẽn yõk zabr wakate

10Yãmb sã n wa kẽng n na n tɩ zab ne y bɛɛbã, tɩ Sẽn-Ka-Saab sẽn yaa yãmb Wẽnnaamã kɩt tɩ y tõog-b n yõg n maan yembse, 11tɩ yãmb yãnd pʋg-neer bãmb sʋkã n dat-a n peeg n tɩ maan y paga, 12bɩ y tall-a n kuil y yiri, n põng a zugã, la y wõrs a nug-yẽesã, 13la y yees fut nins a sẽn dag n yer a yõkrã wakatã. Kɩt-y t'a zĩnd y yirã n yãb a ba wã ne a ma wã yĩng kiuug a yembre. Rẽndã loogr zugẽ, yãmb tõe n yaool n peeg-a lame n maan y paga. 14A sã n wa ka leb n ta fo raabo, bɩ f bas-a, la f ra koos-a, la f ra maan-a wa yamb ye. Bala, fo modg-a lame n kẽese.

Kom-dẽems sẽn tog n paame

15Ned sã n tar pagb a yiib n nong a yembr n yɩɩd a yembre, tɩ pʋg-rʋmdã ne pʋg-beoogã fãa rog kamba, tɩ pʋg-beoogã biig yaa bi-kãsenga, 16yẽnda sã n wa rat n dɩk a paoongã n kõ a kambã, a ka tog n dɩk kãosengã n kõ pʋg-rʋmdã biig n bas pʋg-beoogã biig sẽn yaa a bi-kãsengã ye. 17Bɩ a nong a pʋg-beoogã biig sẽn yaa a bi-kãsengã n pʋɩ a paoongã zĩis a tãabo n yãk a yiib n kõ a bi-kãsengã. Bala, yaa yẽnda n yaa a pãngã sɩngre. Yẽnda tog n paama bi-kãsen-pʋɩɩre.

Bi-tõatga

18Ned sã n tar bi-tõatg sẽn yaa kɩɩsda, n ka kelgd a ba ne a ma goamã, tɩ b sagl-a n mak n konge, 19bɩ a ba wã ne a ma wã yõk-a n tall n kẽng bãmb tẽngã kãsem-dãmbã nengẽ, tẽngã rignoorẽ. 20Bɩ b yeel tẽngã kãsem-dãmb yaa: «Tõnd bi-kãngã yaa bi-tõatga. A ka sakd tõnd noor ye. A yaa tʋʋm-beed soaba, la rã-yũuda. 21La bɩ tẽngã raopã fãa lob-a ne kug t'a ki. Yaa woto la y na n yiis wẽngã yãmb sʋka. Israyɛll nebã fãa na n wʋmame tɩ rabeem yõk-ba.»

Tõod toay-toaya

22Ned sã n maan wẽng sẽn zems kũum tɩ b kʋ-a, tɩ yãmb lulg-a tɩɩg zugu, 23#Gal 3.13bɩ y ra bas kũumã tɩɩgã zug yʋng ye. Mum-y kũumã baraar bala. Bala, kũum sẽn luul yaa kãab-beed Sẽn-Ka-Saab nifẽ. Ra rẽgm-y tẽng ning Sẽn-Ka-Saab sẽn yaa yãmb Wẽnnaamã sẽn kõ yãmb tɩ yaa y soolmã ye.

Currently Selected:

Tõodo 21: MPBU

Highlight

Copy

Compare